(រាជធានីភ្នំពេញ)៖ ក្រសួងបរិស្ថាននាថ្ងៃទី២៥ ខែកុម្ភៈ បានប្រារព្ធពិធីប្រគល់ពានរង្វាន់ទីក្រុងនិរន្តរភាពបរិស្ថានអាស៊ាន និងវិញ្ញាបនបត្រទទួលស្គាល់ដីស្អាត ទឹកស្អាត និងខ្យល់ស្អាត ដល់រាជធានីភ្នំពេញ និងទីក្រុងចំនួន៣គឺ ក្រុងកែប, ក្រុងព្រះសីហនុ និងក្រុងសែនមនោរម្យដែលបានសម្រេចនៅក្នុងកិច្ចប្រជុំរដ្ឋមន្ត្រីបរិស្ថានអាស៊ាន លើកទី១៦ ដែលបានរៀបចំឡើងដោយប្រទេសឥណ្ឌូណេស៊ី កាលពីថ្ងៃទី២១ ខែតុលា ឆ្នាំ២០២១ កន្លងមក។
រាជធានីភ្នំពេញបានទទួលវិញ្ញាបនបត្រជាទីក្រុងទឹកស្អាត, ទីក្រុងកែបបានទទួលវិញ្ញាបនបត្រជាទីក្រុងខ្យល់ស្អាត, ក្រុងសែនមនោរម្យបានទទួលវិញ្ញាបនបត្រជាទីក្រុងដីស្អាត ហើយទីក្រុងព្រះសីហនុបានទទួលពានរង្វាន់ទីក្រុងនិរន្តរភាពបរិស្ថានអាស៊ានឆ្នាំ២០២១។
ឯកឧត្តម នេត្រ ភក្រ្តា រដ្ឋលេខាធិការ និងមន្រ្តីនាំពាក្យក្រសួងបរិស្ថានបានថ្លែងក្នុងពិធីប្រគល់ពានរង្វាន់ថាការទទួលបានពានរង្វាន់ និងវិញ្ញាបនបត្រទទួលស្គាល់ទាំងនេះ គឺដោយសារកត្ដាសុខសន្តិភាព និងស្ថិរភាពនយោបាយ។ រដ្ឋលេខាធិការ និងមន្រ្តីនាំពាក្យក្រសួងបរិស្ថានបានថ្លែងដូច្នេះថា៖«ពានរង្វាន់ទាំងពីរនេះបញ្ជាក់ពីសារសំខាន់នៃការថែរក្សាខ្យល់ឱ្យបានស្អាត ដីស្អាត និងទឹកស្អាត ខណៈដែលទីក្រុងអាស៊ានត្រូវបន្តការអភិវឌ្ឍប្រកបដោយចីរភាព។ ទាំងនេះគាំទ្របន្ថែមលើអាទិភាព នៃការពង្រឹងសមត្ថភាពក្នុងតំបន់ក្នុងការរៀបចំផែនការទីក្រុង និងការកសាងទីក្រុងដែលធន់នឹងអាកាសធាតុ»។
ឯកឧត្តម នេត្រ ភក្រ្តាបានបញ្ជាក់ថាគោលបំណងនៃការផ្ដល់ពានរង្វាន់ និង វិញ្ញាបនប័ត្រទទួលស្គាល់ទីក្រុងនិរន្តរភាពបរិស្ថានអាស៊ាន គឺដើម្បីលើកកម្ពស់ការយល់ដឹងពីការអភិវឌ្ឍប្រកបដោយនិរន្តរភាព និងការជំរុញកិច្ចសហប្រតិបត្តិការលើគ្រប់វិស័យក្នុងបណ្តាប្រទេសអាស៊ាន ឈានទៅសម្រេចបាន ទីក្រុងស្អាតនិងបៃតង។ សម្រាប់គោលបំណងនៃការផ្ដល់ពានរង្វាន់ និង វិញ្ញាបនប័ត្រទទួលស្គាល់ទីក្រុងនិរន្តរភាពបរិស្ថានអាស៊ាន គឺដើម្បីលើកកម្ពស់ការយល់ដឹងពីការអភិវឌ្ឍប្រកបដោយនិរន្តរភាព និងការជំរុញកិច្ចសហប្រតិបត្តិការលើគ្រប់វិស័យក្នុងបណ្តាប្រទេសអាស៊ាន ឈានទៅសម្រេចបាន ទីក្រុងស្អាតនិងបៃតង។
