លោកជំទាវ បណ្ឌិត សឿ សុជាតា ៖ក្រសួងអប់រំ យុវជន និងខេត្តកំពង់ស្ពឺ បើកសិក្ខាសាលាផ្សព្វផ្សាយនិងជំរុញការអនុវត្តគោលនយោបាយជាតិស្តីពីសុខភាពសិក្សា
ខេត្តកំពង់ស្ពឺ៖ ថ្ងៃ១២ ខែមិថុនា ឆ្នាំ២០២៣ ក្នុងគោលបំណងលើកកម្ពស់គុណភាពប្រតិបត្តិកម្មវិធីគោលនយោបាយជាតិស្តីពីសុខភាពសិក្សា
ក្រសួងអប់រំ យុវជន និងកីឡា និងខេត្តកំពង់ស្ពឺបានបើកអង្គសិក្ខាសាលាផ្សព្វផ្សាយនិងជំរុញការអនុវត្តគោលនយោបាយជាតិស្តីពីសុខភាពសិក្សា ដែលប្រារព្វធ្វើនៅមន្ទីរអប់រំ យុវជន និងកីឡា ខេត្តកំពង់ស្ពឺ ដែលមានរយៈពេល២ គឺថ្ងៃទី ១២-១៣ ខែមិថុនា ឆ្នាំ២០២៣ ដែលមានសិក្ខាកាមដែលបានចូលរួមមានចំនួនជាង១០០នាក់ អញ្ជើញមកពីគ្រប់អង្គភាពស្ថាប័នចំណុះរដ្ឋបាលខេត្តកំពង់ស្ពឺ។
ក្នុងនាមឯកឧត្តម វ៉ី សំណាង អភិបាលខេត្តកំពង់ស្ពឺនាឱកាសនោះ លោកជំទាវ ឡុង បូណារ៉េត អភិបាលរង បានថ្លែងអំណរគុណដល់ថ្នាក់ដឹកនាំ មន្រ្តីរាជការក្រសួងអប់រំ យុវជន ដែលតែងតែគិតគូរសុខភាពសិក្សាដើម្បីពង្រឹងគុណភាពអប់រំដើម្បីកូនចៅយើងជាទំពាំងយើងលូតលាស់បានល្អ។
ក្នុងនាមឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្រ្តី ក្នុងឱកាសនោះ លោកជំទាវបណ្ឌិត សឿ សុជាតា ថា កម្ពុជាចាំបាច់ត្រូវមានធនធានមនុស្សដែលមានសម្បទាទាំង៥រឹងមាំ គឺចំណេះសម្បទា បំណិនសម្បទា កាយសម្បទា ចរិយាសម្បទា និងស្មារតីស្នេហាជាតិសម្បទា ដើម្បីសម្រេចគោលដៅអភិវឌ្ឍន៍ជាតិប្រែក្លាយប្រទេសទៅជាប្រទេសមានចំណូលមធ្យមកម្រិតខ្ពស់ឆ្នាំ២០៣០ និងជាប្រទេសមានចំណូលខ្ពស់ឆ្នាំ២០៥០ហើយសម្បទាទាំង៥នេះ អាចសម្រេចបាននោះគឺចាំបាច់ទាមទារការចូលរួមដោយស្មារតីទទួលខុសត្រូវរបស់យើងទាំងអស់គ្នាជាក្រុមការងារនិងមហាជនកម្ពុជាគ្រប់រូប។
លោកជំទាវបណ្ឌិត សឿ សុជាតា ក៏បានពាំនាំប្រសាសន៍ដឹកនាំ របស់ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្រ្តី និងជាប្រធានគណៈកម្មាធិការអន្តរក្រសួងស្តីពីសុខភាពសិក្សាគឺ ដើម្បីមនុស្សទាំងអស់អាចមានលទ្ធភាពក្លាយជាពលរដ្ឋសកម្មរបស់ជាតិជាពលរដ្ឋសកលបាន មនុស្សចាំបាច់ត្រូវមានសុខភាពល្អ គ្រប់ថ្នាក់ដឹកនាំនិងមន្រ្តីប្រតិបត្តិគ្រប់ផ្នែកទាំងអស់យកចិត្តទុកដាក់អនុវត្តតាមផែនការប្រតិបត្តិ១០ឆ្នាំរបស់យើង ។
ជាមួយគ្នានេះ លោកជំទាវបណ្ឌិត សឿ សុជាតា បាថ្លែងបន្ថែមទៀត ដោយបញ្ជាក់ថា មនុស្សមានសុខភាពល្អបានទាល់តែមនុស្សស្គាល់ពីតម្លៃសុខភាពនិងយល់ច្បាស់ពីវិធានថែរក្សាសុខភាព ព្រមទាំងចេះស្រឡាញ់សុខភាពរបស់ខ្លួនឯងនិងរបស់មនុស្សជុំវិញខ្លួន ។
