ក្រសួងកសិកម្មដឹកនាំបង្ក្រាប បទល្មើសជលផល ក្នុងភូមិសាស្រ្តក្រុងសៀមរាប
ខេត្តសៀមរាប៖អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ លោកអនុរដ្ឋលេខាធិការ ប៉ែន ផល្លីកា បានដឹកនាំកម្លាំងចម្រុះ ចុះត្រួតពិនិត្យ ទប់ស្កាត់ និងបង្រ្កាបបទល្មើសជលផល ក្នុងភូមិសាស្រ្តក្រុងសៀមរាប។
ការបង្ក្រាបធ្វើឡើង នៅថ្ងៃទី១៩ ខែកញ្ញា ឆ្នាំ២០២៤ ដោយចូលរួមក្នុងប្រតិបត្តិការនេះរួមមាន លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ហៃ យុង អភិបាលរងក្រុងសៀមរាប លោក ធិននី សុទ្ធី នាយខណ្ឌរដ្ឋបាលជលផលសៀមរាប មន្រ្តីបរិស្ថានប្រចាំស្នាក់ការចុងឃ្នៀស តំណាងមន្ទីរបរិស្ថានខេត្តសៀមរាប និងកំលាំងសហគមន៍នេសាទចុងឃ្នៀស។
ជាលទ្ធផលនៃការបង្រ្កាប បានចំនួន ២ករណី ក្នុងនោះ ករណីទី១ បានរុះរើ និងបំផ្លាញចោលនៅនឹងកន្លែងនូវឧបករណ៍នេសាទរបាំងសាច់អួនក្រឡាតូចជាង៣សង់ទីម៉ែត្រ ចំនួន១១ របាំង សាច់អួនប្រវែង១ ៦០០ម៉ែត្រ ក្បាលលបចំនួន ១១គ្រឿង បង្គោលចំរឹងចំនួន ៧០០ដើម និងករណីទី២ បានរុះរើនិងបំផ្លាញចោលឧបករណ៍នេសាទស្បៃមុងចំនួន ៦របាំង លូស្បៃមុងចំនួន ៦គ្រឿង សាច់ស្បៃមុងប្រវែង ៤០០ម៉ែត្រ ចំរឹងចំនួន ១៥០ដើម និងបានចាក់លែងកូនត្រីចម្រុះចំនួន៣០គីឡូក្រាម៕SRP
