នេះជាការថ្លែងរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសទទួលជួបពិភាក្សាការងារជាមួយ លោក លី យៀនស៊ុង ( Lyu Yansong ) និពន្ធនាយកទីភ្នាក់ងារសារព័ត៌មាន ស៊ីនហួរ (Xinhua) នៃសាធារណរដ្ឋប្រជាមានិតចិន នៅថ្ងៃទី០២ ខែមិថុនា ឆ្នាំ២០២៤ នាទីស្តីការក្រសួងព័ត៌មាន ។   ឯកឧត្តម រដ្ឋមន្រ្តី នេត្រ ភក្ត្រា បានគូសបញ្ជាក់ថា តាមរយៈកិច្ចសហប្រតិបត្តិការរវាងទីភ្នាក់ងារសារព័ត៌មានកម្ពុជា AKP និងទីភ្នាក់ងារសារព័ត៌មាន សុីនហួរប្រទេសចិន អាចការពាររវាងប្រទេសទាំងពីរ កម្ពុជា ចិន ក្នុងក្របខណ្ឌការងារព័ត៌មាន ដោយខាង AKP ជួយផ្សព្វផ្សាយព័ត៌មានពីប្រទេសចិន តាមរយៈ សុីនហួរ ជាព័ត៌មានផ្លូវការរបស់ចិន ហើយ សុីនហួរ និងប្រពន្ធ័ផ្សព្វផ្សាយរបស់ចិនផ្សេងទៀត ក៏ជួយផ្សព្វផ្សាយពីប្រទេសកម្ពុជា ដោយបានស្រង់យកអត្ថបទពី AKP ដែលជាព័ត៌មានផ្លូវការរបស់កម្ពុជាផងដែរ។   ឯកឧត្តម រដ្ឋមន្រ្តី បានលើកឡើងថា នៅក្នុងបរិបទបច្ចុប្បន្នដែលប្រពន្ធ័ផ្សព្វផ្សាយទំនើប មានការរីកចំរើនកើនឡើង គឺកើតមានព័ត៌មានក្លែងក្លាយច្រើន ដែលចាំបាច់ណាស់ដែលយើងត្រូវពង្រឹងប្រពន្ធ័ផ្សព្វផ្សាយផ្លូវការរបស់រដ្ឋ ទៅ លើការអប់រំសាធារណមតិ គ្រប់គ្រងសាធារណមតិ ហើយផ្តល់ព័ត៌មានពិត ឆាប់រហ័ស ត្រឹមត្រូវ ជូនដល់ប្រជាពលរដ្ឋ ព្រោះជាភាពចាំបាច់ដើម្បីទប់ស្កាត់ការបំពុលទៅដោយព័ត៌មានមិនត្រឹមត្រូវ ។    ឯកឧត្តម បានលើកឡើងថា គោលដៅរបស់ក្រសួងព័ត៌មាន នៅក្នុងអាណត្តិទី ៧ ធ្វើអោយទីភ្នាក់ងារសារព័ត៌មានកម្ពុជា AKP ដែលឈានមុខគេក្នុងការផ្តល់ព័ត៌មានឆាប់រហ័ស ត្រឹមត្រូវ ដែលអាចជួយបន្សាបព័ត៌មាន មិនត្រូវផ្សេងៗ ដោយជាជំហានៗ គឺការបណ្តុះបណ្តាលពង្រឹងសមត្ថភាពដល់មន្រ្តីអោយបានរឹងមាំដើម្បីបំពេញកិច្ចការងារអោយមានប្រសិទ្ធភាព។   បច្ចុប្បន្ន AKP ជាមណ្ឌលព័ត៌មាន ធំមួយរបស់រដ្ឋាភិបាលកម្ពុជា នៅក្នុងអាណត្តិទី ៧ ក្រោមការដឹកនាំដោយ សម្តេចអធិបតីនាយករដ្ឋមន្រ្តី ហ៊ុន ម៉ាណែត ហើយក្នុងក្របខណ្ឌក្រសួងព័ត៌មាន ដែលមាន ឯកឧត្តម ភក្ត្រា ជារដ្ឋមន្រ្តី បានគិតគួរពីការប្រមូលផ្តុំព័ត៌មានពីគ្រប់ក្រសួង ស្ថាប័ន អង្គភាពចំណុះអោយរដ្ឋាភិបាលទាំងអស់ នៅពេលមានព័ត៌មាន ជារូបថត វីដេអូ អត្ថបទព័ត៌មានផ្សេងៗ បានបញ្ជូនមកមណ្ឌលព័ត៌មានរួម ហើយ AKP រួមទាំងប្រពន្ធ័ផ្សព្វផ្សាយជាតិ មានទូរទស្សន៍ជាតិកម្ពុជា វិទ្យុជាតិកម្ពុជា App ក្រសួងព័ត៌មាន បានបញ្ចេញនូវព័ត៌មានទាំងអស់នោះ ដែលជាសំលេងរបស់រដ្ឋាភិបាល។   ឯកឧត្តម នេត្រ ភក្ត្រា បានជម្រាបជូនដែរថា ក្នុងរយៈពេលជិត ៩ខែ ដែល មកកាន់តំណែងជារដ្ឋមន្រ្តីក្រសួងព័ត៌មាន បានធ្វើកិច្ចការងារច្រើនជាមួយអ្នកសារព័ត៌មានជាតិចិន នៅក្នុងប្រទេសកម្ពុជា ក៏ដូចជាអ្នកវិនិយោគិនចិន ដែលមកបោះទុនវិនិយោគលើវិស័យព័ត៌មាននៅក្នុងប្រទេសកម្ពុជា ។   លោក លី យៀនស៊ុង និពន្ធនាយកទីភ្នាក់ងារ សុីនហួរ សំដែងនូវការរីករាយដោយបានអញ្ជើញជួបពិភាក្សាការងារជាមួយ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន ហើយពេញចិត្តចំពោះការពង្រឹងកិច្ចសហការរវាងស្ថាប័នសារព័ត៌មាន នៃប្រទេសទាំងពីរ ចិន កម្ពុជា តាមរយៈប្រពន្ធ័ផ្សព្វផ្សាយព័ត៌មាន បានបង្កើតនូវភាពយល់ដឹងពីគ្នាទៅវិញទៅមកដើម្បីការពារនូវផលប្រយោជន៍នៃប្រទេសទាំងពីរ ធ្វើអោយកាន់តែមានភាពរឹងមាំឡើងបន្ថែមទៀតនៃទំនាក់ទំងរវាងប្រជាជន និងប្រជាជន ស្គាល់គ្នាកាន់តែច្បាស់តាមរយៈប្រពន្ធ័ផ្សព្វផ្សាយ ៕