(កំពង់ឆ្នាំង)៖ ក្នុងពេលទស្សនកិច្ចនូវសមិទ្ធផល និងផែនការអភិវឌ្ឍន៍នៅសហគមន៍តំបន់ការពារធម្មជាតិស្រែអំពិល ស្ថិតនៅភូមិក្តុល ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង នាព្រឹកថ្ងៃទី១៦ ខែកញ្ញា ឆ្នាំ២០២៣ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន បានជំរុញឱ្យប្រជាសហគមន៍ត្រូវបង្កើននូវការដាំដុះបន្ថែមទៀតនូវផលិតផលកសិកម្ម ដែលជាផ្នែកមួយសម្រាប់ការចិញ្ចឹមជីវិតប្រចាំថ្ងៃផង និងបង្កើតចំណូលប្រចាំថ្ងៃផង ការពឹងផ្អែកតែលើអនុផលព្រៃឈើតែមួយមុខ មិនអាចធ្វើឱ្យជីវភាពប្រជាពលរដ្ឋបានធូរធានោះទេ គួរគប្បីបន្ថែមផ្នែកសេវាទេសចរណ៍ទៀតទើបចំណូលប្រជាពលរដ្ឋមានច្រើនច្រក។
ក្រោយពីទទួលបានសេចក្តីរាយការណ៍ពីស្ថានភាពទីតាំងភូមិសាស្ត្រ និងស្ថានភាពផ្លូវថ្នល់របស់សហគមន៍តំបន់ការពារធម្មជាតិទាំង៦ ដែលថ្លែងឡើងដោយឯកឧត្តម ស៊ុន សុវណ្ណារិទ្ធ អភិបាលខេត្កកំពង់ឆ្នាំងរួចមក ឯកឧត្តម អ៊ាង សុផល្លែត បានបង្ហាញការគាំទ្រទាំងស្រុងលើការរៀបចំឱ្យមានហេដ្ឋារចនាសម្ពនផ្លូវថ្នល់នេះ ហើយក៏បានថ្លែងនូវការកោតសសើរដល់អភិបាលខេត្តដែលមានគំនិតផ្តួចផ្តើម និងរួមចំណែកធ្វើឱ្យបានលេចចេញជាសមិទ្ធផលឡើង។
ឯកឧត្តមរដ្ឋមន្ត្រីបានបញ្ជាក់ថា ការរៀបចំផ្លូវថ្នល់ ប្រព័ន្ធទំនាក់ទំនង ចំណតភ្ញៀវទេសចរ ពិតជាចំណែកជួយសហគមន៍ទាំង៦ឱ្យមានការតភ្ជាប់គ្នា ប្រកបដោយភាពទាក់ទាញទេសចរណ៍ តាមរយៈការទស្សនាធនធានធម្មជាតិដែលមានភាពខុសប្លែកគ្នាពីតំបន់មួយទៅតំបន់មួយទៀត។
ឯកឧត្តមរដ្ឋមន្ត្រីក៏បានជំរុញឱ្យប្រជាសហគមន៍ត្រូវបង្កើននូវការដាំដុះបន្ថែមទៀតនូវផលិតផលកសិកម្ម ដែលជាផ្នែកមួយសម្រាប់ការចិញ្ចឹមជីវិតប្រចាំថ្ងៃផង និងបង្កើតចំណូលប្រចាំថ្ងៃផង។
ឯកឧត្តមថា «ការពឹងផ្អែកតែលើអនុផលព្រៃឈើតែមួយមុខ មិនអាចធ្វើឱ្យជីវភាពប្រជាពលរដ្ឋបានធូរធានោះទេ គួរគប្បីបន្ថែមផ្នែកសេវាទេសចរណ៍ទៀតទើបចំណូលប្រជាពលរដ្ឋមានច្រើនច្រក»។
ឯកឧត្តម អ៊ាង សុផល្លែត បានសង្កត់ធ្ងន់ថា ការប្រែក្លាយសហគមន៍តំបន់ការពារ មកជាការផ្តល់សេវាកម្មទេសចរណ៍ គឺជាការចូលរួមចំណែកធ្វើឱ្យមានភាពអព្យាក្រឹត្យកាបូន នៅឆ្នាំ២០៥០ ឆ្ពោះទៅសេដ្ឋកិច្ចចក្រា ស្របតាមយុទ្ធសាស្ត្របញ្ចកោណរបស់រាជដ្ឋាភិបាលនីតិកាលទី៧៕
