ព្រឹកថ្ងៃពុធ ១១កើត ខែអស្សុជ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃ២៥ ខែតុលា ឆ្នាំ២០២៣ នៅសាលប្រជុំសាលាខេត្តពោធិ៍សាត់ ឯកឧត្តម ខូយ រីដា ប្រធានគណៈកម្មាធិការគណបក្សខេត្ត អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត បានអញ្ជើញដឹកនាំកិច្ចប្រជុំ ដោយមានការអញ្ជើញចូលរួមពី ឯកឧត្តម លោកជំទាវ សមាជិកគណៈអចិន្ត្រៃយ៍គណៈកម្មាធិការគណបក្សខេត្ត ឯកឧត្តម លោកជំទាវ អភិបាលរងខេត្ត ព្រះរាជអាជ្ញាអមសាលាដំបូងខេត្ត ប្រធានមន្ទីរ អង្គភាពជុំវិញខេត្ត មេបញ្ជាការកងកម្លាំងប្រដាប់អាវុធទាំង ៣ និងអភិបាលក្រុង ស្រុកទាំងប្រាំពីរ ។
ឯកឧត្តម ប្រធាន បានក្រើនរំលឹកដល់អាជ្ញាធរមានសមត្ថកិច្ចនិងមន្ទីរ អង្គភាពទាំងអស់ក្នុងខេត្ត មិនត្រូវស្ពឹកស្រពន់ត្រូវមានភាពរហ័សរហួនក្នុងការបំពេញភារកិច្ចបម្រើប្រជាពលរដ្ឋទៅតាមតួនាទីរបស់ខ្លួន ។ ប្រសិនបើបញ្ហាខ្លះដោះស្រាយមិនចេញត្រូវរាយការណ៍មករដ្ឋបាលខេត្ត ដើម្បីរដ្ឋបាលខេត្តរៀបចំនីតិវិធីដោះស្រាយ ជូនប្រជាពលរដ្ឋ ជាពិសេស ក្នុងឱកាសការរៀបចំប្រារព្ធពិធីបុណ្យអុំទូក សំពះព្រះខែ របស់ខេត្តពោធិ៍សាត់ ខាងមុខនេះ មន្ទីរអង្គភាពក្នុងខេត្ត ត្រូវចូលរួមរៀបចំធ្វើ ឲ្យមានសណ្ដាប់ធ្លាប់ល្អ សោភ័ណភាពស្រស់ស្អាត អនាម័យល្អ នឹងមានភាពទាក់ទាញ អធិកអធម ៕
