ព្រឹទ្ធាចារ្យចាប៉ីដងវែង លោកតា គង់ ណៃ បានទទួលមរណភាព ក្នុងជន្មាយុ​៨០ឆ្នាំ ដោយរោគាពាធ

(កំពត)៖ ព្រឹទ្ធាចារ្យចាប៉ីដងវែង លោកតា គង់ ណៃ ដែលជាធនធានសិល្បៈដ៏សំខាន់បំផុត និងជាមរតកមនុស្សរស់ បានទទួលអនិច្ចកម្មទៅហើយ នៅឯស្រុកកំណើត ដោយរោគាពាធ ក្នុងជន្មាយុ ៨០ឆ្នាំ​។​

លោក គង់ សម័យ ត្រូវជាកូនប្រុសរបស់លោកតា គង់ណៃ បានប្រាប់  www.kap-news.com នៅមុននេះបន្តិចថា លោកតា គង់ ណៃ បានទទួលមរណភាពហើយនៅគេហដ្ឋានរបស់លោកតា ដែលស្ថិតនៅភូមិដូង ឃុំស្វាយទង ស្រុកកំពង់ត្រាច ខេត្តកំពត នៅវេលាម៉ោង ១២៖៤០នាទី ថ្ងៃទី២៨ ខែមិថុនា ឆ្នាំ២០២៤។

លោកបន្តថា ពេលនេះសពរបស់លោកតា គង់ ណៃ បានតម្កល់ធ្វើបុណ្យតាមប្រពៃណីក្នុងស្រុកកំពង់ត្រាច ខេត្តកំពត ហើយការទទួលមរណភាពរបស់លោកតា គឺដោយសារតែរោគាពាធ។

គួរជម្រាបថា ព្រឹទ្ធាចារ្យ គង់ ណៃ គឺជាសិល្បករចាប៉ីដងវែងដ៏ល្បីល្បាញមួយរូបរបស់កម្ពុជាដែលមានគោរមងារថាជាព្រឹទ្ធាចារ្យកោសល្យវោហារ គង់ ណៃ។ ក្រៅពីមានគោរមងារថ្នាក់ជាតិជាមរតកមនុស្សរស់ហើយនោះ ព្រឹទ្ធាចារ្យ គង់ ណៃ ក៏ជាធ្លាប់ទទួលបានពានរង្វាន់ទាំងថ្នាក់ជាតិ និងអន្តរជាតិជាច្រើនពានរង្វាន់ផងដែរ។

ជាមួយនឹងការបង្ហាញខ្លួនភ្ជាប់ដោយវ៉ែនតាពណ៌ខ្មៅជានិច្ច លោកគឺជាតន្រ្តីករប្រពៃណីបុរាណ ដែលត្រូវបានគេស្គាល់ច្បាស់ និងល្បីល្បាញបំផុតនៅកម្ពុជានិងលើឆាកអន្តរជាតិ។

ដំណឹងទទួលមរណភាពរបស់លោកថា គឺជាការបាត់បង់ធនធានមនុស្ស ក៏ដូចជាជាមរតកមនុស្សរស់យ៉ាងសំខាន់ ដែលធ្វើឲ្យប្រជាពលរដ្ឋខ្មែរមានការសោកស្តាយយ៉ាងខ្លាំងចំពោះការបាត់បង់នេះ៕