ខេត្តកែប: នៅព្រឹកថ្ងៃទី០៩ ខែតុលា ឆ្នាំ២០៣ ត្រូវនឹងថ្ងៃចន្ទ ១០រោច ខែភទ្របទ ឆ្នាំថោះ បញ្ចស័ក ព.ស ២៥៦៧ ឯកឧត្តម សំ សារីន ប្រធានក្រុមប្រឹក្សាខេត្តកែប និងលោក ព្រុំ គន្ធិ អភិបាលរងតំណាងដ៏ខ្ពង់ខ្ពស់ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប រួមជាមួយឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត និង គណៈអភិបាលក្រុង ស្រុក ប្រធាន អនុប្រធានមន្ទីរ អង្គភាព បាន អញ្ជើញចូលរួមជាមួយពុទ្ធបរិស័ទជិតឆ្ងាយ កាន់បិណ្ឌវេនទី១០ នៅវត្តកំពង់ត្រឡាច ស្ថិតនៅភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប។
ក្នុងពិធីបុណ្យកាន់បិណ្ឌទី១០នេះ ឯកឧត្តមលោកជំទាវ ក្រុមប្រឹក្សាខេត្ត គណៈអភិបាលខេត្ត រួមទាំងមន្ត្រីរាជការជុំវិញខេត្ត និងពុទ្ធបរិទ្ធជិតឆ្ងាយ ក៏បាន លំអោនកាយឧទ្ទិសបួងសួង ដល់ដួងព្រះវិញ្ញាណខន្ធ ព្រះករុណា ព្រះបាទសម្តេច ព្រះនរោត្តម សី ហនុ ព្រះមហាវីរក្សត្រព្រះវររាជបិតាជាតិខ្មែរ ព្រះបរមរតនកោដ្ឋដែលទ្រង់យាងសោយព្រះទីវង្គត់គម្រប់ខួប១១ព្រះវស្សា សូមព្រះវិញ្ញាណខន្ធ ព្រះអង្គយាង ចាប់បដិសន្ធិ ក្នុងព្រះបរមសុគតិភព គ្រប់ៗព្រះជាតិ កុំបីឃ្លាតក្លាយបការៈដទៃឡើយ។
ពិធីកាន់បិណ្ឌបានប្រព្រឹត្តទៅតាមទំនៀមទំលាប់ប្រពៃណីព្រះពុទ្ធសាសនាដ៏រុង រឿងនៃយើង ដោយធ្វើបទនមស្សការព្រះរតនត្រ័យ សមាទានសិល និង រាប់បាត្រ ដារ បង្សុកូល ឧទ្ទិសកុសលផលបុណ្យ ជូនដល់បុព្វការីជន មានជីដូន ជីតា មាតា បិតា គ្រូឧបជ្ឈាយាចារ្យ ញាតិកាទាំងប្រាំពីរសន្តាន ដែលបានចែកឋានទៅ សូមឲ្យបានទៅសោយសុខ នាទីស្ថានសុគតិភពកុំបីឃ្លៀងឃ្លាតឡើយ ព្រមទាំងវេរប្រគេនចតុបច្ច័យដល់ ព្រះសង្ឃគង់ចាំវស្សាអស់កាលត្រីមាស សម្រាប់ប្រើប្រាស់ ចាត់ចែងបន្តកសាងទីសេនាសនៈ នៅក្នុងអារាមវត្តផងដែរ ។ បច្ច័យ ទេយ្យទាន និង គ្រឿងអត្ថបរិក្ខា ដែលបានវេរប្រគេនព្រះសង្ឃ រួមមាន អង្ករ មី ទឹកត្រី ទឹកសុទ្ធ ទឹកផ្លែឈើ ទឹកស៊ីអ៊ីវ និង បច្ច័យ សម្រាប់កសាង ប្រគេនព្រះសង្ឃ ចំនួន៤,៥៦០,០០០រៀល ផងដែរ៕ សេង ណារិទ្ធ
