អភិសន្តិបណ្ឌិត ស សុខា និងលោកស្រី កែ សួនសុភី អញ្ជើញប្រគេនទៀនចំណាំព្រះវស្សាចំនួន៣៩វត្ត ក្នុងស្រុកក្រុងទាំង១៣ ខេត្តព្រៃវែង
(ព្រៃវែង)៖ នៅព្រឹកថ្ងៃទី១៧ ខែកក្កដា ឆ្នាំ២០២៤ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកស្រី កែ សួនសុភី អញ្ជើញប្រគេនទៀនចំណាំព្រះវស្សា ចំនួន៣៩វត្ត ក្នុងស្រុកក្រុងទាំង១៣ នៃខេត្តព្រៃវែង ដើម្បីឧទ្ទិសមហាកុសលជូនដួងវិញ្ញាណក្ខន្ធសម្តេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជាស៊ីម និងបុព្វការីជន ព្រមទាំងញាតិកាទាំងប្រាំពីរសន្តានដែលបានចែកឋាន ដែលប្រារព្ធទៅនៅសាលាខេត្តព្រៃវែង។
ពិធីនេះមានការចូលរួមពីរដ្ឋលខាធិការ អនុរដ្ឋលេខាធិការ អគ្គនាយក ប្រធានក្រុមប្រឹក្សាខេត្ត អភិបាលខេត្តព្រៃវែង អគ្គនាយករង និងមន្ទីរអង្គភាពជុំវិញខេត្តជាច្រើនរូបទៀតផងដែរ។
ទេយ្យទានដែលបានប្រគេនព្រះសង្ឃទាំង៣៩វត្ត ក្នុងខេត្តព្រៃវែង នាឱកាសនេះ ក្នុង១វត្តៗរួមមាន ទៀនព្រះវស្សា ១គូ ស្លាដក១ អង្ករ ៦០គីឡូក្រាម មី ២កេស ទឹកបរិសុទ្ធ ២កេស ទឹកក្រូច ២កេស ទឹកដោះគោខាប់ ១កេស ទឹកត្រី ១យួរ ទឹកស៊ីអ៉ីវ ១យួរ ត្រីខ ១កេសធំ ប្រេងឆា ១០លីត្រ ស្ករស ២៥គីឡូក្រាម អំបិល ១០គីឡូក្រាម ទឹកផ្លែឈើ ១កេស ផ្លែឈើ ១កន្ត្រក់ និងបច្ច័យចំនួន ២លាន ១០មុឺនរៀល។
ចំពោះទេយ្យទានទាំងអស់នេះ គឺដើម្បីវេប្រគេនព្រះសង្ឃសម្រាប់គង់ចាំព្រះវស្សាអស់រយៈកាលត្រីមាស រយៈពេល ៣ ខែ ដែលជារដូវកាលភ្លៀងធ្លាក់ នៃរដូវកាលចូលព្រះវស្សា ដែលព្រះសង្ឃពិបាកក្នុងការនិមន្តគោចរបិណ្ឌបាទចង្ហាន់។
គួររំលឹកថា ជារៀងរាល់មុនថ្ងៃចូលព្រះវស្សារបស់ព្រះភិក្ខុសង្ឃ ថ្នាក់ដឹកនាំក្រសួងមហាផ្ទៃ មន្ត្រីរាជការខេត្ត ប្រជាពលរដ្ឋ ឧបាសក ឧបាសិកា ដែលជាពុទ្ធសាសនិក នៅក្នងខេត្តព្រៃវែង តែងតែនាំគ្នាយកទៀនចំណាំព្រះវស្សា រួមទាំងទេយ្យទានផ្សេងៗ និងគ្រឿងឧបភោគបរិភោគ ទៅវេប្រគេនដល់ព្រះសង្ឃតាមវត្តអារាមនានា ដើម្បីបានដល់ព្រះសង្ឃ សម្រាប់ប្រើប្រាស់ក្នុងពេលវេលា នៃរដូវកាលចូលព្រះវស្សាអស់កាលត្រីមាសក្នុងរយៈពេល ៣ ខែ ទៅតាមពុទ្ធាអនុញ្ញាតរបស់ព្រះសម្មាសម្ពុទ្ធជាអង្គម្ចាស់នៃយើង៕
