អាជ្ញាធរបញ្ជាក់ពីប្រវត្តដីរបស់លោកគង់ មង្គល និងសិទ្ធិ អាស្រ័យផល ក្រោយអនុក្រិត្យកាត់ឆ្វៀលដំរីព្រៃ ជាន់ពលករខ្មែរម្នាក់ស្លាប់ នៅខេត្តច័ន្ទបុរី
ពលការិនីខ្មែរម្នាក់បានស្លាប់យ៉ាងអាណោចអាធ័ម នៅក្នុងចំការកៅស៊ូបន្ទាប់ពីត្រូវបានសត្វដំរីព្រៃមួយក្បាល យ៉ាងធំចូលមកអុកឡុកទៅលើកម្មករចំការកៅស៊ូនិងដេញជាន់ទាំងកំរោលទៅលើពលករទាំងនោះរួចមក។
យោងតាមការផ្សាយរបស់គេហទំព័រក្នុងស្រុកបានបញ្ជាក់ថា ហេតុការណ៍នេះបានកើតឡើងនៅវេលាម៉ោង ៦ និង ៣០ នាទីព្រឹក នាថ្ងៃទី ១៨ ខែមិថុនា ឆ្នាំ២០២៤ នៅក្នុងបរិវេណចំការកៅស៊ូមួយកន្លែង ក្នុងស្រុកកែងហាងម៉េវ ខេត្តច័ន្ទបុរី ប្រទេសថៃ។
តាមការអះអាងពីមិត្តភក្កិរួមការងារជាមួយជនរងគ្រោះបាននិយាយថា នៅមុនពេលកើតហេតុគឺពួកគេទាំងអស់គ្នា មានចំនួន ៦ នាក់ បានធ្វើដំណើរចូលទៅក្នុងចំការកៅស៊ូព្រមទាំងបានបែកផ្លូវគ្នាដើម្បីទៅចាក់យកជ័រកៅស៊ូ។ភ្លាមៗនោះដែរក៏ស្រាប់តែឃើញមានដំរីព្រៃមួយក្បាលយ៉ាងធំថែមទាំងមានភ្លុកផងនោះបានដេញពួកគេទាំងអស់គ្នារត់ប្រសេចប្រាសាចហើយដំរីនោះក៏បានដេញតាមជនរងគ្រោះរហូតទាន់ដោយបានទាត់មួយជើង និងជាន់បន្ថែមរួចវាក៏រត់បន្តចូលទៅក្នុងព្រៃបាត់ទៅ។
ភ្លាមៗនោះពួកគេទាំងអស់គ្នាបានរៀបចំបម្រុងនាំជនរងគ្រោះបញ្ជូនទៅកាន់មន្ទីរពេទ្យ ប៉ុន្តែជាអកុសលគេបានស្លាប់បាត់ទៅហើយ ដោយជនរងគ្រោះមានឈ្មោះ ស៊ីម សុគន្ធ ភេទស្រី អាយុ ២៣ ឆ្នាំ មានស្រុកកំណើតនៅភូមិរិទ្ធី ២ ឃុំកែវផុស ស្រុកស្ទឹងហាវ ខេត្តព្រះសីហនុ បានទៅធ្វើការងារជាកម្មករនៅក្នុងចំការកៅស៊ូនា ខេត្តច័ន្ទបុរី ប្រទេសថៃ។
បច្ចុប្បន្នសមត្ថកិច្ចថៃបាននិងកំពុងរៀបចំសពដើម្បីបញ្ជូនមកកម្ពុជាវិញ ក្នុងការរៀបចំធ្វើបុណ្យតាមប្រពៃណីនៅឯស្រុកកំណើត៕ របាយការណ៍ មួន រិទ្ធីយ៉ា