ឯកឧត្តមរដ្ឋលេខាធិការបានអះអាងថា ដើម្បីសម្រេចបេសកកម្មរបស់ខ្លួន ធានាបាននូវទីក្រុងស្អាតនិងបៃតង ក្រសួងបរិស្ថានបានដាក់ចេញនូវចក្ខុវិស័យដោយមានសសរស្តម្ភសំខាន់ៗចំនួន៤រួមមានគឺ ការធ្វើទំនើបកម្មស្ថាប័ន ការអភិរក្សជីវៈចម្រុះ និងការការពារធនធានធម្មជាតិ កិច្ចគាំពារបរិស្ថាន និងការអភិវឌ្ឍប្រកបដោយចីរភាព ដោយរួមបញ្ចូលគោលនយោបាយភូមិ ឃុំមានសុវត្ថិភាពផងដែរ។
ចំពោះកិច្ចគាំពារបរិស្ថាន ក្រសួងបរិស្ថានក៏បានចាត់វិធានការជាច្រើន ដើម្បីទប់ស្កាត់ការបំពុលបរិស្ថាន ដោយផ្តោតលើគុណភាពដី ទឹក និងខ្យល់។ល។ ដែលជាសូចនាករសំខាន់ក្នុងការផ្ដល់ពានរង្វាន់និរន្តរភាពបរិស្ថានទីក្រុងអាស៊ាន និងវិញ្ញាបនបត្រទទួលស្គាល់និរន្ដរភាពបរិស្ថានទីក្រុងអាស៊ាន។
សូមរម្លឹកថា ទីក្រុងមួយចំនួនរបស់កម្ពុជា គឺរាជធានីភ្នំពេញក៏ធ្លាប់បានទទួលពានរង្វាន់និរន្តរភាពបរិស្ថានទីក្រុងអាស៊ាននាឆ្នាំ២០០៨ និងឆ្នាំ២០១១ ទីក្រុងបាត់ដំបងបានទទួលនាឆ្នាំ២០១៣ ទីក្រុងកែបបានទទួលនាឆ្នាំ២០១៧ និងទីក្រុងព្រះស៊ីហនុបានទទួលនាឆ្នាំ២០២១កន្លងទៅថ្មីៗនេះ។ ទន្ទឹមនោះ ទីក្រុងសៀមរាបបានទទួលវិញ្ញាបនប័ត្រទទួលស្គាល់ទឹកស្អាតនាឆ្នាំ២០១៣ ទីក្រុងពោធិ៍សាត់បានទទួលវិញ្ញាបនប័ត្រទទួលស្គាល់ទឹកស្អាតនាឆ្នាំ២០១៧។
សូមបញ្ជាក់ថា នៅក្នុងក្របខណ្ឌនៃការផ្ដល់ពានរង្វាន់ទីក្រុងនិរន្តរភាពបរិស្ថានអាស៊ាន គឺបានរៀបចំរៀងរាល់៣ឆ្នាំម្ដង ចាប់ពីឆ្នាំ២០០៨ ដល់ឆ្នាំ២០១៧ និងរៀងរាល់៤ ឆ្នាំម្ដងក្រោយពីឆ្នាំ២០១៧ ហើយដែលការប្រគល់ពានរង្វាន់ និងនិងវិញ្ញាបនប័ត្រទទួលស្គាល់ទីក្រុងនិរន្តរភាពបរិស្ថានអាស៊ាន បានធ្វើនៅក្នុងកិច្ចប្រជុំរដ្ឋមន្ត្រីបរិស្ថានអាស៊ាន៕
