ខេត្តកំពង់ឆ្នាំង ៖ ថ្ងៃព្រហស្បតិ៍ ៥កើត ខែ មិគសិរ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី៥ ខែធ្នូ ឆ្នាំ២០២៤ ខណ្ឌរដ្ឋបាលជលផលកំពង់ឆ្នាំង បានបន្តសកម្មភាពការងារចុះប្រតិបត្តិការ និងបង្ក្រាបបទល្មើសនេសាទខុសច្បាប់ នៅក្នុងដែននេសាទ ចំណុច ព្រែក ប្រចាន់ ភូមិ ព្រៃគ្រីជើង និង ចំណុច ដាអំបិល ភូមិ កោះធំ ឃុំ ព្រៃគ្រី ស្រុកជលគិរី ខេត្តកំពង់ឆ្នាំង ។
ក្នុងសកម្មភាពល្បាតនេះ ខណ្ឌរដ្ឋបាលជលផលកំពង់ឆ្នាំង ផ្នែករដ្ឋបាលជលផលកំពង់ប្រាសាទ សង្កាត់រដ្ឋបាលជលផលជលគីរី សហការជាមួយគណៈបញ្ជាការឯកភាពរដ្ឋបាលស្រុកជលគិរី កម្លាំងចូលរួមសរុបចំនួន ២៤នាក់ និងមធ្យោបាយបាឡាស្មាច់ ០៧ គ្រឿង បានចុះបង្ក្រាបបទល្មើសជលផលរបាំងលូស្បៃមុង ស្ថិតនៅក្នុងដែននេសាទ ចំណុច ព្រែក ប្រចាន់ ភូមិ ព្រៃគ្រីជើង និង ចំណុច ដាអំបិល ភូមិ កោះធំ ឃុំ ព្រៃគ្រី ស្រុកជលគិរី ខេត្ត កំពង់ឆ្នាំង ។ បន្ទាប់មកបានឯកភាពគ្នារុះរើបំផ្លាញចោលឧបករណ៍នេសាទខុសច្បាប់នៅនឹងកន្លែង។
ជាលទ្ធផល កម្លាំងចម្រុះបំផ្លាញចោលឧបករណ៍នេសាទរបាំងស្បៃមុង ចំនួន ០១ ករណី ចំនួន ១០ កន្លែង ប្រវែង ៥០០ម លូស្បៃមុង ចំនួន ១០ គ្រឿង បង្គោលចំនួន ៣០០ ដើម និងចាក់លែងកូនត្រីចំរុះចំនួន ៦០ គីឡូក្រាម ចូលដែននេសាទវិញ ៕
