ស្វាយរៀង ៖ នៅរសៀលថ្ងៃទី ១៩ ខែកញ្ញា ឆ្នាំ២០២៣ នេះ ឯកឧត្តម ម៉ែន អេង អភិបាលរងខេត្តស្វាយរៀង តំណាងលោកអភិបាលខេត្ត បានមានប្រសាសន៍ថា យើងទាំងអស់គ្នា ត្រូវរកដំណោះស្រាយរួម ពីទិដ្ឋភាពជាក់ស្តែង ពីព្រោះថា ផែនដី និងផែនទី វាពុំដូចគ្នាទេ ដូច្នេះក្នុងនាមយើង ជាអាជ្ញាធរស្រុក-ឃុំ ត្រូវបង្កើនការយកចិត្តទុកដាក់ ឲ្យបានខ្ពស់លើការងារមួយនេះ ក្នុងការចុះត្រួតពិនិត្យដី ស្ថានីយ៍ផ្សព្វផ្សាយ និងស្តារឡើងវិញ ព្រៃឈើក្រសាំង ជាប្រចាំ ។
ឯកឧត្តមអភិបាលរងខេត្ត បានមានប្រសាសន៍ដូច្នេះ នៅក្នុងឱកាសដែលលោកបាន អញ្ជើញជាអធិបតី នៅក្នុងកិច្ចប្រជុំពិភាក្សា លើករណី នៃការប្រើប្រាស់ដីស្ថានីយ៍ ផ្សព្វផ្សាយ និងស្ដារឡើងវិញ ព្រៃឈើក្រសាំង ស្ថិតក្នុងស្រុករមាសហែក ខេត្តស្វាយរៀង ដែលពិធីនេះ បានប្រព្រឹត្តទៅ នៅសាលប្រជុំរបស់សាលាខេត្តស្វាយរៀង។
ឯកឧត្តមអភិបាលរងខេត្ត បានមានប្រសាសន៍បន្តថា ចាប់ពីពេលនេះតទៅ បើសិនជា ប្រជាពលរដ្ឋមួយណា នៅតែបន្តធ្វើសកម្មភាពចាប់យកដីស្ថានីយ៍ផ្សព្វផ្សាយ និងស្តារឡើងវិញ ព្រៃឈើក្រសាំង យកមកធ្វើជាកម្មសិទ្ធិផ្ទាល់ខ្លួនទៀត សូមអាជ្ញាធរ ដែលមានសមត្ថកិច្ច អនុវត្តន៍ តាមនីតិវិធីផ្លូវច្បាប់។
ឯកឧត្តមអភិបាលរងខេត្ត បានមានប្រសាសន៍ ដោយសង្កត់ធ្ងន់ថា ដើម្បីដោះស្រាយបញ្ហា ទាំងនោះ ឲ្យឆាប់រួចរាល់មន្ត្រីជំនាញ ត្រូវសិក្សាពីសាវតាដីឡើងវិញ ដោយត្រូវធ្វើ បច្ចុប្បន្នភាព ឲ្យបានច្បាស់លាស់ ដើម្បីធ្វើរបាយការណ៍បំភ្លឺទៅស្ថាប័ន ដែលមានការ ពាក់ព័ន្ធជាមួយនឹងកិច្ចការរបស់ប្រជាពលរដ្ឋ នៅមូលដ្ឋានងាយស្រួលក្នុងការចេញ បណ្ណកម្មសិទ្ជិស្របច្បាប់៕
