នៅព្រឹកថ្ងៃទី២៦ ខែវិច្ឆិកា ឆ្នាំ ២០២០នេះ ឯកឧត្តម នាយឧត្ដមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ បានអញ្ជើញជាអធិបតីភាពនៅក្នុងពិធីបិទវគ្គហ្វឹកហ្វឺនបណ្ដុះបណ្ដាលមុខ ជំនាញឯកទេសការពារគីមីសាស្ត្រជំនាន់ទី៩ នៅសាលាហ្វឹកហ្វឺនជំនាញការពារគីមីសាស្ត្រ ដែលមានមូលដ្ឋានស្ថិតក្នុងស្រុកសាមគ្គីមានជ័យ ខេត្តកំពង់ឆ្នាំង។
នៅក្នុងសេចក្តីរាយការណ៍របស់ ឯកឧត្តម ឧត្តមសេនីយ៍ឯក ឈឹម សាវុធ នាយរងសេនាធិការចំរុះ និងជានាយកទីចាត់ការការពារគីមីសាស្ត្រអគ្គបញ្ជាការបានឲ្យដឹង ថា៖ អង្គភាពគីមីសាស្ត្របានបង្កើតឡើងនៅឆ្នាំ១៩៨៤ មានតួនាទីធ្វើជាសេនាធិការឲ្យអគ្គបញ្ជាការ ក្នុងភារកិច្ចការពារ និង សង្គ្រោះប្រឡាក់ជាប់ជាតិ ពុលសារធាតុគីមីនៅលើសមរភូមិនិងទីប្រជុំជនដែលយុទ្ធជន និងប្រជាពលរដ្ឋដែលត្រូវសារធាតុពុលគីមីដោយអាវុធជីវសាស្ត្រ។ ឯកឧត្តមឧត្ដមសេនីយ៍ឯក បានបញ្ជាក់ថា កន្លងមកនេះក្រៅពីភារកិច្ចស្នូល អង្គភាពការពារគីមីសាស្ត្រនៅបានយកចិត្តទុកដាក់ជាប្រចាំលើការងារហ្វឹកហ្វឺនជំនាញបានជាច្រើនវគ្គ ជាក់ស្ដែងវគ្គហ្វឹកហ្វឺនបណ្តុះបណ្តាលជំនាញឯកទេសគីមីសាស្ត្រជំនាន់ទី៩ នាពេលនេះ បានដំណើរការរយៈពេល៩ខែ មានសិក្ខាកាម ៧៧ នាក់ សិក្សាលើមុខវិជ្ជាមួយចំនួនដូចជា សណ្តាប់ធ្នាប់យោធា ឋានលេខា និងឯកទេសការពារគីមីសាស្ត្រ។ ជាលទ្ធផលសិក្ខាកាម ២៣ នាក់ ទទួលបាននិទ្ទេសល្អ, ៣៨ នាក់ ទទួលបាននិទ្ទេសល្អបង្គួ, និង ១៦ នាក់ ទទួលបាននិទ្ទេសមធ្យម។
ឯកឧត្តម នាយឧត្ដមសេនីយ៍ វង្ស ពិសេន មានប្រសាសន៍ដោយបានគូសបញ្ជាក់ថា នៅគ្រប់កាលៈទេសៈការងារហ្វឹក ហ្វឺននៅតែជាកិច្ចការមួយមានសារសំខាន់ក្នុងការរួមចំណែកអភិវឌ្ឍន៍សមត្ថភាពយោធិនលើគ្រប់ជំនាញ ដើម្បីឆ្លើយតប ទៅនឹងសំណូមពរភារកិច្ចការ ពារជាតិមាតុភូមិ ទាំងក្នុងពេលបច្ចុប្បន្ន និងទៅអនាគតយូរអង្វែង។
ឯកឧត្តម នាយឧត្ដមសេនីយ៍ បានថ្លែងបន្តថា ជាការពិត ការហ្វឹកហ្វឺនជំនាញឯកទេសការពារគីមីសាស្ត្រនៅពេលនេះ ធ្វើឡើងមិនមែនសម្រាប់តែនៅសាលាហ្វឹកហ្វឺនប៉ុណ្ណោះទេតែក៏ត្រូវធ្វើការបំប៉នបង្កើនសមត្ថភាពបច្ចេកទេសជំនាញបន្ថែម ដើម្បីធានាបាន ការការពារគីមីសាស្ត្រក្នុងកង ទ័ព និងប្រជាពលរដ្ឋក្នុងករណី ដែលមានហេតុការណ៍កើត ឡើង។
ឯកឧត្តម នាយឧត្ដមសេនីយ៍ អគ្គមេបញ្ជាការ ក៏បានផ្តាំផ្ញើដល់សិក្ខាកាមទើបបញ្ចប់វគ្គទាំងអស់ ត្រូវយកចិត្តទុកដាក់បំពេញការងារជំនាញនៅតាមអង្គភាពរបស់ខ្លួន ដោយត្រូវចេះបញ្ជ្រៀបខ្លួន តស៊ូជំនះឧបសគ្គ និងខិតខំសិក្សារៀនសូត ស្រាវជ្រាវបន្ត។ សំខាន់ជាងនេះ ក្នុងនាមជាកុលបុត្រកុលធីតាកម្ពុជា យោ ធិនគ្រប់រូបត្រូវមានទឹកចិត្តស្មោះត្រង់ចំពោះជាតិមាតុភូមិ និងប្រឆាំងដាច់ខាតការធ្វើ បដិវត្តន៍ពណ៌ ប្តូរផ្តាច់ការពារសន្តិភាព ស្ថិរភាពនយោបាយជាតិ ទោះក្នុងតម្លៃណាក៏ដោយ ។ ឯកឧត្តម នាយឧត្ដមសេនីយ៍ វង្ស ពិសេន បានផ្តល់កិត្តិយសចែកវិញ្ញាបនបត្របញ្ជាក់ការសិក្សា ប្រគល់ប័ណ្ណសរសើរ លិខិតសរសើរ និង បំពាក់ឋានន្តរសក្ដិដល់សិក្ខាកាមផងដែរ៕
