(ខេត្តសៀមរាប៖)ឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប បានថ្លែងអំណរគុណដល់អ្នកសារព័ត៌មានទាំងអស់ ដែលកន្លងមកបានផ្សាយព័ត៌មានប្រកបដោយក្រមសីលធម៌វិជ្ជាជីវៈ និងសហការជាមួយសមត្ថកិច្ចក្នុងការរាយការណ៍ពីបទល្មើសដែលខ្លួនបានដឹង។ ឯកឧត្តមក៏លើកទឹកចិត្ត ឱ្យបន្តសកម្មភាពនេះ ប្រកបដោយភាពប្រុងប្រយ័ត្ន និងការទទួលខុសត្រូវ។
ឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប មានប្រសាសន៍យ៉ាងដូច្នេះ នៅរសៀលថ្ងៃទី១៣ ខែធ្នូ ឆ្នាំ២០២៤ នេះ ក្នុងឱកាស ឯកឧត្ដម អមដោយលោកព្រះរាជអាជ្ញារង ប៉ុក តារា លោកព្រះរាជអាជ្ញារង យិន មុនីរិទ្ធ និងមានការចូលរួមច្រើនពីសំណាក់អ្នកសារព័ត៌មាន រៀបចំធ្វើសន្និសីទសារព័ត៌មាន ជុំវិញករណីឃាតកម្មទៅលើ ឈ្មោះ ឈឿង ឈឹង ជាអ្នកសារព័ត៌មាន នៃអង្គភាពកម្ពុជាអភិវឌ្ឍន៍។
អយ្យការអមសាលាដំបូងខេត្តសៀមរាប រៀបចំសន្និសីទសារព័ត៌មាននេះឡើងក្នុងគោលបំណងបំភ្លឺនូវការពិតនៃរឿងហេតុ និងស្រាយចម្ងល់នានា ឆ្លើយតបទៅនឹងការបញ្ចេញមតិមួយចំនួនប្រាកចាកពីការពិត ក្នុងគោលបំណងទាញយកប្រយោជន៍ណាមួយ និងនាំឱ្យមានការភ័ន្តច្រឡំទៅលើការបញ្ចេញមតិខុសពីការពិតទាំងនោះ។
ឯកឧត្តមព្រះរាជអាជ្ញា បានសម្តែងនូវការសោកស្តាយ និងសូមចូលរួមរំលែកមរណភាព ជូនចំពោះគ្រួសារ នៃសព ឈឿង ឈឹង ដែលបានបាត់បង់សមាជិកគ្រួសារម្នាក់ក្នុងករណីនេះ។ ឯកឧត្តមព្រះរាជអាជ្ញា បានបន្តបកស្រាយអំពីដំណើររឿង ភស្តុតាង និងចំណាត់ការនៅក្នុងរឿងនេះ ចាប់តាំងពីកើតហេតុភ្លាម រហូតឈានដល់ការកំណត់បានមុខសញ្ញា និងឃាត់ខ្លួនបានជនល្មើសឈ្មោះ ស៊ី លឿយ យកមកចោទប្រកាន់តាមនីតិវិធី។
ឆ្លៀតក្នុងឪកាសនេះ ឯកឧត្តម ក៏បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមត្ថកិច្ចនគរបាលខេត្តសៀមរាប ដែលបានសហការគ្នាយ៉ាងល្អ ក្រោមការសម្របសម្រួលរបស់តំណាងអយ្យការ ក្នុងការកំណត់អត្តសញ្ញាណជនល្មើស និងតាមចាប់ខ្លួនជនល្មើសបានឱ្យមកទទួលខុសត្រូវចំពោះមុខច្បាប់។
ឯកឧត្តម ព្រះរាជអាជ្ញាបានសង្កត់ធ្ងន់ អំពីការប្រកាន់ជំហររបស់អយ្យការក្នុងការអនុវត្តច្បាប់ និងឃ្លាំមើលការអនុវត្តច្បាប់ឱ្យបានម៉ឺងម៉ាត់ និងអនុវត្តសិទ្ធិដែលច្បាប់ផ្តល់ឱ្យ ទោះបីជាការសម្លាប់នេះក្រោមហេតុផលនៃទំនាស់ផលប្រយោជន៍បុគ្គលក៏ដោយ ដើម្បីធានាឱ្យបានថាជនល្មើសខាងលើ ត្រូវទទួលខុសត្រូវឱ្យសមរម្យទៅនឹងអំពើ និងព្យសនកម្មដែលគាត់បានប្រព្រឹត្ត៕
