អគារដែលជាសមិទ្ធផលថ្មីបានមកពីគម្រោងផែនការអភិវឌ្ឍន៍របស់អាជ្ញាធរឃុំថ្មស និងថវិកាពីសប្បុរសជន មានជា៤បន្ទប់ធំៗដោយបែងចែកជាទី១-បន្ទប់សម្រាកត្រៀមសម្រាលកូន ទី២-បន្ទប់ស្រ្តីសម្រាកសម្រាលកូន ទី៣-បន្ទប់ពលរដ្ឋសម្រាកថែទាំជំងឺរយៈពេលខ្លី និងទី៤-បន្ទប់សង្រ្គោះបឋម និងវះកាត់តូច។ លោក អ៊ួន សារុន ប្រធានមណ្ឌលសុខភាពថ្មស លើកឡើងក្នុងពិធីសម្ពោធដាក់ឱ្យប្រើប្រាស់អគារថ្មីផ្នែកសុខាភិបាលនេះថា មុននឹងមានអគារថ្មី អគារចាស់សង់ពីឈើប្រកស័ង្កសីមាន២បន្ទប់ និងមានសំយ៉ាកសម្រាប់ចង្កានដាំស្លរ មានសភាពពុកផុយនិងបាក់បែកជាបណ្តើរៗ។ ទើបស្នើសុំទៅអាជ្ញាធរឃុំ និងសប្បុរសជនផ្តល់ការគាំទ្រអភិវឌ្ឍន៍កសាងឡើងជូនប្រជាពលរដ្ឋដែលមានតម្រូវការសេវាជាចាំបាច់បំផុតប្រចាំថ្ងៃ។លោក លោក អ៊ួន សារុន មិនខុសពីមន្រ្តីសុខាភិបាលរបស់ខ្លួនដែរ ពោលគឺរំពឹងថា ប្រជាពលរដ្ឋគ្រប់វ័យ ពិសេសស្រ្តីនៅក្នុងមូលដ្ឋាននឹងលែងព្រួយបារម្ភពីការមកទទួលសេវាសម្រាកសម្រាលកូនទៀតហើយ ខណៈមានអគារថ្មីត្រៀមចាំបម្រើសេវាគ្រប់ពេលវេលា។ដោយឡែកលោក ក្រូច បូរីសីហា អភិបាលស្រុកបូទុមសាគរ បានចាត់ទុកសមិទ្ធផលថ្មីនេះជាអាទិភាពលើវិស័យសុខាភិបាលក្នុងមូលដ្ឋានដែលមានមណ្ឌលសុខភាពលក្ខណៈស្តង់ដារល្អប្រណិតមួយ ដើម្បីបង្កលក្ខណៈងាយស្រួលដល់ប្រជាពលរដ្ឋមកទទួលសេវាពិនិត្យ និងព្យាបាលមិនចាំបាច់ទៅកន្លែងផ្សេងឆ្ងាយ និងចំណាយថវិកាច្រើននោះទេ។លោកអភិបាលស្រុកបូទុមសាគរ ក៏គាំទ្រពេញទំហឹងនូវសកម្មភាពចូលរួមរបស់សប្បុរសជន និងអាជ្ញាធរមូលដ្ឋាន ដែលប្រឹងប្រែងគៀងគរថវិកាមកអភិវឌ្ឍន៍ឱ្យចេញជារូបរាងនៅអគារថ្មីស្រឡាងនេះឡើង ព្រមទាំងជាសក្ខីភាពផ្តល់ទំនុកចិត្តពីមហាជនលើកិច្ចការលើកកម្ពស់វិស័យសុខាភិបាលកាន់ល្អប្រសើរ។ មណ្ឌលសុខភាពថ្មស មានការប្រចាំការ២៤ម៉ោង និងបម្រើសេវា៧ថ្ងៃក្នុង១សប្តាហ៍។ បើគិតជាមធ្យមក្នុង១ខែៗ មណ្ឌលសុខភាពបានផ្តល់សេវាគ្រោះពិនិត្យជំងឺក្រៅចន្លោះពី៣៥០នាក់-៤៥០នាក់។ ការពិនិត្យផ្ទៃពោះសរុប ចន្លោះពី៤០-៥០នាក់។ ចាក់វ៉ាក់សាំងដល់កុមារក្រោម២ឆ្នាំ ចន្លោះពី៥០នាក់-៦០នាក់។ សម្រាលកូន ជាមធ្យមចំនួន ៨-១០នាក់។ ការពន្យាកំណើតស្ត្រីវ័យបន្តពូជ បន្ត(មានប្តី)ជិត៩០០នាក់ និងមានប្រព័ន្ធបញ្ជូនទៅមន្ទីពេទ្យបង្អែកចន្លោះពី៣-៥ជើង។ មណ្ឌលសុខភាពថ្មស សព្វថ្ងៃ មានបុគ្គលិកបម្រើការងារប្រុស-ស្រី ចំនួន១០នាក់ ក្នុងនោះមានឆ្មប៣នាក់ វេជ្ជបណ្ឌិត១នាក់ គិលានុបដ្ឋាក៥នាក់ និងកម្មករ១នាក់។ ក្រៅពីការសេវាពិនិត្យជំងឺទូទៅ មណ្ឌលសុខភាព ក៏ត្រួតពិនិត្យមាត់ស្បូនដើម្បីស្រាវជ្រាវរកមហារីកស្បូន លើស្ត្រី និងមានចាក់វ៉ាក់សាំងការពារមហារីកមាត់ស្បូនលើកុមាររីក្នុងអាយុ៩ឆ្នាំក្នុងខែសីហាក្រោយនេះ។ ការផ្តល់សេវាស្រាវជ្រាវរកមេរោគ ដើម្បីព្យាបាលជំងឺឆ្លង ដូចជាគ្រុនចាញ់និងរបេងជាដើម(ដោយមិនគិតថវិកា) និងតាមដានជំងឺមិនឆ្លងក្នុងសហគមន៍ ដូចជាជំងឺទឹកនោមផ្អែមនិងលើសសំពាធឈាម ពិសេសប្រជាជនដែលមានអាយុលើស៥០ឆ្នាំ។ បច្ចុប្បន្នមណ្ឌលសុខភាពគ្របដណ្តប់ប្រជាជនចំនួន៩.៩៩៤នាក់ មាន១ឃុំ និង៥ភូមិ ជារៀងរាល់ខែបុគ្គលិក២រូបធ្វើការចុះផ្តល់សេវាសុខភាពដល់មូលដ្ឋានចំនួន៣ នៃភូមិឆ្ងាយជាងគេ មានភូមិចំការលើ ភូមិស្រែថ្មី និងភូមិចំលងគោ៕