តាមរយៈទំព័រហ្វេសប៊ុកផេក អភិបាលខេត្តពោធិ៍សាត់ ឯកឧត្តម ខូយ រីដា បានបញ្ជាក់ថា គិតត្រឹមម៉ោង១២ថ្ងៃត្រង់ ទី២៩ ខែកញ្ញា ឆ្នាំ២០២៣នេះ ជំនន់ទឹកភ្លៀងបានប៉ះពាល់ស្រុក-ក្រុងចំនួន៤ និងប៉ះពាល់ប្រជាពលរដ្ឋចំនួន៣០០៤គ្រួសារ ព្រមទាំងបានជម្លៀសពលរដ្ឋទៅទីសុវត្ថិភាពចំនួន១៤១នាក់ ។
ដោយឡែកនៅរសៀលថ្ងៃដដែលនេះ នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១នៃគណ:កម្មាធិការជាតិគ្រប់គ្រងគ្រោះមហន្តរាយ , ឯកឧត្តម កែវ រតន: រដ្ឋមន្ត្រីក្រសួងរ៉ែ និងថាមពល និងឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំមន្ត្រី និងកម្លាំងប្រដាប់វុធចុះជួយទប់ទឹក និងចែកការ៉ុងសម្រាប់ច្រកខ្សាច់ជូនពលរដ្ឋតាមដងផ្លូវ ដែលមានលំនៅដ្ឋានតាមបណ្ដោយមាត់ស្ទឹងពោធិ៍សាត់។
បើតាមរបាយការណ៍របស់អាជ្ញាធរខេត្ត ទឹកស្ទឹងពោធិ៍សាត់ដែលហៀរចេញដោយសារជំនន់ភ្លៀងនេះ កំពុងប៉ះពាល់ក្រុងពោធិ៍សាត់ និងស្រុកកណ្ដៀង ដោយបានហូរដាច់ផ្លូវមួយចំនួន និងកន្លែងខ្លះទឹកនៅលើផ្លូវមិនអាចធ្វើដំណើរបាន៕
