ថ្ងៃអង្គារ ១៣កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៥ ខែមីនា ឆ្នាំ២០២២ នៅទីស្ដីការក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្ដីពីវឌ្ឍនភាពការងារប្រចាំខែលើកទី៨ នៃគម្រោងធ្វើឱ្យប្រសើរឡើងប្រព័ន្ធភស្តុភារកម្មកម្ពុជាតាមរយៈប្រព័ន្ធវីដេអូពីចម្ងាយ ដោយមានការអញ្ជើញចូលរួមពីក្រុមការងារគម្រោង និងជំនាញការនៃទីភ្នាក់ងារសហប្រតិបត្តិការអន្តរជាតិជប៉ុន(JICA)។
កិច្ចប្រជុំនេះធ្វើឡើងដើម្បីពិនិត្យវឌ្ឍនភាពនៃការអនុវត្តគម្រោង ទិសដៅសកម្មភាពដែលត្រូវអនុវត្តបន្តនៅ ខែបន្ទាប់ សំណូមពរ និងបញ្ហាប្រឈមនានាដែលត្រូវពិភាក្សាជាមួយក្រុមការងារ PMU លើវឌ្ឍនភាពនៃ ការរៀបចំគោលនយោបាយ វិស័យភស្តុភារកម្ម និងការធ្វើឱ្យប្រសើរឡើងការដឹកជញ្ជូនឆ្លងកាត់ព្រំដែន។
អង្គប្រជុំបានស្តាប់ និងលើកយកមកពិភាក្សានូវរបាយការណ៍សង្ខេបស្តីអំពីវឌ្ឍនភាពនៃការអនុវត្តសកម្មភាពមួយចំនួន ក្នុងការធ្វើឱ្យប្រសើរឡើងច្រកទ្វារព្រំដែនបាវិត និងទំនាក់ទំនងព័ត៌មានពាក់ព័ន្ធនឹងវឌ្ឍនភាព និងការរៀបចំបើកច្រកទ្វារព្រំដែនស្ទឹងបត់-បានណងអៀន ។
ថ្លែងបូកសរុបលទ្ធផលកិច្ចប្រជុំនាឱកាសនោះ លោកជំទាវរដ្ឋលេខាធិការ បានថ្លែងនូវកោតសរសើរអំពី វឌ្ឍនភាពការងាររបស់ក្រុមការងារនីមួយៗ និងបានជំរុញឱ្យក្រុមការងារពន្លឿនការងារតាមក្រុមនីមួយៗ ដោយដាក់ចេញនូវផែនការសកម្មភាព និងកាលបរិច្ឆេទឱ្យបានច្បាស់លាស់ និងត្រូវភ្ជាប់ឯកសារយោងពាក់ព័ន្ធ ដើម្បីបញ្ចប់ការងារទៅតាមផែនការដែលបានគ្រោងទុក ដើម្បីដាក់ជូនអង្គប្រជុំរបស់គណៈ កម្មការពិនិត្យ និងផ្តល់អនុសាសន៍បន្ត។
បន្ថែមពីលើនេះ លោកជំទាវ បានលើកពីវឌ្ឍនភាព និងបញ្ហាប្រឈមនៃគម្រោងការធ្វើឱ្យប្រសើរឡើងការដឹកជញ្ជូនឆ្លងកាត់ព្រំដែនបាវិត និងស្ទឹងបត់ និងបានស្នើឱ្យ JICA បន្តផ្តល់ការគាំទ្រជំនួយបច្ចេកទេស នៅដំណាក់កាលបន្ទាប់ទៀតនៅឆ្នាំក្រោយ ដើម្បីគាំទ្រការអនុវត្តគោលនយោបាយវិស័យភស្តុភារកម្ម ដែលបានរៀបចំដាក់ចេញកន្លងមក និងធានាឱ្យការដឹកជញ្ជូនឆ្លងកាត់ព្រំដែនកាន់តែមានភាពរលូន ប្រកបដោយប្រសិទ្ធភាពខ្ពស់។
សូមជម្រាបជូនថា៖ បច្ចុប្បន្នភាគីកម្ពុជាកំពុងអនុវត្តការងារពង្រីកផ្លូវក្នុងតំបន់ទ្រនាប់ (Buffer Zone) ដែលជាចំណែកទទួលខុសត្រូវដោយភាគីកម្ពុជានៅច្រកទ្វារបាវិត។ ជាមួយគ្នានេះផងដែរ ប្រធានក្រុម ជំនាញការ JICA ក៏បានស្នើសុំឱ្យមានការជួបប្រជុំក្រុមការងារចម្រុះផ្នែកដឹកជញ្ជូនកម្ពុជា-វៀតណាម ដើម្បីជំរុញឱ្យភាគីវៀតណាមធ្វើការពង្រីកផ្លូវក្នុងតំបន់ទ្រនាប់(Buffer Zone) ក្នុងចំណែកទទួលខុសត្រូវរបស់ភាគីវៀតណាមដើម្បីសម្រួល និងកាត់បន្ថយការកកស្ទុះចរាចរណ៍រវាងប៉ុស្តិ៍ច្រកទ្វារព្រំដែនទាំងពីរ នៃប្រទេសទាំងពីរ៕
