ខេត្តប៉ៃលិន ៖ លោកជំទាវ បាន ស្រីមុំ អភិបាលខេត្តប៉ៃលិន បានមានប្រសាសន៍ថា បច្ចុប្បន្ន ការងារហ្វឹក ហ្វឺនបានដើរតួនាទីជាយុទ្ធសាស្ត្រយ៉ាងសំខាន់ក្នុងការពង្រឹងខឿនការពារជាតិ តាមរយៈការផ្ដល់នូវចំណេះដឹង និងចំណេះធ្វើពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាប្រភពបន្តវេន ជំនាន់ក្រោយ ដើម្បីចូលរួមថែរក្សាសុខសន្តិភាព មិនអនុញ្ញាតឱ្យជនណា ឬក្រុមណាមកបំផ្លាញបានឡើយ ត្រូវរក្សាសាមគ្គីភាព និងស្មោះត្រង់ជានិច្ចជាមួយប្រមុខរាជរដ្ឋាភិបាល គាំទ្ររាជរដ្ឋាភិបាលគ្រប់ពេលវេលា ព្រោះប្រទេសជាតិមានសន្តិភាពមកដល់ពេលនេះ ដោយការសាមគ្គីភាព ឯកភាពគ្នា និងការស្មោះត្រង់ និងត្រូវពង្រឹងពង្រីកការងារការកសាងធនធានមនុស្ស និងការកសាងអង្គភាពរបស់ខ្លួន ។
លោកជំទាវ បានបន្តថា នាយ-ពលទាហានទាំងអស់ ត្រូវបន្តយកចិត្តទុក្ខដាក់សិក្សារៀនសូត្រការ ងារអប់រំចិត្តសាស្ត្រ បទវិន័យ លក្ខន្តិកៈ កងយោពលខេមរភូមិន្ទ បទដ្ឋានគតិយុត្តិផ្សេងៗដែលជាច្បាប់របស់រដ្ឋ និងខិតខំបន្តស្រាវជ្រាវឯកសារថ្មីៗបន្ថែមទៀត បន្តរក្សាសាមគ្គីភាពឯកភាពផ្ទៃក្នុងល្អជានិច្ច ហើយត្រូវបន្តពង្រឹងជំហរស្មោះត្រង់ដាច់ខាតការពារជាតិ សាសនា ព្រះមហាក្សត្រ បន្តចូលរួមអនុវត្តគោល នយោបាយយុទ្ធសាស្ត្របច្ចុកោណរបស់រាជរដ្ឋាភិបាល។
ឧត្តមសេនីយ៍ឯក ឯក សំអូន មេបញ្ជាការរង កងទ័ពជើងគោក និងជាមេបញ្ជាការយោធភូមិភាគ ទី៥ បានមានប្រសាសន៍ថា ស្ថិតនៅក្នុងពេលប្រទេសមានសុខសន្តិភាព ស្ថិរភាពនយោបាយ ជាឱកាស សម្រាប់កងទ័ពត្រូវខិតខំហ្វឹកហ្វឺន បំប៉ន ពង្រឹងសមត្ថភាព ជំនាញ យុទ្ធវិធី ឱ្យបានស្ទាត់ ដើម្បីធានាបាននូវ កិច្ចការពារជាតិ សាសនា ព្រះមហាក្សត្រ រដ្ឋធម្មនុញ្ញ បូរណភាពទឹកដី ដែលជាកាតព្វកិច្ចរបស់យោធិន គ្រប់រូប ពិសេសយោធិនវ័យក្មេង ជាអ្នកបន្តភារកិច្ចពីរៀមច្បងដែលមានវ័យចាស់។
ឧត្តមសេនីយ៍ឯក បានផ្តាំផ្ញើដល់សិក្ខាកាមទាំងអស់ពេលចូលបម្រើការនៅក្នុងអង្គភាពខ្លួនវិញ គឺ ត្រូវយកចំណេះដឹងដែលទទួលបានពីការសិក្សារៀនសូត្រទៅប្រើប្រាស់ឲ្យចំគោលដៅ និងមានប្រសិទ្ធភាពខ្ពស់ ជាពិសេសត្រូវស្មោះត្រង់ដាច់ខាតចំពោះជាតិ សាសនា ព្រះមហាក្សត្រ ឈរលើមនសិការស្នេហាជាតិ គោរពឱ្យបានម៉ឺងម៉ាត់រាល់តួនាទី និងភារកិច្ចរបស់កងទ័ព ដើម្បីពង្រឹងប្រៀបការពារជាតិ អធិបតេយ្យ បូរណភាពទឹកដី រក្សាឱ្យបានសុខសន្តិភាព និងការអភិវឌ្ឍ ។
ឧត្តមសេនីយ៍ឯក ឯក សំអូន បានកោតសរសើរ និងថ្លែងអំណរគុណចំពោះនាយ-ពលទាហានតំ បន់ប្រតិបត្តិការសឹករងប៉ៃលិនទាំងអស់ ដែលកន្លងមក ក្រៅពីភារកិច្ចស្នូលរបស់កងទ័ព គឺអង្គភាពបានខិតខំប្រឹងប្រែងបំពេញបេសកកម្មជួយប្រជាពលរដ្ឋរងគ្រោះដោយធម្មជាតិផ្សេងៗ ដូចជា ខ្យល់កន្ត្រាក់ ទឹកជំ នន់ និងការងារមនុស្សធម៌យ៉ាងសកម្ម ដោយមិនគិតការនឿយហត់ ឬយប់ថ្ងៃឡើយ ឈរលើភក្តីភាព រវាងកងទ័ព និងប្រជាជន ទីណាមានប្រជាជនជួបលំបាក ទីនោះមានមុខកងទ័ពចុះជួយជានិច្ច ៕
ដោយ សេន ត
