ការស្នើសុំគាំទ្រ និងមតិយោបល់សម្រាប់កម្មវិធីប្រកួតប្រជែងវីដេអូអំពី “គម្រោងព្រែកជីកហ្វូណនតេជោ” ធ្វើឡើងក្នុងឱកាស លោក Tommy នាយកគ្រប់គ្រងនៃសារព័ត៌មាន INNEWS និងជាអគ្គនាយកក្រុមហ៊ុន Liberty Group ចូលជួបសំដែងការគួរសមជាមួយ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន នៅរសៀលថ្ងៃទី១៧ ខែកក្កដា ឆ្នាំ២០២៤ នាទីស្តីការក្រសួងព័ត៌មាន ។
លោកនាយកសារព័ត៌មាន INNEWS បានជម្រាបជូនថា ប្រកួតប្រជែងវីដេអូអំពី “គម្រោងព្រែកជីកហ្វូណនតេជោ” ធ្វើឡើងក្នុងគោល បំណងកៀងគរប្រជាជនទូទាំងប្រទេសឱ្យគាំទ្រ គម្រោងព្រែកជីកនេះ ដើម្បីបង្ហាញពីសារៈសំខាន់ដ៏ធំធេងរបស់គម្រោងប្រទេសកម្ពុជា និងដើម្បីលើកកម្ពស់ស្មារតីនៃឯកភាពជាតិ។
ប្រធានបទនៃការប្រកួតប្រជែងគឺ “ការធ្វើដំណើរលើផ្លូវទឹកជាមួយគ្នា៖ ព្រែកជីកហ្វូណនរបស់ខ្ញុំ”
បេក្ខជនត្រូវផលិតស្នាដៃផ្ទាល់ខ្លួន ដោយផ្តោតលើគម្រោងព្រែកជីកហ្វូណនតេជោ ផ្អែកលើសារៈសំខាន់ និងឥទ្ធិពលវិជ្ជមានរបស់ប្រទេសកម្ពុជា ដើម្បីបង្ហាញពីសារៈសំខាន់ជាក់ស្តែង និងតម្លៃវប្បធម៌របស់គម្រោងព្រែកជីកហ្វូណនតេជោ។
លក្ខខណ្ឌនៃការចូលរួមការប្រកួតប្រជែងផលិតវីដេអូ បេក្ខជនត្រូវបញ្ជូនវីដេអូខ្លីរយៈពេល 3-5 នាទី ជាវីដេអូដែលខ្លួនបានផលិត មិនកំណត់ភាសា ប៉ុន្តែតម្រូវឲ្យមាន សាប់ថាយថល (Subtitles) ជាភាសាខ្មែរ ឬភាសាអង់គ្លេស។
រយៈពេលនៃការចុះឈ្មោះចាប់ពីថ្ងៃទី២៤ ខែកក្កដា ដល់ថ្ងៃទី១០ ខែសីហា, ផុតកំណត់ទទួលស្នាដៃដែលបានផលិតថ្ងៃទី១០ ខែកញ្ញា ប្រកាសអ្នកឈ្នះថ្ងៃទី២២ ខែកញ្ញា និងពិធីប្រគល់រង្វាន់ថ្ងៃទី២៤ ខែកញ្ញា ឆ្នាំ២០២៤ ។
ជ័យលាភីលេខ ១ ចំនួន ១ ០០០ដុល្លា , លេខ ២ ចំនួន ៨០០ដុល្លា និងលេខ ៣ ចំនួន ៥០០ដុល្លា ។
ឯកឧត្តម រដ្ឋមន្ត្រី នេត្រ ភក្ត្រា បានសំដែងនូវការគាំទ្រចំពោះគម្រោងរៀបចំកម្មវិធីប្រកួតប្រជែងវីដេអូអំពី “គម្រោងព្រែកជីកហ្វូណនតេជោ”
