ខេត្តបន្ទាយមានជ័យ ៖ តំបន់អភិរក្សចំនួន ១១កន្លែង តាមដងស្ទឹងសិរីសោភ័ណ កំពុងគោករាក់គ្មានទឹកប្រជាពលរដ្ឋកំពុងនាំគ្នា ចុះចាប់ត្រីយ៉ាងសប្បាយទៀតផង។
លោកហ៊ីសេងគ្រី ប្រធានសង្កាត់រដ្ឋបាលជលផល សិរីសោភ័ណ បានប្រាប់ថានៅតាមដង ស្ទឹងសិរីសោភ័ណមានតំបន់អភិរក្សត្រីចំនួន ១១ កន្លែង ដែលកំពុងប្រឈមខ្វះទឹក បណ្តាលឲ្យត្រី ពុលងាប់ស្ទើរគ្មានសល់។ទន្ទឹមនោះប្រជានេសាទមួយចំនួន បានលួចរកត្រីតំបន់នោះ ហើយមន្ត្រីជំនាញបាន និងកំពុងសហការជាមួយមន្ត្រីពាក់ព័ន្ធយកចិត្ត ទុកដាក់ការពារតាមតំបន់ អភិរក្សត្រីតាមដងស្ទឹងនេះ។
លោកបានបញ្ជាក់ទៀតថាតំបន់អភិរក្សចំនួន ១១កន្លែង ដែលប្រឈមខ្វះទឹកត្រីពុលងាប់ នោះរួមមាន ១.តំបន់អភិរក្សក្រោយសកលវិទ្យាល័យមានជ័យ ២. តំបន់អភិរក្សត្រីអន្លង់ខ្នុរ ៣. តំបន់អភិរក្សភូមិប្រហូត ៤. តំបន់អភិរក្សវត្តស្វាយ ៥. តំបន់អភិរក្សអូរម្កាក់ ៦. តំបន់អភិរក្សកន្ទួត ៧. តំបន់អភិរក្សកំព្រីង ៨. តំបន់អភិរក្សវត្តភ្នៀត ៩. តំបន់អភិរក្សដូនអ៊ិត ១០. តំបន់អភិរក្សរហាលស្នួល ១១. តំបន់អភិរក្សអង្គាបុស។
លោក ហ៊ីសេងគ្រី បានឲ្យដឹងថាដើម្បីជម្នះ ការលំបាកនេះអាជ្ញាធរ តាមមូលដ្ឋានបាន និងកំពុងមានវិធានការទប់ស្កាត់ ប្រជាកសិករឲ្យបញ្ឈប់ការបូមទឹក ដាក់ស្រូវដើម្បីការពារទឹក ទុកឲ្យប្រជាពលរដ្ឋប្រើប្រាស់ព្រោះថាប្រជាពលរដ្ឋ នឹងប្រឈមការអត់ទឹកប្រើប្រាស់ បើគ្មានភ្លៀងធ្លាក់រយៈ ពេលខាងមុខនេះ ៕
