គ.ជ.ប ចេញសេចក្តីប្រកាសព័ត៌មានពីលទ្ធផល នៃការដោះស្រាយបណ្តឹងលើបញ្ជីបេក្ខជនឈរឈ្មោះបោះឆ្នោតបេក្ខជននៃគណបក្សភ្លើងទៀននៅឃុំឫស្សីជ្រុំ ស្រុកថ្មបាំង ខេត្តកោះកុង

(ភ្នំពេញ)៖ លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត និងជាប្រធានក្រុមប្រឹក្សាជំនុំជម្រះ នៃ (គ.ជ.ប) នៅព្រឹកថ្ងៃទី១៦ ខែមីនា ឆ្នាំ២០២២នេះ បានបើកសវនាការសង្ខេប ដើម្បីដោះស្រាយពាក្យបណ្តឹង របស់ប្រជាពលរដ្ឋ ប្ដឹងជំទាស់នឹងបុគ្គល៥រូប ដែលឈរឈ្មោះជាបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ ក្នុងបញ្ជីបេក្ខជន នៃគណបក្សភ្លើងទៀន នៅឃុំឫស្សីជ្រុំ ស្រុកថ្មបាំង ខេត្តកោះកុង។

បើតាមសេចក្តីប្រកាសលទ្ធផលដែលបណ្តាញព័ត៌មាន ទទួលបានមុននេះបន្តិចបានឱ្យដឹងថា យោងតាមពាក្យបណ្តឹងរបស់ឈ្មោះ ណុល សុផល ភេទប្រុស កើតថ្ងៃទី៧ ខែសីហា ឆ្នាំ១៩៧៥ ជាប្រជាពលរដ្ឋ មានទីលំនៅនៅភូមិត្រពាំងឈើត្រាវ ឃុំឫស្សីជ្រុំ ស្រុកថ្មបាំង ខេត្តកោះកុង បេក្ខជនទាំង៥រូប ដែលត្រូវបានប្ដឹងជំទាស់ថាពុំមានលក្ខខណ្ឌចេះអាន និងចេះសរសេរអក្សរខ្មែរ ស្របតាម ជំពូកទី៦ ប្រការ ៦.១ ចំណុច ៦.១.២ នៃបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ នោះ រួមមាន៖

ទី១៖ ឈ្មោះ លី ហាយ ភេទប្រុស កើតថ្ងៃទី២៨ ខែមករា ឆ្នាំ១៩៥៨
ទី២៖ ឈ្មោះ ស៊ឹម វន ភេទប្រុស កើតថ្ងៃទី៥ ខែឧសភា ឆ្នាំ១៩៧៨
ទៅ៣៖ ឈ្មោះ ជុំ ផល ភេទស្រី កើតថ្ងៃទី២៣ ខែឧសភា ឆ្នាំ១៩៦៣
ទី៤៖ ឈ្មោះ ស៊ឹម ប្រុស ភេទប្រុស កើតថ្ងៃទី១ ខែមេសា ឆ្នាំ១៩៩២
និងទី៥៖ ឈ្មោះ ជៀម យ៉ាន ភេទស្រី កើតថ្ងៃទី១ ខែកុម្ភៈ ឆ្នាំ១៩៥៩។

បន្ទាប់ពីបានស្តាប់របាយការណ៍របស់ក្រុមមន្ត្រីចុះស៊ើបអង្កេត និងស្រាវជ្រាវនៃអគ្គលេខាធិការដ្ឋាន គ.ជ.ប ដែលបានចុះទៅដល់ទីកន្លែង ដើម្បីសាកសួរ និងយកព័ត៌មានពីសាក្សី រួមនឹងបេក្ខជនឈរឈ្មោះផ្ទាល់ និងក្រោយពីបានពិភាក្សាគ្នាយ៉ាងល្អិតល្អន់រួចមក ក្រុមប្រឹក្សាជំនុំជម្រះនៃ គ.ជ.ប បានសម្រេចរក្សាទុកបេក្ខជនឈ្មោះ លី ហាយ ភេទប្រុស កើតថ្ងៃទី ២៨ ខែមករា ឆ្នាំ១៩៥៨ ក្នុងបញ្ជីបេក្ខជនឈរឈ្មោះបោះឆ្នោតរបស់គណបក្សភ្លើងទៀន នៅឃុំឫស្សី ស្រុកថ្មបាំង ខេត្តកោះកុង ហើយសម្រេចលុបឈ្មោះបេក្ខជនឈរឈ្មោះបោះឆ្នោតចំនួន៤រូប រួមមាន៖

ទី១៖ ឈ្មោះ ស៊ឹម វន ភេទប្រុស កើតថ្ងៃទី៥ ខែឧសភា ឆ្នាំ១៩៧៨
ទី២៖ ឈ្មោះ ជុំ ផល ភេទស្រី កើតថ្ងៃទី២៣ ខែឧសភា ឆ្នាំ១៩៦៣
ទី៣៖ ឈ្មោះ ស៊ឹម ប្រុស ភេទប្រុស កើតថ្ងៃទី១ ខែមេសា ឆ្នាំ១៩៩២
និងទី៤៖ ឈ្មោះ ជៀម យ៉ាន ភេទស្រី កើតថ្ងៃទី១ ខែកុម្ភៈ ឆ្នាំ១៩៥៩។

ក្រុមប្រឹក្សាជំនុំជម្រះ នៃ គ.ជ.ប យល់ឃើញថា បេក្ខជនឈរឈ្មោះទាំង ៤រូប ខាងលើ ពិតជាពុំមានលក្ខខណ្ឌគ្រប់គ្រាន់ស្របតាមមាត្រា ៣៥ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ និងមិនស្របតាមលក្ខខណ្ឌក្នុងបទបញ្ជា និងនីតិវិធីសម្រាប់ការបោះឆ្នោតជ្រើសរើស ក្រុមប្រឹក្សាឃុំ សង្កាត់ ត្រង់ប្រការ ៦.១ ចំណុច ៦.១.២ ដែលចែងថា ប្រជាពលរដ្ឋទាំងពីរភេទ ដែលមានបំណងឈរឈ្មោះជាបេក្ខជនសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ ត្រូវបំពេញលក្ខខណ្ឌ ចេះអាន និងសរសេរអក្សរខ្មែរ។

សេចក្តីសម្រេចរបស់ក្រុមប្រឹក្សាជំនុំជម្រះ នៃ គ.ជ.ប បានប្រកាសក្នុងសវនាការសង្ខេបនៃកិច្ចប្រជុំពេញអង្គ ជាសេចក្តីសម្រេចស្ថាពរ បិទផ្លូវតវ៉ា៕