ភ្នំពេញ៖ អគ្គនាយក នៃអគ្គនាយកដ្ឋានអន្តោប្រវេសន៍ បានជម្រុញឱ្យមន្រ្តីជំនាញពង្រឹងការងារផ្តល់ទិដ្ឋាការ និងការអនុវត្តនិតិវិធី ដើម្បីងាយស្រួលស្វែងរកការប្រព្រឹត្តបទល្មើសរបស់ជនបរទេស ។
ការជំរុញរបស់ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ នៅក្នុងឱកាសដឹកនាំកិច្ចប្រជុំ ស្តាប់របាយការណ៍ និងការពង្រឹងការផ្ដល់ទិដ្ឋាការ និងការងារស៊េីបអង្កេត នារសៀលថ្ងៃព្រហស្បតិ៨រោច ខែមាឃ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៤ ខែកុម្ភៈ ឆ្នាំ២០២២ ដោយមានការចូលរួមពីអគ្គនាយករង ប្រធាន-អនុប្រធាននាយកដ្ឋាន និងមន្ត្រីជំនាញពាក់ព័ន្ធជាច្រើនរូបទៀត ។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ មានប្រសាសន៍ជំរុញឱ្យមន្ត្រីជំនាញត្រូវពង្រឹង និងត្រួតពិនិត្យការងារ ក្នុងការផ្តល់ទិដ្ឋាការ និងការងារអនុវត្តនីតិវិធី ដើម្បីងាយស្រួលស្វែងរកការប្រព្រឹត្តបទល្មើសរបស់ជនបរទេស ។ នាយឧត្តមសេនីយ៍ អគ្គនាយក បានបញ្ជាក់ថា កងកម្លាំងជំនាញរបស់នាយករដ្ឋានទាំងអស់ ត្រូវចេះមើលត្រា ឬទិដ្ឋាការ ដែលមានសញ្ញាក្លែងក្លាយ ឱ្យបានច្បាស់លាស់ ដើម្បីងាយស្រួលស៊ើបអង្កេតបន្តនីតិវិធី ៕