ហើយក្រសួងព័ត៌មានត្រៀមខ្លួនធ្វើកិច្ចសហការជាមួយ សារព័ត៌មាន INNEWS ដើម្បីផ្សព្វផ្សាយពីកម្មវិធីនៃការប្រកួតនេះអោយបានទូលំទូលាយដល់អ្នកសារព័ត៌មានអោយចូលរួមសរសេរអត្ថបទអោយបានច្រើន និងផលិតវីដេអូ ទាក់ទង “គម្រោងព្រែកជីកហ្វូណនតេជោ” ដែលមានសារៈសំខាន់សម្រាប់ប្រទេសកម្ពុជា ។
ក្រៅពីកម្មវិធីប្រកួតប្រជែងផលិតជាវីដេអូ “គម្រោងព្រែកជីកហ្វូណនតេជោ” ឯកឧត្តម នេត្រ ភក្ត្រា ស្នើដល់សារព័ត៌មាន INNEWS ពិនិត្យលទ្ធភាព និងរកអ្នកឧបត្តម្ភ សម្រាប់ការ ប្រកួតជាការសរសរអត្ថបទសើបអង្កេតវែង ជាភាសាខ្មែរ និងភាសាអង់គ្លេស ហើយជ្រើសរើសយកអត្ថបទណាដែលល្អ មានគុណភាពជាងគេដែលនិយាយពីសារៈប្រយោជន៍ព្រែកជីហ្វូណនតេជោ រួមទាំងការប្រកួតរូបថត ស្អាតៗ ដើម្បីទទួលបានប្រាក់រង្វាន់ផងដែរ ។
នៅក្នុងឱកាសនេះដែរ ឯកឧត្តម រដ្ឋមន្ត្រី នេត្រ ភក្ត្រា ចាត់ទុកសារព័ត៌មាន INNEWS បានដើរតូនាទីសំខាន់មួយក្នុងការផលិតព័ត៌មានអំពីការពិតនៅក្នុងប្រទេសកម្ពុជា ជាភាសាខ្មែរ ចិន និងភាសាអង់គ្លេស ដើម្បីអោយសាធារណៈជន បានយល់ដឹងតាមរយៈ ដំណឹង និងព័ត៌មានផ្សេងៗពៅការអានសារព័ត៌មាន INNEWS ហើយបាន ឃើញពីដំណើរការអភិវឌ្ឍប្រទេសកម្ពុជា ពិសេសការអភិវឌ្ឍសេដ្ឋកិច្ច ។ តាមរយៈនេះដែរ ឯកឧត្តម រដ្ឋមន្ត្រី ស្នើដល់ថ្នាក់ដឹកនាំសារព័ត៌មាន INNEWS ជួយផ្សព្វផ្សាយបន្តបន្ថែមទៀតអំពីប្រទេសកម្ពុជា នៅតាមប្រពន្ធ័ផ្សព្វផ្សាយសង្គមនៅក្នុងប្រទេសចិន ដូចជាប្រពន្ធ័ WeChat ជាដើមដែលមានការប្រើប្រាស់ច្រើន ដែលជាការផ្សព្វផ្សាយបានទូលំទូលាយពីសក្តានុពលសេដ្ឋកិច្ច ពាណិជ្ជកម្ម ឧស្សាហកម្មនិងទេសចរណ៍នៅកម្ពុជា ។
បន្ទាប់ពីបញ្ចប់កិច្ចពិភាក្សាការងាររៀបចំកម្មវិធីប្រកួតប្រជែងផលិតជាវីដេអូ “គម្រោងព្រែកជីកហ្វូណនតេជោ” រួចមក លោក Tommy នាយកគ្រប់គ្រងនៃសារព័ត៌មាន INNEWS និងជាអគ្គនាយកក្រុមហ៊ុន Liberty Group
បាននាំយកអំណោយ មកជូន ឯកឧត្តម រដ្ឋមន្ត្រី នេត្រ ភក្ត្រា រួមមាន អង្ករ ១តោន អាវភ្លៀងចំនួន ១០០អាវ.ថ្នាំកំចាត់មូសចំនួន១០០ដប.
កន្សែងជូតមុខចំនួន ១០០កន្សែង.ថ្នាំដុះធ្មេញចំនួន ១០០ប្រអប់.ទឹកសុទ្ធចំនួន ១០០កេស.មីជាតិចំនួន ១០០កេស ៕