(កំពង់ឆ្នាំង)៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានដឹកនាំក្រុមការងារចម្រុះមានអាជ្ញាធរថ្នាក់ខេត្ត ស្រុក និងថ្នាក់មូលដ្ឋាន និងមន្ត្រីជំនាញ រួមទាំងកងកម្លាំងប្រដាប់អាវុធ ចុះពិនិត្យទីតាំងដីព្រៃ ១កន្លែង ជាដីព្រៃអតីតឡូនេសាទលេខ១៤ ស្ថិតនៅក្នុងភូមិភ្លង ឃុំពាមឆ្កោក ស្រុកជលគីរី ជាប់ព្រំប្រទល់និងភូមិពាមពពិច ឃុំកោះថ្កូវ ស្រុកជល់គីរី ដែលត្រូវបានគេកាប់ឆ្ការ និងដុតបំផ្លាញយកដីបម្រើដល់ផលប្រយោជន៍ផ្សេងៗដោយពុំមានច្បាប់អនុញ្ញាត នារសៀលថ្ងៃទី២ ខែកុម្ភៈ ឆ្នាំ២០២៤ ។
ក្រោយពីមានការចុះផ្សាយពីបណ្ដាញព័ត៌មានពាក់ព័ន្ធនឹងការកាប់ទន្ទ្រានដីព្រៃក្នុងតំបន់២មួយកន្លែង ស្ថិតក្នុងអតីតឡូនេសាទលេខ១៤ ក្នុងភូមិសាស្ត្រទីតាំងខាងលើនេះ លោកអភិបាលខេត្ត បានមិនបានជឿជាក់ទៅលើ របាយការណ៍របស់ក្រុមចម្រុះ ដែលបានចុះមកពិនិត្យការកាប់ឆ្ការ និងដុតបំផ្លាញព្រៃលិចទឹកនៅទីតាំងខាងលើនេះទេ។
កម្លាំងចម្រុះបានធ្វើឡើងកាលពីថ្ងៃទី០១ ខែកុម្ភៈ ឆ្នាំ២០២៤ ដឹកនាំដោយលោក ដូវ គឹមស៊ីង អភិបាលស្រុកជលគីរី។ របាយការណ៍នោះ បានបញ្ជាក់ថា ពុំមានការកាប់ឆ្ការ និងដុតបំផ្លាញដីព្រៃដែលមានទំហំធំដូចការចុះផ្សាយ របស់អ្នកសារព័ត៌មាននោះឡើយ គឺមានតែប្រជាពលរដ្ឋកាប់ឆ្ការបន្លាយួនបន្តិចបន្តួចនៅជុំវិញខ្ទមរបស់គាត់តែប៉ុណ្ណោះ។
បន្ទាប់ពីលោកអភិបាលខេត្ត បានពិនិត្យក្នុងរបាយការណ៍របស់លោកអភិបាលស្រុកជល់គីរី ឃើញមានការខុសគ្នាឆ្ងាយ ទាំងទំហំ នៃការកាប់ទន្ទ្រាន និងរូបភាពព្រៃឈើធំៗដែលត្រូវបានគេកាប់ និងដុតបំផ្លាញ លោកអភិបាលខេត្តចង់ឃើញទិដ្ឋភាពជាក់ស្ដែង លោកក៏បានដឹកនាំក្រុមការងារចម្រុះជិត៣០នាក់ ចុះពិនិត្យទីតាំងដីព្រៃលិចទឹកស្ថិតក្នុងអតីតឡូនេសាទលេខ១៤ ដែលត្រូវបានគេកាប់ឆ្ការ និងដុតបំផ្លាញខាងលើនេះដោយផ្ទាល់ និងបានពិនិត្យឃើញជាក់ស្ដែងទៅលើទីតាំង២កន្លែង