ខេត្តសៀមរាប ៖ ជនសង្ស័យប៉ុនប៉ងមនុស្សឃាតដោយចេតនា ឈ្មោះ ស៊ី លឿយ ត្រូវបានកម្លាំងសមត្ថកិច្ចនគរបាលខេត្តសៀមរាបចាប់ឃាត់ខ្លួន ពីបទ ប៉ុនប៉ងមនុស្សឃាត ដោយចេតនា ដោយប្រើប្រាស់អាវុធកែច្នៃបាញ់ ទៅលើជនរងគ្រោះ ជាអ្នកព័ត៌មាន ខណៈជនរងគ្រោះចុះទៅយកព័ត៌មានករណីឈូសឆាយដីព្រៃ បណ្តាលអោយរងគ្រោះរងរបួសជាទម្ងន់ ។
បន្ទាប់ពីទទួលបានពាក្យបណ្តឹងរបស់ជនរងគ្រោះ កម្លាំងនគរបាលខេត្តសៀមរាប ក្រោមបញ្ជាផ្ទាល់របស់លោកឧត្តមសេនីយ៍ទោហួត សុធី ស្នងការនគរបាលខេត្តសៀមរាប ដោយមានការសម្របសម្រួលតាមនីតិវិធី បានចុះបញ្ជាការចាប់ខ្លួនជនសង្ស័យបានភ្លាមៗ នាថ្ងៃទី 5 ខែធ្នូ ឆ្នាំ 2024 នេះ ។
ជនសង្ស័យ ឈ្មោះ ស៊ី លឿយ ភេទប្រុស អាយុ 40 ឆ្នាំ ទីលំនៅ ភូមិសាលា ឃុំគោកធ្លកលើ ស្រុកជីក្រែង ខេត្តសៀមរាប ។ សមត្ថកិច្ចក៏បានរឹបអូសមកជាមួយនូវវត្ថុតាងអាវុធកែច្នៃផងដែរ ។
ចំណែកជនរងគ្រោះ ឈ្មោះ ឈឿង ឈឹង ជាអ្នកសារព័ត៌មាន របស់អង្គភាពកម្ពុជាអភិវឌ្ឍន៍ ។
ហេតុការណ៍បាញ់ប្រហារបានកើតឡើង នៅភូមិត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប នៅវេលាម៉ោង១៨ និង ០០នាទីថ្ងៃទី ០៤ ខែធ្នូ ឆ្នាំ២០២៤ ខណៈពេលដែលជនរងគ្រោះ បានចុះទៅអង្កេតសកម្មផាពឈូសឆាយដីព្រៃមួយកន្លែង នៅភូមិខាងលើ ។
ខណៈពេលជនរងគ្រោះចុះទៅដល់ទីតាំងកើតហេតុភ្លាម ក៏ស្រាប់តែជនសង្ស័យ ស៊ី លឿយ បានបាញ់ប្រើប្រាស់កាំភ្លើងកែច្នៃ បាញ់ប្រហារទៅលើជនរងគ្រោះ លោក ឈឿង ឈឹង តែម្តង បណ្តាលរងគ្រោះជាទម្ងន់ ដោយគ្រាប់បៀមក្នុងសាច់ ។
ខណៈពេលនេះ ជនរងគ្រោះកំពុងសំរាកព្យាបាល នៅមន្នីរពេទ្យ ។ ចំណែកជនសង្ស័យ ដែលសមត្ថកិច្ចឃាត់ខ្លួន កំពុងចាត់ការតាមនីតិវិធី ៕
