(កំពត)៖ រដ្ឋបាលខេត្តកំពតបានរៀបចំប្រណាំងទូក ដើម្បីចូលរួមអបអរសារទរព្រះរាជពិធីបុណ្យអុំទូក បណ្តែតប្រទីប សំពះព្រះខែ រយៈពេល២ថ្ងៃ ត្រូវនឹងថ្ងៃទី១០-១១ ខែវិច្ឆិកា ឆ្នាំ២០២៣ ដោយទទួលបានភ្ញៀវទេសចរសរុប ប្រមាណ ៥២០,០០០នាក់ ក្នុងនោះភ្ញៀវអន្តរជាតិចំនួន១,៣៧៥នាក់។
លោក សយ ស៉ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា «ចំនួនភ្ញៀវទេសចរជាតិនិងអន្តរជាតិ និងប្រជាពលរដ្ឋចូលរួមទស្សនាកម្សាន្តសប្បាយក្នុងពិធីបុណ្យអុំទូករយៈពេល២ថ្ងៃ សរុបប្រមាណ៥២០,០០០នាក់ ក្នុងនោះភ្ញៀវអន្តរជាតិចំនួន១,៣៧៥នាក់»។
លោកប្រធានមន្ទីរបានបន្តថា នៅថ្ងៃទី១ ភ្ញៀវសរុបចំនួន២៥០,០០០នាក់ (ភ្ញៀវអន្តរជាតិ ៦១៥នាក់) និងនៅថ្ងៃទី២ ភ្ញៀវសុបចំនួន២៧០,០០០នាក់ (ភ្ញៀវអន្តរជាតិ ៧៦០នាក់)។
លោកប្រធានមន្ទីរបន្តទៀតថា ការរៀបចំពិធីបុណ្យអុំទូកឆ្នាំនេះ រដ្ឋបាលខត្តបានខិតខំរៀបចំកែលម្អសោភ័ណភាព ហេដ្ឋារចនាសម្ពន្ធ ការរៀបចំពិធីប្រកបដោយភាពទាក់ទាញញាំងឲ្យមានភាពសប្បាយរីករាយ និងការចូលរួមគាំទ្រពីភ្ញៀវទេសចរជាតិ-អន្តរជាតិ ប្រជាពលរដ្ឋចូលរួមយ៉ាងច្រើនកុះករ។
បើតាមលោក សយ ស៉ីណុល ការងារបដិសណ្ឋារកិច្ច ការគ្រប់គ្រងបរិស្ថាន អនាម័យចំណីអាហារ តម្លៃចំណីអាហារត្រូវបានពង្រឹង និងគ្រប់គ្រងយ៉ាងល្អប្រសើរ។ សមត្ថកិច្ចពាក់ព័ន្ធក៏បានខិតខំសហការពង្រឹងគ្រប់គ្រងសន្តិសុខ សុវត្ថិភាព សណ្តាប់ធ្នាប់ ចរាចរណ៍ដោយរលូនប្រកបដោយជោគជ័យ៕
ដោយ សារី សារ៉ាត់