ក្នុងចំណោមទីតាំង៤កន្លែង ដែលត្រូវបានគេកាប់ឆ្ការ និងដុតបំផ្លាញចោល។ ពេលនោះ លោកអភិបាលខេត្ត និងក្រុមការងារ បានរកឃើញថា ដីព្រៃខាងលើនេះពិតជាត្រូវ បានគេកាប់ទន្ទ្រាន និងដុតបំផ្លាញចោលទាំងការកាប់ទន្ទ្រានថ្មីៗ ទាំងចាស់អស់ជាច្រើនពិតប្រាកដមែន។
ពាក់ព័ន្ធនឹងដីព្រៃលិចទឹកក្នុងភូមិសាស្ត្រខាងលើនេះលោក ឃឿន មេភូមិភ្លង ក្នុងឃុំពាមឆ្កោក ស្រុកជល់គីរី បានប្រាប់បណ្ដាញព័ត៌មាន Fresh News តាមទូរស័ព្ទនៅព្រឹកថ្ងៃទី៣ ខែកុម្ភៈ ឆ្នាំ២០២៤ថា ដីនៅក្នុងតំបន់នេះ គឺជាដីព្រៃស្ថិតក្នុងអតីតឡូនេសាទលេខ១៤ ពិតប្រាកដមែន។ ដីក្នុងដែនអតីតឡូនេសាទលេខ១៤នេះដែរ កាលពីដើមឡើយមានទំហំរហូតដល់ជិត៧០០ហិកតា បើមើលនៅក្នុងផែនទី តែក្រោយមកត្រូវបានប្រជាពលរដ្ឋកាប់ឆ្ការ វាទយកដីធ្វើស្រែប្រាំងជាបន្តបន្ទាប់ ដែលបច្ចុប្បន្ននៅសល់ប្រមាណតែជាង១០ហិកតាតែប៉ុណ្ណោះ។ ចំពោះទីតាំងដីព្រៃលិចទឹកខាងនេះ បច្ចុប្បន្នក៏នៅក្នុងការគ្រប់គ្រងរបស់ភូមិភ្លង ឃុំពាមឆ្កោក ស្រុកជល់គីរី។
លោកបានបញ្ជាក់ថា លោកអភិបាលខេត្ត បានណែនាំលោក និងអាជ្ញាធរពាក់ព័ន្ធ កាលពីថ្ងៃម្សិលមិញនេះថា ដីព្រៃលិចទឹកដែលគេកំពុងកាប់ឆ្ការ និងដុត ដើម្បីយកដីបម្រើដល់ផលប្រយោជន៍របស់គេខាងលើនេះ ចាប់ពីថ្ងៃនេះទៅ និងមិនអនុញ្ញាតឱ្យមានការកាប់ឆ្ការ ឬដុតបំផ្លាញចោលដូចនេះទៀតនោះឡើយ។ បើចង់កាប់ឆ្ការ ឬដុតជាបន្តទៀត ត្រូវតែធ្វើលិខិតស្នើសុំច្បាប់អនុញ្ញាតពីក្រសួងកសិកម្ម រុក្ខាប្រមាញ់ និងនេសាទ ជាពិសេសត្រូវតែមានការចុះពិនិត្យ ឱ្យបានច្បាស់លាស់ ពីមន្ត្រីជំនាញ និងមន្ត្រីពាក់ព័ន្ធ រួមនឹងអាជ្ញាធរមូលដ្ឋានអត់បានច្បាស់លាស់ជាមុនសិន ទើបដាក់លិខិតស្នើសុំទៅក្រសួងកសិកម្មរុក្ខា ប្រមាញ់ និងនេសាទ ជាអ្នកសម្រេចទើបអាចធ្វើបាន។
