ខេត្តស្វាយរៀង: នៅព្រឹកថ្ងៃទី ៣១ ខែ មករា ឆ្នាំ ២០២៥ នេះឯកឧត្តម ប៉េង ពោធិ៏សា អភិបាលនៃគណៈអភិបាលខេត្ត ស្វាយរៀង បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីក្រុងពាលីសុំសេចក្តីសុខសេចក្តីចម្រើន បើកការដ្ឋានសាង សង់ តេលានចាក់សំរាមថ្មីលើការងារអនុគម្រោងសាងសង់ទីលានទុកសំរាមសម្រាប់ក្រុងបាវិតនៃគម្រោងទីក្រុងគួរឲ្យចង់រស់នៅស្ថិតនៅភូមិច្រកម្ទេសសង្កាត់ច្រកម្ទេសក្រុងបាវិតខេត្តស្វាយរៀង ។
ពិធីនេះក៏មានការអញ្ជើញចូលរួមពីលោកអភិបាលរងខេត្ត លោក លោកស្រី នាយករដ្ឋបាលសាលាខេត្ត តំណាងទីប្រឹក្សាបច្ចេកទេសទទួលបន្ទុកគម្រោង ADB ប្រធានមន្ទីរបរិស្ថានខេត្ត លោកប្រធានមន្ទីរសាធារណការនិងដឹកជញ្ជូនខេត្តនិងមន្ត្រី PIU ចំណុះសាលាក្រុងបាវិត លោកនាយកទីចាត់ការអន្តរវិស័យសាលាខេត្ត លោកនាយកនាយករងទីចាត់ការរដ្ឋបាលសាលាខេត្ត លោកប្រធានក្រុមប្រឹក្សាក្រុង សមាជិកក្រុមប្រឹក្សាក្រុង ចៅសង្កាត់ទាំង ៥ ក្នុងក្រុងបាវិត កងកម្លាំងប្រដាប់អាវុធទាំង៣ ព្រមទាំងប្រជាពលរដ្ឋជាច្រើនកុះករ។
បើតាមប្រសាសន៍របស់ ឯកឧត្តម ពូ ម៉ានិត អគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការនិងដឹកជញ្ជូននិងជាអនុប្រធានគម្រោងបានឱ្យដឹងថាក្រោមការយកចិត្តទុកដាក់របស់កម្ពុជាបានចុះហត្ថលេខាជាមួយ ADB លើកិច្ចព្រមព្រៀងឥណទាន សម្បទានសម្រាប់គម្រោងនេះនៅថ្ងៃទី ៨ ខែ ធ្នូឆ្នាំ ២០២១ មានចំនួន ១៩៣,២០ លានដុល្លាអាមេរិកក្នុងនោះមានឥណទានសម្បទានពី ADB ចំនួន ១៨០ លានដុល្លារអាមេរិកនិងការចូលរួមជាបដិភាគរបស់រាជរដ្ឋាភិបាលកម្ពុជាចំនួន ១៣.២០ លានដុល្លារអាមេរិកពេលអនុវត្តជាង ០៦ឆ្នាំចូលជាធរមាននៅថ្ងៃ ទី២៤ ខែ កុម្ភៈឆ្នាំ ២០២២ នៅថ្ងៃទី ៣១ ខែ ឧសភា ឆ្នាំ ២០២៨ ទន្ទឹមនេះភ្នាក់ងារប្រតិបត្តិគម្រោងសម្រាប់គំរោងអភិវឌ្ឍន៍ទីក្រុងគួរឲ្យចង់រស់នៅគឺជាក្រសួងសាធារណ:ការនិងដឹកជញ្ជូនដែលត្រូវអនុវត្តអនុគម្រោងចំនួន ០៥ ក្នុងនោះ០២ អនុគម្រោងស្ថិតនៅក្រុងបាវិតនិង០២ អនុគម្រោងទៀតស្ថិតនៅក្រុងប៉ោយប៉ែតនិង០១អនុគម្រោងទៀតនៅក្រុងកំពត។
ឯកឧត្តម ពូ ម៉ានិត បានបន្តទៀតថាទីលានទុកសំរាមដែលគ្រោងនិងសាងសង់នាពេលនេះមានផ្ទៃដីទំហំ ២១ហិចតា គម្រោងនឹងបែងចែកដីប្រើប្រាស់ជាពីផ្នែកធំៗគឺ
ផ្នែកទី ១ សាងសង់រណ្ដៅចាក់សំរាមចំនួន ៥ ដណ្ដៅ និងប្រព័ន្ធគ្រប់គ្រងទឹកកខ្វក់ចេញពីសំណល់។
