ខេត្តតាកែវ,ស្រុកបាទី ៖ យោងតាមប្រភពពីប្រជាពលរដ្ឋ នៅជិតកន្លែងកើតហេតុបានឲ្យដឹងថា ព្រលឹមស្រាងស្រាង វេលាម៉ោង ៥ : ៥០នាទីព្រឹក ត្រូវនឹងថ្ងៃទី១៩ ខែវិច្ឆិកា ឆ្នាំ២០២៤ ពួកគាត់បានប្រទះឃើញ ក្មេងស្រីអង្គុយអង្រួន សពស្ត្រីម្នាក់ និងម៉ូតូមួយគ្រឿង ដែលគួរឱ្យអាណិតជាពន់ពេក សង្ស័យគេយកមកផ្លុងចោល នៅចំណុច កំពតព្រៃ ក្បែរផ្លូវ ស្ថិតនៅភូមិម្រះព្រៅ ឃុំចំបក់ ស្រុកបាទី ខេត្តតាកែវ។
ក្រោយពេលឃើញហេតុការណ៍ បែបនេះ ពួកគាត់បាននាំគ្នាផ្អើលឆោឡោ ប្ដឹងដល់សមត្ថកិច្ច ដើម្បីឲ្យមកពិនិត្យកន្លែងកើតហេតុ ក្រោយពេលទទួលបានពាក្យបណ្ដឹង សមត្ថកិច្ចស្រុកបាទី ជំនាញព្រហ្មទណ្ឌ បានសហការជាមួយ សមត្ថកិច្ចជំនាញកោសលវិច្ច័យ នៃស្នងការដ្ឋាននគរបាលខេត្តតាកែវ បានចុះមកពិនិត្យ និងធ្វើកោសលវិច្ច័យ ពេទ្យជំនាញ និងសមត្ថកិច្ចជំនាញបានឲ្យដឹងថា សពស្ត្រីម្នាក់នេះ ពិតជាករណីឃាតកម្ម ដោយប្រតិកម្មទៅលើការប្រើថ្នាំ ហួសកម្រិត ក្រោយពិនិត្យនិងធ្វើកោសលវិច្ច័យចប់ សមត្ថកិច្ចជំនាញ បានប្រគល់សព ឲ្យទៅគ្រួសារសព ដែល រស់នៅ ភូមិ ទឹកថ្លា ឃុំ ត្រពាំងក្រសាំង ស្រុកបាទី ខេត្តតាកែវ ដើម្បីយកទៅធ្វើបុណ្យតាមប្រពៃណី.។
ប្រភពបន្ត ដែលត្រូវជា ប្ដីសព មានឈ្មោះ សៅ ផាន អាយុ៤៥ឆ្នាំ គាត់បានរៀបរាប់ទាំងអួលដើមកថា ប្រពន្ធគាត់មានឈ្មោះ ណាំ ចន្ធូ ភេទស្រី អាយុ៤១ឆ្នាំ មុនពេលបាត់ខ្លួន គាត់មានជំងឺ ចេះតែអស់កម្លាំង បានទៅ ពិគ្រោះជំងឺ នៅមន្ទីរសម្រាកព្យាបាល និងសម្ភព សុង ហាក់ ម៉ារីណា ដែល ស្ថិតនៅ ភូមិពញ្ញាគុក ឃុំត្រពាំងក្រសាំង ស្រុកបាទី ខេត្តតាកែវ នៅភូមិក្បែរគ្នា គាត់បានទៅចាក់ថ្នាំ ចំនួនបីដង លើកទី០១ អត់អីទេ ក៏ត្រឡប់មកផ្ទះវិញ ថ្ងៃទី ០២ ក៏អត់អីដែរ ក៏ត្រឡប់មកផ្ទះវិញ លុះដល់ថ្ងៃទី ០៣ ដែលត្រូវនឹងថ្ងៃទី១៨ ខែវិច្ឆិកា ឆ្នាំ២០២៤នេះ គាត់បានចេញពីផ្ទះ ដោយជិះម៉ូតូ យកក្មួយស្រី ឈ្មោះ ណូន សៀវវ៉ាន អាយុ៣ឆ្នាំ ទៅជាមួយ ចេញទៅតាំងពីម៉ោង ៦ល្ងាច រហូត បាត់ដំណឹងឈឹង គាត់បានដើរ រកប្រពន្ធ និងក្មួយស្រី ប៉ុន្តែរកមិនឃើញសោះ រហូតដល់ភ្លឺឡើង បានឮដំណឹងថា មានសព្វស្ត្រីម្នាក់ និងក្មេងស្រីម្នាក់ ត្រូវបានគេប្រទះឃើញ នៅចំណុច កំពតព្រៃ ក្បែរផ្លូវ ស្ថិតនៅភូមិម្រះព្រៅ ឃុំចំបក់ ស្រុកបាទី ខេត្តតាកែវ. គាត់ក៏បាននាំសាច់ញាតិ ទៅមើល ក៏ឃើញពិតជាសពរបស់ប្រពន្ធ គាត់ពិតប្រាកដមែន ហើយក្មួយស្រី នៅអង្គុយបង្រួនសពអ៊ំស្រី ពិតជាគួរឱ្យអាណោចអាធ័ម មែនទែន។
ជុំវិញករណីខាងលើនេះដែរ សមត្ថកិច្ចជំនាញ នៃស្នងការដ្ឋាននគរបាលខេត្តតាកែវ បានពិនិត្យនិងធ្វើកោសលវិច័យ ឃើញថាសពស្ត្រីខាងលើ ពិតជាករណីឃាតកម្ម និងព្រឹត្តិកម្មថ្នាំ ដោយប្រើថ្នាំហួសកម្រិតពិតប្រាកដមែន។
ចំណែកខាងជំនាញ មន្ទីរសុខាភិបាល ខេត្តតាកែវ បានឱ្យដឹងថា ក្រោយការសួរនាំ ទៅលើម្ចាស់ មន្ទីរសម្រាកព្យាបាល និង សម្ភព សុង ហាក់ ម៉ារីណា បានឱ្យដឹងថា សពស្ត្រី ឈ្មោះ ណាំ ចន្ធូ ពិតជាបានមកសម្រាកព្យាបាល ពិតប្រាកដមែន។
ក្រោយពេលសួរនាំចប់ ម្ចាស់មន្ទីរសម្រាកព្យាបាល និងសម្ភព សុង ហាក់ ម៉ារីណា ទាំង២នាក់ ត្រូវបានសមត្ថកិច្ចជំនាញ នៃស្នងការដ្ឋាននគរបាលខេត្តតាកែវ ក្រោមការសម្របសម្រួល របស់ឯកឧត្តម ឯកឆេងហួត ព្រះរាជអាជ្ញា អមសាលាដំបូងខេត្តតាកែវ បាននាំខ្លួន យកទៅសួរនាំ ទៅតាមនីតិវិធីច្បាប់. ចំណែកឯសពស្ត្រីរងគ្រោះ ត្រូវបានបញ្ជូន ឱ្យទៅសាច់ញាតិ យកទៅធ្វើបុណ្យ តាមប្រពៃណីផងដែរ ៕