ជុំវិញករណីការកាប់ឆ្ការ និងដុតបំផ្លាញដីព្រៃលិចទឹក ដែលជាដីព្រៃអតីតឡូនេសាទលេខ១៤ ស្ថិតក្នុងឃុំពាមឆ្កោក ស្រុកជល់គីរីខាងលើនេះ លោកអភិបាលខេត្ត ក៏បានផ្ដល់បទសម្ភាសន៍ជាមួយបណ្ដាញព័ត៌មាន Fresh News ដោយលោកបានបញ្ជាក់ថា នៅលើទីតាំងព្រៃលិចទឹកខាងលើនេះ តាមការឱ្យដឹងពីមន្ត្រីជំនាញ ដីនេះស្ថិតនៅក្នុងតំបន់២ តែជាដីប្រភេទអ្វីនោះលោកពុំទាន់ដឹងច្បាស់នោះទេនៅពេលត្រឡប់ទៅវិញ លោកនឹងធ្វើការផ្ទៀងផ្ទាត់ដីនេះ នៅលើផែនទី ជាមួយនឹងមន្ត្រីជំនាញសិន ទើបអាចដឹងបានថាជាប្រភេទដីអ្វីឱ្យច្បាស់លាស់។
លោកអភិបាលបានបញ្ជាក់ថា បើទោះជាដីនេះជាប្រភេទដីអ្វីក៏ដោយការកាប់ឆ្ការការដុត ដើម្បីយកដីបម្រើផលប្រយោជន៍ផ្សេងៗត្រូវតែសុំច្បាប់អនុញ្ញាត ពីមន្ត្រីពាក់ព័ន្ធ ឬអាជ្ញាធរ ចំណែកការសុំច្បាប់អនុញ្ញាត គឺអាស្រ័យទៅលើ ទីតាំងដីជាក់ស្ដែង តើទីតាំងណាដែលអាចស្នើសុំត្រឹមអាជ្ញាធរឃុំ ទីតាំងណាដែលត្រូវស្នើសុំទៅដល់អាជ្ញាធរស្រុក ខេត្ត និងទីតាំងណាដែលត្រូវស្នើសុំក្រសួងពាក់ព័ន្ធមិនអាចចេះតែធ្វើបានតាមតែអំពើចិត្តនោះបានទេ។
លោកបានបន្ថែមថា នៅក្នុងខេត្តកំពង់ឆ្នាំង ចាប់ពីស្រុកកំពង់ត្រឡាច ស្រុករលាប្អៀរ និងស្រុកបរិបូណ៌ គឺសម្តេតេជោ ហ៊ុន សែន អតីតនាយករដ្ឋមន្ត្រី បានចេញអនុក្រឹត្យអនុញ្ញាតឱ្យកាត់ឆ្វៀលដីពីតំបន់២ មកជាតំបន់១ ដែលនៅក្នុងខេត្តកំពង់ឆ្នាំង មានផ្ទៃដីដែលត្រូវកាត់ឆ្វៀលរហូតទៅដល់ចំនួន ៤,៦០០០ហិកតា ដែលមានប្រជាពលរដ្ឋចំនួន ៦,៥០០០គ្រួសារ ដែលទទួលបានអត្ថប្រយោជន៍ពីការកាត់ឆ្វៀល ដីជូនពួកគាត់ធ្វើជាកម្មសិទ្ធិស្របច្បាប់។
ឆ្លៀតក្នុងឱកាសនោះ លោកអភិបាលខេត្ត ក៏សុំសំណូមពរដល់ប្រជាពលរដ្ឋដែលចង់ប្រើប្រាស់ជាប្រយោជន៍ដែលជាការសាងសង់លំនៅឋាន ឬការកាប់ឆ្ការដីព្រៃនៅលើដីតំបន់ពីររបស់ខ្លួន សូមរង់ចាំការកាត់ឆ្វៀលពីអាជ្ញាធរ ជូនជាផ្លូវការសិន ព្រោះពេលនេះអនុក្រឹត្យបានចេញរួចហើយ និងចាប់ផ្ដើមអនុវត្តក្នុងពេលឆាប់ៗខាងមុខនេះ៕
