ស្វាយរៀង៖ ប្រជាពលរដ្ឋក្នុង ស្រុករមាសហែកសប្បាយចិត្តយ៉ាងខ្លាំង ខណៈមន្ទីរធនធានទឹក និងឧតុនិយមខេត្ត សហការជាមួយរដ្ឋបាលស្រុក បានយក ម៉ាស៊ីនបូមទឹក ខ្នាតធំចំនួន៤គ្រឿង បូមទឹកពីទន្លេកំពង់ស្ពានបញ្ចូល ក្នុងប្រឡាយដើម្បីជាប្រយោជន៍សម្រាប់វិស័យកសិកម្ម។
បើតាមលោក ស៊ូ ម៉ុល អភិបាលស្រុករមាសហែកបានមានប្រសាសន៍ឲ្យដឹងថា កាលពីថ្ងៃទី២៦ ខែមករា ឆ្នាំ២០២៤ កន្លងមកនេះ លោក និងលោកប្រធានមន្ទីរធនធានទឹក និងឧតុនិយមខេត្តស្វាយរៀងព្រមទាំងសហការី បានចុះពិនិត្យចំណុចក្បាលហុងប្រឡាយកីចក និងត្រង់ចំណុចមួយចំនួនទៀតស្ថិតនៅក្នុងឃុំជ្រៃធំ ក្នុងការសម្រួលបញ្ចូលទឹកចូលទៅក្នុងប្រឡាយដើម្បីបានទឹកឲ្យបងប្អូនប្រជាពលរដ្ឋប្រើប្រាស់ក្នុងការបង្កបង្កើតផលស្រូវរដូវប្រាំង។
លោកបានបន្តទៀតថា ហើយនៅរសៀលថ្ងៃទី២៧ ខែមករា ឆ្នាំ២០២៤ គឺបាន ដាក់ដំណើរការ បូមទឹកបញ្ចូលក្នុងប្រឡាយកីយចក ងាយស្រួលដល់បងប្អូន ដែលរស់នៅ ឆ្លងកាត់មានឃុំជ្រៃធំ ឃុំមុខដា ឃុំត្រពាំងស្តៅ និងឃុំចន្ត្រី ស្រុករមាសហែក និងបន្តទៅស្រុករំដួលនិង ស្រុកស្វាយទាបទទួលបានផលប្រយោជន៍ ទាញ យកទឹកពីប្រឡាយធ្វើស្រូវប្រាំង របស់បងប្អូន ក្នុងសហគមន៍ផងដែរ។
ជាមួយគ្នានេះ លោកស្រី វ៉ាន់ ចិន្ដា រស់ក្នុងភូមិត្រពាំងស្មាច់ឃុំជ្រៃធំ និងលោក ពៅ សានី រស់ក្នុងភូមិដក់ព ឃុំជ្រៃធំ អ្នកស្រីពៅនួន រស់ក្នុងភូមិដក់ពរឃុំជ្រៃធំនិងអ្នកស្រី រ៉េត សៀងហេត រស់ក្នុងភូមិដក់ពរឃុំជ្រៃធំ ស្រុករមាសហែក មានទឹកមុខញញឹម សប្បាយរីករាយ បានថ្លែងអំណរគុណជាខ្លាំងចំពោះរាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាដែលតែងតែគិតគូរសុខទុក្ខរបស់បងប្អូនប្រជាពលរដ្ឋក៏ដូចជា លោក សៅ សុខា ប្រធានក្រុមការងារចុះមូលដ្ឋានស្រុករមាសហែក និងលោក ប៉េង ពោធិ៍សា អភិបាលខេត្តស្វាយរៀង លោកអភិបាលស្រុកក៏ដូចជា មន្ទីរធនធានទឹក និងឧតុនិយមខេត្ត បានជួយសង្គ្រោះទាន់ពេលវេលានូវស្រូវស្រែប្រាំងជាច្រើនហិកតាទាំងនេះ៕
