មណ្ឌលគិរី ៖ នៅព្រឹកថ្ងៃទី០៨ មីនា ២០១៦ វេលាម៉ោង១០និង៤០នាទី កងកម្លាំងអាវុធហត្ថស្រុកអូរាំង បានសហការជាមួយកម្លាំងអាវុធខេត្តដែលដឹកនាំដោយលោកវរសីយ៍ត្រី សូ សំអាត បានធ្វើការចុះបង្ក្រាបរថយន្ដចំនូនមួយគ្រឿង ដែលមានដឹកឈើប្រណិតខុសច្បាប់ចំនួន៥ដុំ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូរាំង។
លោកវរសីយ៍ត្រី សូ សំអាត មេបញ្ជាការមូលដ្ឋានអាវុធហត្ថស្រុកអូរាំងបានឲ្យដឹងថា រថយន្ដដែលដឹកឈើខុសច្បាប់នោះមានម៉ាក CAMARY ឆ្លាម ពណ៌ស ពាក់ស្លាកលេខភ្នំពេញ២B៣០៥៩ ដែលដឹកឈើជាប្រភេទបេងនិងធ្នង់ ។
លោកបន្ដឲ្យដឹងទៀតថា អ្នកបើកបរគ្រាន់តែឃើញកម្លាំងរបស់លោកចុះទៅដល់ភ្លាម ក៏រត់គេចបាត់ស្រមោលតែម្ដង ។ បច្ចុប្បន្ន រថយន្ដនិងកំណាត់ឈើទាំងនោះត្រូវបានរក្សាទុកនៅមូលដ្ឋានអាវុធហត្ថស្រុកអូរាំង ដើម្បីរៀបចំឯកសារបញ្ចូនទៅជំនាញរដ្ឋបាលសង្កាត់ព្រៃឈើស្រុកអូរាំងចាត់ទៅតាមនិតិវិធីច្បាប់ ៕ ដោយ ៖ គឹម ចំរើន
