ខេត្តបាត់ដំបង,ស្រុកសំពៅលូន ៖ ដើម្បីភូមិឃុំមានសុវត្ថិភាពក្នុងមូលដ្ឋានលោកវរសេនីយ៍ទោ ទឹម វិឆ័យ អធិការ នៃអធិការដ្ឋាននគរបាលស្រុកសំពៅលូន នៅថ្ងៃទី០៤ ខែធ្នូ ឆ្នាំ២០២៤ វេលាម៉ោងប្រហែល ១៦ និង ១០ នាទី នៅចំណុចក្រុមទី០១ ភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង មានករណី អំពើលួច (ផ្លែស្វាយ និងត្រយ៉ូងចេក ) ដោយជនសង្ស័យឈ្មោះ ង៉ោល យ៉ែម ភេទប្រុស អាយុ ២៨ ឆ្នាំ មានទីលំនៅ ភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង បានធ្វើសកម្មភាពលួចផ្លែស្វាយ និងត្រយ៉ូងចេក របស់ជនរងគ្រោះឈ្មោះ អាន ចាន់ ភេទប្រុស អាយុ ៣៦ ឆ្នាំ មានទីលំនៅបច្ចុប្បន្ន ភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង មុខរបរ ធ្វើចំការ នៅចំណុចចំការកន្លែងកើតហេតុខាងលើ ។ ក្នុងពេលធ្វើសកម្មភាព ក៏ត្រូវជនរងគ្រោះឃើញទាន់ និងបានប្តឹងរាយការណ៍មកកម្លាំងសមត្ថកិច្ច ភ្លាមៗកម្លាំងសមត្ថកិច្ចជំនាញ នៃអធិការដ្ឋាននគរបាលស្រុកសំពៅលូន បានសហការជាមួយកម្លាំងប៉ុស្តិ៍នគរបាលរដ្ឋបាលតាស្តា ចុះទៅដល់ទីកន្លែងកើតហេតុ និងបានធ្វើការឃាត់ខ្លួនជនសង្ស័យឈ្មោះ ង៉ោល យ៉ែម ភេទប្រុស អាយុ ២៨ ឆ្នាំ មានទីលំនៅ ភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ។
សមត្ថកិច្ចបាន ដកហូតនូវវត្ថុតាងមានដូចជា ៖ ផ្លែស្វាយចំនួន មួយការ៉ុង ស្មើនឹង ១៣៥ គីឡូក្រាម , ត្រយ៉ូងចេកចំនួនកន្លះការ៉ុង ស្មើនឹង ១៦ត្រយ៉ូង, កាំបិតចំនួន០១ , ម៉ូតូចំនួន ០១ គ្រឿង ម៉ាកហុងដាឌ្រីម សេរីឆ្នាំ២០២០ ផ្លាកលេខ 1AJ-6951 បាត់ដំបង , ដែកកេះសម្រាប់ជក់គ្រឿងញៀន ចំនួន០១ , និងសម្ភារៈសម្រាប់ជក់គ្រឿងញៀនមួយចំនួន នាំមកកាន់អធិការដ្ឋាននគរបាលស្រុកសំពៅលូន ដើម្បីកសាងសំណុំរឿង បញ្ជូនទៅការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធី ៕
