(ពោធិ៍សាត់)៖ បន្ទាប់ពីបានដំណើរការ រយៈពេលមួយថ្ងៃកន្លះនៃវេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីសម្រេចបានចក្ខុវិស័យកម្ពុជា ឆ្នាំ២០៥០ បានផ្ដល់ឱកាសដល់មន្ទីរអង្គភាព រដ្ឋបាលក្រុង/ស្រុក ឃុំ/សង្កាត់ អង្គការសង្គមស៊ីវិល សមាគម ដៃគូរអភិវឌ្ឍន៍ និងអ្នកពាក់ព័ន្ធនានា បានចូលរួមសន្ទនាគ្នា ដើម្បីផ្ដល់នូវព័ត៌មានត្រឡប់ និងសម្ដែងនូវបញ្ហាប្រឈម សំណូមពរ ក្ដីកង្វល់ និងតម្រូវការចាំបាច់ជាអាទិភាពនានា សរុបចំនួន៤៤ករណី។
សម្រាប់ពិធីបិទវេទិកានេះ ត្រូវបានធ្វើឡើង នាព្រឹកថ្ងៃទី២១ ខែវិច្ឆិកា ឆ្នាំ២០២៤ នៅសាលប្រជុំថ្មីរដ្ឋបាលខេត្ត ក្រោមអធិបតីភាព លោក ខូយ រីដា អភិបាលនៃគណៈអភិបាលខេត្តពោធិ៍សាត់ និងលោក ម៉ក់ រ៉ា ប្រធានក្រុមប្រឹក្សាខេត្ត។
មានប្រសាសន៍ក្នុងពិធីបិទវេទិកា លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានលើកឡើងថា ដើម្បីចូលរួមក្នុងវេទិការ វាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីសម្រេចបានចក្ខុវិស័យកម្ពុជា ឆ្នាំ២០៥០ ពិតជាមានសារៈសំខាន់ ដែលជាការឆ្លុះបញ្ចាំងឱ្យឃើញកាន់តែច្បាស់ ពីសុឆន្ទៈ មនសិការ និងស្មារតីទទួលខុសត្រូវ ក្នុងការចូលរួមចំណែកអនុវត្តនូវកម្មវិធីនយោបាយ របស់រាជរដ្ឋាភិបាល ក្រោមការដឹកនាំដ៏ឈ្លាសវៃ ប៉ិនប្រសព្វ និងប្រកបដោយគតិបណ្ឌិត របស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។
លោកបន្តថា វេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ សម្រាប់ឆ្នាំ២០២៤នេះ បានបង្ហាញពីការយល់ដឹងស៊ីជម្រៅ អំពីដំណើរការនឹងសារៈសំខាន់ នៃការងារកំណែទម្រង់វិមជ្ឈការ និងវិសហមជ្ឈការ នៅថ្នាក់ក្រោមជាតិរបស់រដ្ឋបាលឃុំ/សង្កាត់ ក្រុង/ស្រុក មន្ទីរអង្គភាពនានាជុំវិញខេត្ត និងអង្គការសង្គមស៊ីវិល។ តាមរយៈការឆ្លុះបញ្ចាំង អំពីបញ្ហាប្រឈមក្នុងការអនុវត្តមុខងារកំណែទម្រង់វិមជ្ឈការ និងវិសហមជ្ឈការ ដែលរដ្ឋបាលខេត្តទទួលបានរបាយការណ៍ ពីរដ្ឋបាលក្រុង/ស្រុក ឃុំ/សង្កាត់ និងបញ្ហាប្រឈមដែលរដ្ឋបាលខេត្តជួបប្រទះកន្លងមក គឺមានចំនួន៤៤ករណី។
លោកអភិបាលខេត្ត បានបន្ថែមថា វេទិកាថ្នាក់ខេត្ត ដែលបានប្រព្រឹត្តទៅ រយៈពេលមួយថ្ងៃកន្លះ ពិតជាបានផ្ដល់ឱកាសដល់មន្ទីរអង្គភាព រដ្ឋបាលក្រុង/ស្រុក ឃុំ/សង្កាត់ អង្គការសង្គមស៊ីវិល សមាគម ដៃគូរអភិវឌ្ឍន៍ និងអ្នកពាក់ព័ន្ធនានា បានចូលរួមសន្ទនាគ្នា ដើម្បីផ្ដល់នូវព័ត៌មានត្រឡប់ និងសម្ដែងនូវ បញ្ហាប្រឈម សំណូមពរ ក្ដីកង្វល់ និងតម្រូវការចាំបាច់ជាអាទិភាពនានា បាននឹងកំពុងជួបប្រទះ ក្នុងការអនុវត្តកំណែទម្រង់វិមជ្ឈការ និងវិសហមជ្ឈការ ដែលនេះបានបង្ហាញយ៉ាងពិត ប្រាកដ ពីការអនុវត្តនូវលទ្ធិប្រជាធិបតេយ្យ នៅថ្នាក់ក្រោមជាតិ រួមជាមួយឆន្ទៈពីគ្រប់តួអង្គ នៃរដ្ឋបាលថ្នាក់ក្រោមជាតិរបស់រដ្ឋបាលខេត្ត ក្នុងការអនុវត្តកំណែទម្រង់តាមចក្ខុវិស័យ របស់រាជរដ្ឋាភិបាលកម្ពុជា ដូចប្រសាសន៍ដ៏ខ្ពង់ខ្ពស់ របស់សម្តេចបវរធិបតី នាយករដ្ឋមន្រ្តី បានលើកឡើងថា (គ្មានការធ្វើកំណែទម្រង់ណាមួយដែលងាយស្រួលនោះទេ)។
នៅក្នុងវេទិកាថ្នាក់ខេត្តនេះ លោកអភិបាលខេត្ត ខូយ រីដា បានធ្វើការសម្របសម្រួលឆ្លើយបត នូវបញ្ហាប្រឈម និងសំណើ ក៏ដូចជាសំណូមពរ ដែលរដ្ឋបាលឃុំ/សង្កាត់ ក្រុង/ស្រុក មន្ទីរអង្គភាពនានាជុំវិញខេត្ត និងអង្គការសង្គមស៊ីវិល បានលើកឡើង នៅក្នុងអង្គវេទិកាផងដែរ៕
