ស្វាយរៀង៖ អភិបាលរងខេត្តស្វារៀង ណែនាំដល់អាជ្ញាធរស្រុក ជាពិសេសអាជ្ញាធរឃុំ សមត្ថកិច្ចមូលដ្ឋាន ត្រូវតែចុះពិនិត្យផ្ទៀងផ្ទាត់ ទីតាំងដាក់ឡូតូអូនឡាញ នៅតាមភូមិសាស្ត្ររបស់ខ្លួនទទួលខុសត្រូវ និងត្រូវធានាថាការដាក់ទីតាំងឡូតូទាំងនោះ មានអាជ្ញាធរ និងបានធ្វើកិច្ចសន្យារួចរាល់ មិនលួចលាក់បង្កប់ល្បែងស៊ីសងអនឡាញផ្សេងៗដែលច្បាប់មិនអនុញ្ញាត និងខុសពីអាជ្ញាប័ណ្ណដែលស្នើសុំ។
ការថ្លែងនេះរបស់លោកបណ្ឌិត តូច ប៉ូលីវ៉ា អភិបាលរងខេត្ត និងជាអនុប្រធានក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទក្នុងភូមិសាស្ត្រខេត្តស្វាយរៀង ទទួលបន្ទុកស្រុកស្វាយជ្រំ នៅថ្ងៃទី២៩ ខែមករា ឆ្នាំ២០២៤ ក្នុងកិច្ចប្រជុំបូកសរុបលទ្ធផលការងារចុះពិនិត្យទីតាំងបើកល្បែងផ្សងសំណាងឆ្នោតឡូតូ ក្នុងស្រុកស្វាយជ្រំ។
ក្នុងគ្រានោះដែរ លោកអភិបាលរងខេត្ត ក៏បានណែនាំដល់មន្ត្រីក្រោមឱវាទ ត្រូវពិនិត្យទីតាំងនីមួយៗ មិនត្រូវស្ថិតនៅក្បែរសាលារៀន និងវត្តអារាម។ ហើយម្ចាស់ទីតាំងត្រូវគោរពតាមគោលការណ៍ច្បាប់ និង លិខិតបទដ្ឋានគតិយុត្តជាធរមាន។ ក្នុងករណីដែលប្រព្រឹត្តពីគោលការណ៍ច្បាប់ ត្រូវធ្វើរបាយការណ៍មកក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទក្នុងភូមិសាស្ត្រខេត្ត ដើម្បីចាត់ការតាមនីតិវិធីបន្ត៕
