(ខេត្តកំពត)៖ បើទោះជាអាជ្ញាធរ និងសមត្ថកិច្ចបានរឹតបន្តឹងឬដាក់បន្ទុកករណីគ្រឿងញៀនជាបទល្មើសធ្ងន់ធ្ងរបែបណាក្តី តែករណីនេះនៅតែជាបញ្ហាប្រឈមមួយដែលតែងតែមានកើតឡើងជាហូរហែរនៅតាមមូលដ្ឋាន។
ជាក់ស្តែងកាលពីថ្ងៃវេលាម៉ោង១១ និង១០នាទីថ្ងៃត្រង់ ថ្ងៃទី២៤ ខែវិច្ឆិកា ឆ្នាំ២០២០ កម្លាំងជំនាញគ្រឿងញៀននៃអធិការដ្ឋាននគរបាលស្រុកកំពង់ត្រាច បានឃាត់ខ្លួនជនសង្ស័យបានម្នាក់ដែលកំពុងធ្វើសកម្មភាពចែកចាយគ្រឿងញៀននៅចំនុចផ្លូវក្រួសក្រហមខាងក្រោយមន្ទីរពេទ្យបង្អែកស្រុកកំពង់ត្រាច ស្ថិតនៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
ជនសង្ស័យដែលសមត្ថកិច្ចឃាត់ខ្លួន ឈ្មោះ សៀវ រស្មី ភេទប្រុស អាយុ២១ឆ្នាំ រស់នៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ជាមួយនឹងការឃាត់ខ្លួនកម្លាំងបានដកហូតនូវវត្ថុតាង ម្ស៉ៅក្រាមពណ៌សថ្លាចំនួន(១៦កញ្ចប់តូច)ម៉ូតូ១គ្រឿង ទូរស័ព្ទដៃ១គ្រឿងផងដែរ។
បច្ចុប្បន្នជនសង្ស័យរួមជាមួយវត្ថុតាង សមត្ថកិច្ចជំនាញបានបញ្ជូនទៅកាន់ស្នងការដ្ឋាននគរបាលខេត្តកំពត ដើម្បីចាត់ការតាមនីតិវិធី៕ សេង ណារិទ្ធ
