បន្ទាយមានជ័យ៖ ដោយមានការយកចិត្តទុកដាក់ពីលោកឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យ និងអនុវត្តតាមបទបញ្ជាផ្ទាល់របស់លោកវរសេនីយ៍ឯក ហាំ វណ្ណៈ មេបញ្ជាការ វរសេនាតូចនគរបាលការពារព្រំដែនគោកលេខ៨៩១ នៅ វេលាម៉ោង ០០ និង ១០ នាទីរំលងអាធ្រាតឈានចូលថ្ងៃទី១០ ខែមីនា ឆ្នាំ២០២៤។
លោកវរសេនីយ៍ឯក ហាំ វណ្ណៈ មេបញ្ជាការ វរសេនាតូចនគរបាលការពារព្រំដែនគោកលេខ៨៩១ បានឱ្យដឹងថាកម្លាំងអន្តរាគមន៍វរៈ៨៩១ ចំនួន ១០ នាក់ ដឹកនាំដោយលោក វរសេនីយ៍ទោ ណុល ម៉ាប់ មេបញ្ជាការរង និងជាប្រធានវេនប្រចាំបញ្ជាក្រុមទី៣ បានធ្វើការល្បាតចល័តដើម្បីរក្សាការពារសន្តិសុខសុវត្ថិភាពជូនប្រជាពលរដ្ឋ ពេលយប់លើភូមិសាស្ត្ររដ្ឋបាលសង្កាត់ផ្សារកណ្តាល និងសង្កាត់អូរឫស្សី ក្រុងប៉ោយប៉ែតខេត្តបន្ទាយមានជ័យក៏បានប្រទះឃើញក្មេងទំនើងមួយក្រុមមានគ្នាបីនាក់ក៏សង្ស័យ បានធ្វើការឃាត់ខ្លួនតែម្ដង។
កម្លាំងនគរបាលអន្តរាគមន៍វរៈ៨៩១ បានឲ្យដឹងថា ក្នុងការឃាត់ខ្លួនជនសង្ស័យប្រុសចំនួន ០៣ នាក់ ត្រង់ចំណុច រង្វង់មូលបុរី KN ជាប់ផ្លូវជាតិលេខ៥ ជិតសួនច្បារតេជោឈ្នះឈ្នះ ក្រុងប៉ោយប៉ែត ស្ថិតក្នុងភូមិគីឡូម៉ែត្រ៤ សង្កាត់ផ្សារកណ្តាល ក្រុងប៉ោយប៉ែត ជនសង្ស័យមានឈ្មោះ ដូចខាងក្រោម៖ ១-ឈ្មោះ សឿម សំណាង ភេទប្រុស អាយុ ១៨ ឆ្នាំជនជាតិខ្មែរ ២-ឈ្មោះ គ្រី តុលា ភេទប្រុស អាយុ ២៤ ឆ្នាំជនជាតិខ្មែរ ៣-ឈ្មោះ វ៉ុន សុខឃាង ភេទប្រុស អាយុ ១៨ ឆ្នាំ ជនជាតិខ្មែរ ដកហូតវត្ថុតាងរួមមានដូចខាងក្រោម៖-ម្ស៉ៅសក្រាមថ្លាសង្ស័យជាសារធាតុញៀន៤ កញ្ចប់តូច-ទូរស័ព្ទចំនួន ៣ គ្រឿង, – កាំបិតតាំងតោចំនួន ១- វិទ្យុទាក់ទង់ម៉ាក MEGABAND ចំនួន ១ គ្រឿង -ម៉ូតូចំនួន ២ គ្រឿង (ម៉ាក MSX ១ គ្រឿង និងម៉ូតូម៉ាក honda dream ចំនួន ១ គ្រឿង -កូនសោលេខ១៤ មួយ ដើម-ដែកកេះ ២ និងឆ្នាំងសាកទូរស័ព្ទ ១-ឧបករណ៍សម្រាប់ប្រើប្រាស់គ្រឿងញៀន(បំពង់កែវមួយ) ។
កម្លាំងនគរបាលអន្តរាគមន៍វរៈ៨៩១ បានបញ្ជាក់ទៀតថាជនសង្ស័យខាងលើត្រូវបានឃាត់ខ្លួននៅវេលាម៉ោង០១ នឹង២០ នាទីរំលងអាធ្រាតឈានចូលថ្ងៃអាទិត្យទី១០ ខែមីនា ឆ្នាំ២០២៤ ក្នុងពេលកំពុងប្រព្រិត្តបទល្មើសជាក់ស្តែងចែកចាយគ្រឿងញៀន ត្រង់ ចំណុចកើតហេតុខាងលើ ។
លោកវរសេនីយ៍ឯក ហាំ វណ្ណៈ មេបញ្ជាការ វរសេនាតូចនគរបាលការពារព្រំដែនគោកលេខ៨៩១ បានបញ្ជាក់ទៀតថា ជនសង្ស័យប្រុសទាំង ៣ នាក់ រួមទាំងវត្ថុតាងទាំងអស់ខាងលើ ត្រូវបានបញ្ជូនទៅ សមត្ថកិច្ចជំនាញនគរបាលផ្នែកប្រឆាំងគ្រឿងញៀន នឹងផ្នែកព្រហ្មទណ្ឌនៃអធិការដ្ឋាននគរបាលក្រុងប៉ោយប៉ែតនៅវេលាម៉ោង ០១នឹង ៤០ នាទីរំលងអាធ្រាតនៅថ្ងៃទី១០ ខែមីនា ឆ្នាំ២០២៤ ដើម្បីបន្តអនុវត្តតាមនីតិវិធី ។
