ប្រកាសតែងតាំងប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិព្រែកចាក ជំនួសលោក ង៉ែត សាវឿន ត្រូវចប់អាណត្តិ

(កំពត)៖ លោក សេង សិរីបុត្រ អភិបាលរងខេត្ត តំណាងលោកអភិបាលខេត្តកំពត ម៉ៅ ធនិន នៅរសៀលថ្ងៃទី២២ ខែកុម្ភៈ ឆ្នាំ២០២២ បានចូលរួមជាអធិបតីប្រកាសផ្លាស់ប្ដូរ លោក អ៊ុង ថុនា នាយករងរដ្ឋបាលខេត្តកំពត ជាប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិព្រែកចាក ស្រុកកំពង់ត្រាច ខេត្តកំពត ជំនួសលោក ង៉ែត សាវឿន ត្រូវចប់អាណត្តិ ឱ្យទៅបម្រើការងារនៅអង្គភាពដើមវិញ ជានាយករងរដ្ឋបាលខេត្តកំពតដដែល ដោយយោងតាមសេចក្តីប្រកាសស្តីពីការផ្លាស់ប្តូរ និងប្រគល់ភារកិច្ចជូនមន្ត្រីរាជការ របស់ក្រសួងមហាផ្ទៃ។

ការប្រកាសផ្លាស់ប្ដូរនេះ បានប្រព្រឹត្តិទៅនៅសាលប្រជុំសាលាខេត្តកំពត ដោយចូលរួមពីជួរថ្នាក់ដឹកនាំមន្ត្រី នៃស្ថាប័នអង្គភាពគយនិងរដ្ឋាករ នគរបាលអន្តោប្រវេសន៍ច្រកទ្វារ អាជ្ញាធរ កងកម្លាំងពាក់ព័ន្ធជាច្រើនរូប។

ក្នុងឱកាសនោះ លោក សេង សិរីបុត្រ បានកោតសរសើរ និងវាយតម្លៃខ្ពស់ចំពោះលទ្ធផលការងារ ដែលប្រធានទីស្នាក់ការចាស់ អនុវត្តបានយ៉ាងល្អប្រសើរនាពេលកន្លងមក។

ទន្ទឹមនេះ លោកក៏សូមស្នើ និងណែនាំដល់ប្រធានទីស្នាក់ការ ដែលទើបទទួលបានការតែងតាំងថ្មី ត្រូវបន្តបេសកកម្មចូលរួមសហការ ជាពិសេសត្រូវខិតខំពង្រឹងការសាមគ្គីភាព ឯកភាពផ្ទៃក្នុង គោរពតាមឋានានុក្រមដឹកនាំ ស្របតាមការបែងចែកតួនាទីភារកិច្ច ទទួលខុសត្រូវឱ្យបានល្អ បន្តកិច្ចសហការល្អជាមួយប្រទេសជិតខាង រួមសហការបង្ក្រាបបទល្មើសសេដ្ឋកិច្ច និងបទល្មើសនានា តាមបន្ទាត់ព្រំដែន។

លោក សេង សិរីបុត្រ ក៏សូមឱ្យមន្ទីរអង្គភាពជុំវិញខេត្ត អាជ្ញាធរដែនដីគ្រប់លំដាប់ថ្នាក់ នៅស្រុកកំពង់ត្រាច មន្ត្រីរាជការ កងកម្លាំងប្រដាប់អាវុធ ដែលប្រចាំការនៅច្រកទ្វារព្រំដែនអន្តរជាតិព្រែកចាក សូមផ្តល់នូវកិច្ចគាំទ្រសហប្រតិបត្តិការ ដើម្បីរួមគ្នាថែរក្សាការពារសន្តិសុខ សណ្តាប់ធ្នាប់ នៅតំបន់ព្រំដែនឱ្យមានសន្តិភាព មិត្តភាពសហប្រតិបត្តិការ និងការអភិវឌ្ឍខិតខំប្រមែប្រមូលពន្ធគយ និងត្រូវពិនិត្យ យកចិត្តទុកដាក់ ចំពោះទំនិញខូចគុណភាពគ្រប់ប្រភេទ៕