(បាត់ដំបង)៖ នៅរសៀលថ្ងៃទី១៧ ខែកុម្ភៈ ឆ្នាំ២០២៥ ឯកឧត្តម សុខ លូ អភិបាលខេត្តបាត់ដំបង បានអញ្ជើញដឹកនាំកិច្ចប្រជុំពិភាក្សាការងារជាមួយថ្នាក់ដឹកនាំមន្ទីរជំនាញនានា និងអ្នកពាក់ព័ន្ធមួយចំនួន ដើម្បីសម្រុករៀបចំទាំងការ ជួសជុល កសាង ហេដ្ឋារចនាសម្ព័ន្ធដែលខូចខាតកន្លងមក និងរៀបចំសន្តិសុខ សណ្តាប់ធ្នាប់ទីក្រុងបាត់ដំបងជាច្រើនកន្លែង នារដូវប្រាំងឆ្នាំ២០២៥នេះ។
ថ្លែងក្នុងឱកាសនោះ ឯកឧត្តម សុខ លូ បានបញ្ជាក់ថា កាលពីរដូវវស្សាកន្លងទៅ ទីក្រុងបាត់ដំបង និងស្រុកមួយចំនួន បានរងការខូចខាតផ្លូវថ្នល់ ជាច្រើនកន្លែងដោយអន្លើ ដោយសារជំនន់ទឹកភ្លៀងធ្វើឲ្យប្រជាពលរដ្ឋ ជួបការលំបាកក្នុងការធ្វើដំណើរប្រចាំថ្ងៃ តែត្រូវបានអាជ្ញាធរខេត្តដឹកនាំមន្ត្រីជំនាញចុះជួយសង្គ្រោះបន្ទាន់ជាបន្តបន្ទាប់ផងដែរ។
ឯកឧត្តមបានបន្តថា មន្ដ្រីជំនាញពាក់ព័ន្ធទូទាំងខេត្តទាំងអស់ បានខិតខំធ្វើការជួយសង្គ្រោះ អស់ពីលទ្ធភាព បម្រើប្រជាពលរដ្ឋទៅតាមជាក់ស្តែង និងបានទាន់ពេលវេលាផងដែរ។ ទោះជាមានការរវល់ការងារស្នូលជំនាញរៀងៗខ្លួនក៏ដោយ តែការសង្គមក៏សំខាន់ដែរ ដែលត្រូវតែចុះជួយជាបន្ទាន់ ដើម្បីកាន់បន្ថយ ការលំបាករបស់ប្រជាពលរដ្ឋ ដោយគ្រោះធម្មជាតិផ្សេងៗផងដែរ។
ឯកឧត្តមអភិបាលខេត្តបាត់ដំបង បានន្ថែមថា ពេលក្រុមការងារជំនាញនីមួយៗកំពុងញាប់ដៃញាប់ជើងទាន់រដូវប្រាំង បាននិងកំពុងធ្វើការងារនេះ រៀងៗខ្លួន ជាក់ស្តែងបានអញ្ជើញបើកកិច្ចប្រជុំពិភាក្សាការងាររៀបចំសណ្តាប់ធ្នាប់ ទីក្រុងបាត់ដំបង ដើម្បីរៀបចំគម្រោងអភិវឌ្ឍន៍ កែលម្អសួនច្បារ ផ្លូវ ទីធ្លា ចំណតរថយន្ត ផ្លូវដើរថ្មើរជើង ផ្លូវជិះកង់ សម្រាប់ទទួលភ្ញៀវទេសចរ មកកម្សាន្ត លើកសោភ័ណភាពទីក្រុង និងសេដ្ឋកិច្ច ជីវភាពរស់នៅប្រជាពលរដ្ឋខេត្តបាត់ដំបង ក្នុងពេលអនាគត និងនៅថ្ងៃស្អែកនេះ ក៏មានការរៀបចំក្រុងពាលី កសាងសួនច្បារ «តេជោសន្តិភាព» នៅខាងកើតស្ទឹងសង្កែផងដែរ៕
ដោយ ទាវ ដារិន
