នៅថ្ងៃទី៣១ ខែតុលា ឆ្នាំ២០២៦ អតីតសិស្សសាលាបាក់ទូកនាទសវត្សរ៍៨០ មួយក្រុមនាំមុខដោយ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការកងរាជអាវុធហត្ថរាជធានីភ្នំពេញ រួមជាមួយអតីតលោកគ្រូអ្នកគ្រូបង្រៀននៅសាលាបាក់ទូក បាននាំយកនូវថវិកា ដែលបានមកពីការចូលរួមរបស់អតីតសិស្សជំនាន់ទសវត្សរ៍៨០ សរុបចំនួន ២០លានរៀលរួមនឹង ភេសជ្ជៈចម្រុះ ០៩កេស យកទៅសួរសុខទុក្ខ និងប្រគល់ជូនលោកគ្រូ ជា សែ អតីតគ្រូជើងចាស់ឯកទេសរូបវិទ្យា ដ៏ល្បីល្បាញម្នាក់នាទសវត្សរ៍៨០ ដែលបានចូលសង្គ្រោះបន្ទាន់នៅមន្ទីរពេទ្យព្រះអង្គឌួង បន្ទាប់ពីជំងឺប្រចាំកាយទឹកនោមផ្អែមធ្វើទុក្ខខ្លាំង ដោយក្រុមគ្រូពេទ្យបានសម្រេចកាត់ជើងខាងស្តាំរបស់លោកគ្រូម្ខាងទៀត បន្ទាប់ពីលោកគ្រូធ្លាប់បានកាត់ជើងឆ្វេងម្តងមកហើយកាលពីឆ្នាំ២០២៣។
គួររំលឹកថា លោកគ្រូ ជា សែ ធ្លាប់បានចូលសង្គ្រោះបន្ទាន់នៅមន្ទីរពេទ្យចំនួន ០២លើក គឺ នៅខែសីហា ឆ្នាំ២០១៨ និងខែធ្នូ ឆ្នាំ២០២៣ ហើយត្រូវបានអតីតសិស្សសាលាបាក់ទូកនាទសវត្សរ៍៨០រួមគ្នា បរិច្ចាគធនធានផ្ទាល់ខ្លួន តាមលទ្ធភាពបានលើកទី១ ថវិកាសរុបជាង ៧,០០០ដុល្លារ និងលើកទី២ ថវិកាសរុបជាង ៨,០០០ដុល្លារ ប្រគល់ជូនលោកគ្រូ ជា សែ ទុកជាការជួយសម្រាលបន្ទុកព្យាបាលដល់គ្រួសារលោកគ្រូជាបន្តបន្ទាប់ផងដែរ។
ក្នុងរយៈកាលកន្លងមក គេតែងសង្កេតឃើញអតីតមិត្តរួមជំនាន់នៃសាលាបាក់ទូកមួយក្រុម ដែលផ្តួចផ្តើមចងក្រងឡើង ដោយលោកឧត្តមសេនីយ៍ឯក រ័ត្ន ស្រ៊ាង តែងបង្ហាញនូវសកម្មភាពទំនាក់ទំនងគ្នាយ៉ាងជិតស្និទ្ធ និងចែករំលែកធនធានជួយទុក្ខធុរៈ អតីតលោកគ្រូអ្នកគ្រូ មិនដែលមានខាន ព្រមទាំងជួយដល់មិត្តដែលជួបការលំបាកនិងខ្វះលទ្ធភាពគ្រប់ៗគ្នា។ សកម្មភាពយកចិត្តទុកដាក់ និងចែករំលែកធនធានជួយដល់អតីតលោកគ្រូអ្នកគ្រូ និងមិត្តដែលមានអាសន្នទាំងនេះ គឺជាមនោសញ្ចេតនា និងជាគោលការណ៍ក្នុងក្រុម ស្របតាមពាក្យស្លោកដែលពួកគាត់បានរួមគ្នាបង្កើតឡើងថា “សាមគ្គីមិត្តភាព បង្កើតចិត្តរមនា ចែករំលែកជួយគ្នា គ្រប់គ្រាលំបាក “៕