ផ្នែកទី ២ សាងសង់ប៉ុស្តិ៍សន្តិសុខនិងស្លាកសញ្ញាគម្រោង ធុងស្តុកសំណល់រាវនិងស្ពានថ្លឹងទម្ងន់ និងការិយាល័យផ្លូវចូលទីតាំងគម្រោងនិងផ្លូវក្នុងទីតាំងគម្រោងប្រព័ន្ធលូបង្ហូរអណ្ដូងត្រួតពិនិត្យគុណភាពទឹក កន្លែងចំណត់កន្លែងចែកចាយនិងផ្គត់ផ្គង់អគ្គិសនី អាគាររដ្ឋបាល កន្លែងហូបអាហារនិងកន្លែងសម្រាក កន្លែងញែកសំរាម កន្លែងរៀបចំធ្វើជីកំប៉ូល កន្លែងផលិតហ្គាស ទីកន្លែងបន្ថែមសម្រាប់ទីលានញែកសំរាមកន្លែងសម្អាតរថយន្ត របងនិងសួនច្បារដែលមានដាំដើមឈើជាដើម ។
ឯកឧត្តម ពូ ម៉ានិត បានបន្តថា ការអនុវត្តនៃគម្រោងខាងលើនេះគឺបានចូលរួមលើកកម្ពស់សោភណ្ឌភាពក្រុងបាវិតក្នុងការប្រកួតប្រជែងទីក្រុងស្អាតដោយប្រែក្លាយទីក្រុងទៅជាមជ្ឈមណ្ឌលសេដ្ឋកិច្ចតាមរយៈកែលម្អហេដ្ឋារចនាសម្ព័ន្ធបរិស្ថានក្រុងនិងពង្រឹងសមត្ថភាពស្ថាប័នរបស់អាជ្ញាធរខេត្តនិងមូលដ្ឋាន ។
នៅក្នុងឱកាសនោះដែរ ឯកឧត្តម ប៉េង ពោធិ៏សា អភិបាលនៃគណៈអភិបាលខេត្តស្វាយរៀងបានថ្លែងថាក្រុមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជាដែលមាន សម្ដេចមហាបបវរ ធិបតីហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជាបានគៀងគរអ្នកវិនិយោគមកបណ្ដាក់ទុនរកស៊ីនៅខេត្តស្វាយរៀងដែលបច្ចុប្បន្នមានតំបន់សេដ្ឋកិច្ចពិសេសចំនួន ៩ កន្លែងនិង ៣កន្លែងទៀត កំពុង សាងសង់បន្ថែមនិងរោងចក្រសហគ្រាសជាច្រើនកន្លែងទៀតដែលកំពុងដំណើការនិងផ្ដល់ការងារដល់ប្រជាពលរដ្ឋយើងជិត ១៤ ម៉ឺននាក់។
ឯកឧត្តមអបាលខេត្តបានគូសបញ្ជាក់ថាដោយសារមានតំបន់សេដ្ឋកិច្ចពិសេសនិងរោងចក្រសហគ្រាសជាច្រើនតម្រូវការកម្មករកាន់តែច្រើនផងដែរដូច្នេះចាប់ពីពេលនេះតទៅបងប្អូនប្រជាពលរដ្ឋមិនចាំបាច់ធ្វើដំណើរទៅរោងចក្រចុះឈ្មោះនោះទេគឺអាចចុះឈ្មោះតាមរយៈអាជ្ញាធរភូមិ ឃុំ សង្កាត់ ដើម្បីឲ្យអាជ្ញាធរដាក់សំណើទៅតាមបណ្ដាលរោងចក្រទាំងនោះតែម្ដង។
ជាទីបញ្ចប់ ឯកឧត្តម អភិបាលខេត្តបានផ្តាំផ្ញើអំពាវនាវដល់ប្រជាពលរដ្ឋទាំងអស់ត្រូវគោរពច្បាប់ចរាចរណ៍ឲ្យបានខ្ជាប់ខ្ជួនត្រូវពាក់មួកសមត្ថភាពពេលបើកបរ ប្រើល្បឿនឲ្យសមស្របនិងចូលរួមអប់រំកូនចៅឲ្យជៀសឆ្ងាយពីគ្រឿងញៀនគ្រប់ប្រភេទនិងក្មេងទំនើង ត្រូវចូលរួមថែរក្សាបរិស្ថានឱ្យបានគ្រប់ៗគ្នា ។ រាយការណ៍ដោយលោក មាស សំអឿន.
