ខេត្តកំពង់ឆ្នាំង ៖ នាថ្ងៃពុធ ១០កើត ខែបុស្ស ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី០៨ ខែមករា ឆ្នាំ២០២៥ ខណ្ឌរដ្ឋបាលជលផលកំពង់ឆ្នាំងបានបន្តចុះល្បាត និងបង្ក្រាបបទល្មើសនេសាទ នៅស្រុកចំនួនពីរ គឹស្រុកកំពង់លែង និងស្រុកជលគិរី រហូតឈានដល់បង្ក្រាបបានបទល្មើសចំនួន ០២ ករណី ។
ក្រុមការងាររួមមានខណ្ឌរដ្ឋបាលជលផលកំពង់ឆ្នាំង ផ្នែករដ្ឋបាលជលផលផ្សារឆ្នាំង ផ្នែករដ្ឋបាលជលផលកំពង់ប្រាសាទ សង្កាត់រដ្ឋបាលជលផលកំពង់លែង ដឹកនាំដោយលោក អ៊ូ សោភ័ណ នាយរងខណ្ឌ កំលាំងចូលរួម ១៨នាក់ និងមធ្យោបាយទូកបាឡាស្មាច់៥ គ្រឿង បានចុះប្រតិបត្តិការក្នុងភូមិ សាស្ត្រ ពីរស្រុក គឺស្រុកជលគីរី និងស្រុក កំពង់លែង បានប្រទះឃើញសម្រាស់នៅចំណុចភូមិកោះក្អែក ព្រែកស្តីល្គង ដល់ចំណុចជើងគ្រួស ភូមិដូនវៀត ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។ បន្ទាប់មកក្រុមការងារបានឯកភាពគ្នារុញរើ និងបំផ្លាញឧបករណ៍នេសាទខុសច្បាប់នៅហ្នឹងកន្លែង។
ជាលទ្ធផល ក្រុមការងារបានរុះរើបំផ្លាញចោល-សម្រាស់ចំនួន ០១ ករណី ស្មើនឹង ១៦ កន្លែង ទំហំប្រមាណ ៣២០០ ម៉ែត្រការ៉េ មែកសម្រាស់ចំនួន ៥០០ មែក បង្គោលចំនួន ៨០ ដើម និងខ្សែចំណងប្រវែង ៩៦០ ម៉ែត្រ ៕
