នេះជាការថ្លែងរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញដឹកនាំកិច្ចប្រជុំការងារអគ្គនាយកដ្ឋានរដ្ឋបាលនិងហិរញ្ញវត្ថុ នៃក្រសួងព័ត៌មាន ថ្ងៃទី១៧ ខែកក្កដា ឆ្នាំ២០២៤ នាសាលប្រជុំព្រះវិហារ ទីស្តីការក្រសួងព័ត៌មាន។

  ឯកឧត្តម រដ្ឋមន្ត្រី នេត្រ ភក្ត្រា បានគូសបញ្ជាក់ថា ក្រោយពី ឯកឧត្តម លី វ៉ាន់ហុង អគ្គនាយករដ្ឋបាល និងហិរញ្ញវត្ថុ នៃក្រសួងព័ត៌មាន ដែលទទួលមរណភាព កាលពីថ្ងៃទី១០ ខែកក្កដា ឆ្នាំ២០២៤ វេលាម៉ោង ១១:៣០ នាទីព្រឹក ក្នុងជន្មាយុ ៥៩ឆ្នាំ ដោយរោគាពាធ កន្លងទៅនេះ គឺក្រសួងសម្រចប្រគល់ភារកិច្ចអោយ លោក ខឹម បូរ៉ាណា អគ្គនាយករង ជាអគ្គនាយកស្តីទី នៃអគ្គនាយកដ្ឋានរដ្ឋបាល និងហិរញ្ញវត្ថុ រហូតដល់មានការតែងតាំងថ្មី ដើម្បីធានាដំណើរការជាប្រក្រតីភាពនៅក្នុងការងាររបស់អគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងព័ត៌មាន ។

   ដូច្នេះហើយ ឯកឧត្តម រដ្ឋមន្ត្រី ស្នើដល់គ្រប់អគ្គនាយកដ្ឋានចំណុះអោយក្រសួងព័ត៌មាន សហការជាមួយ អគ្គនាយកស្តីទី ដើម្បីអោយរាល់ដំណើរការងារប្រព្រឹត្តទៅដោយរលូន ដែលកិច្ចការងាររដ្ឋបាល និងហិរញ្ញវត្ថុគឺជាចំណុចសំខាន់នៅក្នុងក្របខណ្ឌក្រសួងព័ត៌មាន ។

  ទាក់ទងការគ្រប់គ្រងធនធានមនុស្ស ឯកឧត្តម បានជម្រុញដល់នាយកដ្ឋានបុគ្គលិក ត្រូវពិនិត្យឡើងវិញនូវកិច្ចការងារសំខាន់ៗចំពោះមុខដែលត្រូវធ្វើ ក្នុងនោះការជូនដំណឹងដល់បងប្អូនមន្ត្រីរាជការនៃក្រសួងព័ត៌មានទាំងអស់គ្នា សូមត្រៀមលក្ខណៈរៀបចំឯកសារពាក់ព័ន្ធដើម្បីស្នើសុំដំឡើងថ្នាក់ ឋានន្តរស័ក្តិតាមកម្រិតសញ្ញាបត្រដែលមាន ។ ជម្រុញដល់ដំណើរការងារបណ្តុះបណ្តាលវិជ្ជាជីវៈ ជំនាញ ផ្សេងៗអោយស្របតាមតូនាទីភារកិច្ចការងារដែលបានអនុវត្តន៍ ។

   ឆ្លៀតក្នុងឱកាសនេះដែរ ឯកឧត្តម នេត្រ ភក្ត្រា ស្នើដល់ថ្នាក់ដឹកនាំ មន្ត្រីរាជការនៃក្រសួងព័ត៌មានទាំងអស់ បន្តគោរពស្រលាញ់គ្នា រួបរួមសាមគ្គីផ្ទៃក្នុងអោយបានរឹងមាំ ឈរលើទិសដៅតែមួយដើម្បីធ្វើយ៉ាងណាអោយក្រសួងព័ត៌មានដំណើរការទៅមុខអោយបានល្អប្រសើរបន្ថែមទៀត ពិសេសពង្រឹងសមត្ថភាពចំណេះដឹងព្រោះថាការតែងតាំងតូនាទីភារកិច្ចថ្មីត្រូវឈរលើមូលដ្ឋាន គុណាធិបតេយ្យ ដើម្បីពង្រឹងប្រសិទ្ធភាពស្ថាប័ន ពង្រឹងសមត្ថភាពមន្ត្រី គុណភាពការងារ និងការបណ្តុះបណ្តាលធនធានមនុស្ស និងការធ្វើទំនើបកម្មស្ថាប័ន ៕