កាលពីរសៀលថ្ងៃទី១៤ខែមិថុនាឆ្នាំ២០២៣ៗនៅមន្ទីរពេទ្យកុមារជាតិ មានរៀបចំកម្មវិធីបើក(ពិព៌ណបរិក្ខារវេជ្ជសាស្ត្ររបស់សាធារណរដ្ឋឆែក) ក្រោមកិច្ចសហការប្រតិបត្តិការរវាងមន្ទីរពេទ្យកុមារជាតិនៃក្រសួងសុខាភិបាលសហការជាមួយមូលនិធិ Vita et Futura  និងសមាគមរោងចក្រផលិតបរិក្ខារវេជ្ជសាស្ត្រ នៃសាធារណរដ្ឋឆែក ដោយមានការអញ្ជើញចូលរួមអធិបតីភាព លោកជំទាវវេជ្ជបណ្ឌិត យក់ សម្បត្តិ  រដ្ឋលេខាធិការប្រចាំការក្រសួងសុខាភិបាលនិង ឯកឧត្តមជីរី កូហ្សាក អនុរដ្ឋមន្ត្រីទី១នៃក្រសួងការបរទេស សាធារណៈរដ្ឋឆែក។

លោក សាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិបានមានប្រសាសន៍ថា÷ ពិព៌ណបរិក្ខារវេជ្ជសាស្ត្រទំនើបនៅមន្ទីរពេទ្យកុមារជាតិនាថ្ងៃនេះ នឹងជួយដល់មន្ទីរពេទ្យក្នុងការបង្កើនលទ្ធភាពផ្តល់សេវាសុខភាពបែបទំនើបកម្មនិងគុណភាពខ្ពស់ដល់មាតានិងទារកក្នុងនោះមានទាំងសេវារោគស្ត្រី សម្ភព ផែនការគ្រួសារ និងការថែទាំទារក នៅទូទាំងប្រទេសកម្ពុជា តាមរយៈការផ្តល់ជំនួយបរិក្ខាពេទ្យទំនើបពីភាគីក្រុមហ៊ុនផលិតបរិក្ខារវេជ្ជសាស្ត្រ LINET នៃសាធារណៈរដ្ឋឆែក ជូនដល់មន្ទីរពេទ្យកុមារជាតិ និង ការផ្តល់ជូននូវការបណ្តុះបណ្តាលពីបច្ចេកទេសនិងបច្ចកវិទ្យានៃការប្រើប្រាស់សម្ភារៈទំនើបទាំងនោះ អមជាមួយដោយ ការបណ្តុះបណ្តាលពង្រឹងសមត្ថភាពជំនាញបច្ចេកទេសថែទាំព្យាបាល ពីអ្នកជំនាញឯកទេសខាងសាធារណៈរដ្ឋឆែកដែលរៀបចំដោយ មូលនិធិ Vita et Futura   ដល់បុគ្គលិកនៃមន្ទីរពេទ្យកុមារជាតិផងដែរ។
លោកសាស្ត្រាចារ្យបានថ្លែងអំណរគុណដល់សមាគមរោងចក្រផលិតនិងផ្គត់ផ្គង់បរិក្ខារវេជ្ជសាស្ត្រនៃសាធារណៈរដ្ឋឆែក ជាពិសេសក្រុមហ៊ុនរោងចក្រផលិតបរិក្ខាវេជ្ជសាស្ត្រ LINET. ដែលបរិច្ចាកបរិក្ខាពេទ្យទំនើប ចំនួន៦មុខ ដែលសរុបជាទឹកប្រាក់ ជាង៥ម៉ឺនដុល្លារសហរដ្ឋអាមេរិក ក្នុងការជួយបង្កើនលទ្ធភាពដល់មន្ទីរពេទ្យកុមារជាតិ ដើម្បីអភិវឌ្ឍសេវាសុខាភិបាលកាន់តែទំនើប និង ងាយស្រួលសម្រាប់ប្រជាពលរដ្ឋ។
លោកសាស្ត្រាចារ្យបានបន្តថាបច្ចុប្បន្នមន្ទីរពេទ្យកុមារជាតិបានខិតខំប្រឹងប្រែងអភិវឌ្ឍទាំងគុណភាពសេវា បរិស្ថាន ហេដ្ឋារចនាសម្ព័ន្ធ  និងការពង្រឹងសមត្ថភាពរបស់បុគ្គលិកគ្រប់ជំនាញ ក្នុងគោលបំណងផ្តល់ជូននូវសេវាសុខាភិបាលដល់ប្រជាពលរដ្ឋទាំងអស់ឱ្យមានទំនុកចិត្ត លើការថែទាំព្យាបាលសុខភាពមាតា ទារកនិងកុមារ ប្រកបដោយ គុណភាព ប្រសិទ្ធិភាព និង ក្រមសីលធម៌វិជ្ជាជិវៈ។

លោកជំទាវវេជ្ជបណ្ឌិត យក់ សម្បត្តិ បានថ្លែងអំណរគុណដល់សាធារណរដ្ឋឆែក ដែលបាន សហការគាំទ្រវិស័យសុខាភិបាលកម្ពុជា ជាពិសេសមន្ទីរពេទ្យកុមារជាតិ ជាក់ស្ដែងក្នុងអំឡុងពេលដែលប្រទេសកម្ពុជា និងពិភពលោកបានរងវិបត្តិនៃការរាតត្បាតជំងឺកូវីដ-១៩ សាធារណរដ្ឋឆែកបានផ្ដល់ជំនួយជាសម្ភារៈបរិក្ខារពេទ្យមួយ ចំនួនដល់មន្ទីរពេទ្យកុមារជាតិ ក្នុងការទប់ស្កាត់ ឆ្លើយតបការរាតត្បាតជំងឺកូវីដ-១៩។

ឯកឧត្តម ជីរី កូហ្សាក អនុរដ្ឋមន្ត្រីទី១នៃក្រសួងការបរទេស សាធារណៈរដ្ឋឆែក បានសម្តែងនូវការកោតសរសើរចំពោះ ការអភិវឌ្ឍយ៉ាងឆាប់រហ័ស និងឥតឈប់ឈរលើគ្រប់វិស័យ នៅក្នុងព្រះរាជាណាចក្រកម្ពុជា រួមទាំងវិស័យសុខាភិបាល ជាពិសេសការគ្រប់គ្រងបាននូវការរីករាលដាលជំងឺកូវីដ-១៩ និងប្តេជ្ញាពង្រឹងនិងពង្រីកកិច្ចសហប្រតិបត្តិការក្នុងវិស័យ សុខាភិបាលរវាងប្រទេសទាំងពីរបន្ថែមទៀត៕