(ពោធិ៍សាត់)៖ ប្រជាពលរដ្ឋជាង២ពាន់នាក់ រស់នៅស្រុកកណ្តៀង និងស្រុកក្រគរ ខេត្តពោធិ៍សាត់ ទទួលបានការពិនិត្យនិងព្យាបាលជំងឺភ្នែកដោយឥតគិតថ្លៃពីក្រុមគ្រូពេទ្យស្ម័គ្រចិត្តមកពីប្រទេសម៉ាឡេស៊ី នៅថ្ងៃទី៩-១០ តាមរយៈការសម្របសម្រួលពីលោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា ប្រធានក្រុមការងាររាជរដ្ឋាភិបាលចុះជួយស្រុកក្រគរ និងស្រុកកណ្តៀង និងជាបេក្ខជនតំណាងរាស្ត្រខេត្តពោធិ៍សាត់ និងលោក ខូយ រីដា អភិបាលខេត្តពោធិ៍សាត់។
លោក ខូយ រីដា និងលោក កែវ រតនៈ បានថ្លែងកោតសរសើរ និងអំណរគុណដោយស្មោះចំពោះក្រុមហ៊ុន PESTECH កម្ពុជា ដែលតែងតែកៀរគរ ក្រុមគ្រូពេទ្យស្ម័គ្រចិត្តមកព្យាបាលជំងឺដោយឥតគិតថ្លៃជូនប្រជាពលរដ្ឋតាមបណ្តាខេត្តទូទាំងប្រទេស ជាក់ស្តែងនាឆ្នាំនេះ ក្រុមហ៊ុន PESTECH កម្ពុជា បាននាំយកក្រុមគ្រូពេទ្យស្ម័គ្រចិត្តមកពីប្រទេសម៉ាឡេស៊ីចំនួន៣០នាក់ ដោយសហការជាមួយពេទ្យស្ម័គ្រចិត្តរបស់លោក កែវ រតនៈ និងក្រុមយុវជន បានមកពិនិត្យ និងព្យាបាលជំងឺភ្នែកដោយឥតគិតថ្លៃជូនដល់ប្រជាពលរដ្ឋក្នុងស្រុកកណ្តៀង បានជិត២ពាន់នាក់ និងត្រូវប្រគល់ជូនប័ណ្ណថ្លែងអំណរគុណនាពេលនេះផងដែរ។
ថ្នាក់ដឹកនាំទាំង២បន្ថែមថា បច្ចុប្បន្ននៅខេត្តពោធិ៍សាត់ ទោះបីមានការអភិវឌ្ឍខ្លះក៏ពិតមែន ក៏នៅមានការខ្វះខាតចន្លោះផ្នែកបច្ចេកទេស និងសម្ភារៈមិនទាន់ទំនើបសម្បបូរបែបនៅឡើយ ដូច្នេះនៅពេលនេះបានក្រុមគ្រូពេទ្យស្ម័គ្រចិត្តមកពីប្រទេសម៉ាឡេស៊ីបានមកជួយពិគ្រោះយោបល់ និងព្យាបាលជំងឺភ្នែកជូនដល់ប្រជាពលរដ្ឋដោយឥតគិតថ្លៃ គឺជាការជួយសម្រួលនូវបន្ទុកសេវាចំណាយរបស់ពួកគាត់បានមួយកម្រិត។
សកម្មភាពមនុស្សធម៌នេះដែរ គឺពិតជាបានចូលរួមចំណែកជាមួយរាជរដ្ឋាភិបាលកម្ពុជា ដែលបាននិងកំពុងតែយកចិត្តទុកដាក់យ៉ាងខ្លាំងចំពោះសុខមាលភាពរបស់ប្រជាពលរដ្ឋ។ ថ្នាក់ដឹកនាំទាំង២ក៏បានសំណូមពរឱ្យក្រុមហ៊ុន PESTECH កម្ពុជា បន្តកៀរគរក្រុមគ្រូពេទ្យស្ម័គ្រចិត្តបន្តសកម្មភាព ក្នុងការចូលរួមចំណែកជួយដល់ប្រជាពលរដ្ឋខេត្តពោធិ៍សាត់បន្ថែមទៀត។
ប្រជាពលរដ្ឋដែលមកទទួលសេវាពិនិត្យ និងព្យាបាលនាឱកាសនោះ បានគោរពថ្លែងអំណរគុណដល់ក្រុមគ្រូពេទ្យស្ម័គ្រចិត្តមកពីប្រទេសម៉ាឡេស៊ី និងក្រុមគ្រូពេទ្យស្ម័គ្រចិត្តរបស់លោក កែវ រតនៈ រួមជាមួយក្រុមយុវជន ដែលបានមកពិនិត្យ និងព្យាលបាលជំងឺភ្នែកដោយឥតគិតថ្លៃជូនប្រជាពលរដ្ឋក្នុងស្មារតីមនុស្សធម៌សុទ្ធសាធ។ ពួកគាត់បានប្តេជ្ញារួបរួមសាមគ្គីគ្នាតែមួយ អនាគតតែមួយ ក្រោមម្លប់សន្តិភាពតែមួយ និងទៅចូលរួមបោះឆ្នោតនាថ្ងៃទី២៣ ខែកក្កដា ឆ្នាំ២០២៣ឱ្យបានគ្រប់ៗគ្នា៕
