(បន្ទាយមានជ័យ)៖ ដោយមានការចង្អុលបង្ហាញ និងការគាំទ្រយ៉ាងមុតមាំពីលោក កែ គឹមយ៉ាន ប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តបន្ទាយមានជ័យ និងលោក ឌិត ទីណា អនុប្រធានទី១ នៅថ្ងៃទី៧ ខែមករា ដែលជាទិវាអបអរសាទរជ័យជម្នះលើរបបប្រល័យពូជសាសន៍ ប៉ុល ពត, លោក គង់ ច័ន្ទវាសនា ប្រធានក្រុមការងារគណបក្សចុះមូលដ្ឋានស្រុកព្រះនេត្រព្រះ, លោក ងិន ឆាយ អនុប្រធានទី១ និងលោក អន ស៊ុំ សមាជិកព្រឹទ្ធសភា ព្រមទាំងលោក លោកស្រី អនុប្រធាន និងសមាជិកក្រុមការងារ បានរៀបចំពិធីក្រុងពាលីដើម្បីចាប់ផ្តើមការងារសាងសង់ស្នាក់ការគណបក្សប្រជាជនកម្ពុជាស្រុកព្រះនេត្រព្រះ ខេត្តបន្ទាយមានជ័យ។
ក្នុងទំហំជាង៤២០ម៉ែត្រការ៉េ អគារស្នាក់ការថ្មីនេះ នឹងត្រូវសាងសង់លើទីតាំងដីស្នាក់ការគណបក្សបច្ចុប្បន្នដែលមានទទឹងប្រវែង ២២ម៉ែត្រ និងបណ្តោយប្រវែង ៤៥ម៉ែត្រ ស្ថិតនៅតាមបណ្តោយផ្លូវជាតិលេខ៦ ក្នុងទីរួមស្រុកព្រះនេត្រព្រះ ខេត្តបន្ទាយមានជ័យ។
ការសាងសង់នេះគ្រោងចំណាយថវិកាជាង១២ម៉ឺនដុល្លារ ដែលបានមកពីការចូលរួមរបស់ថ្នាក់ដឹកនាំ និងសមាជិកនៃក្រុមការងារគណបក្សគ្រប់លំដាប់ថ្នាក់ ក្នុងមូលដ្ឋានស្រុកព្រះនេត្រព្រះ និងបង្ហាញពីកម្លាំងសាមគ្គីភាពដ៏រឹងមាំ ជុំវិញការដឹកនាំរបស់គណបក្សប្រជាជនកម្ពុជា។
អគារស្នាក់ការថ្មីដែលមានក្បាច់រចនាសាមញ្ញទាន់សម័យនេះ នឹងផ្តល់ជាកន្លែងជួបជុំប្រកបដោយផាសុខភាព សម្រាប់អ្នកចូលរួមប្រមាណជាង៤០០នាក់ ក្រោយបញ្ចប់ការសាងសង់ នៅអំឡុងខែមេសា ឆ្នាំ២០២៥នេះ។
ទន្ទឹមនេះ អគារស្នាក់ការគណបក្សថ្មីនេះបង្ហាញពីការចាក់គ្រឹះយ៉ាងរឹងមាំរបស់គណបក្សប្រជាជនកម្ពុជា និងជាសក្ខីភាពនៃការប្តេជ្ញាចិត្តរបស់ក្រុមការងារចំពោះការគាំទ្រយ៉ាងទូលំទូលាយរបស់សមាជិក គណបក្សនៅទូទាំងស្រុក ព្រះនេត្រព្រះ នាពេលកន្លងមកបច្ចុប្បន្ន និងពេលអនាគត៕
