បណ្ឌិត ហ៊ុន ម៉ាណែត៖ បើស្រឡាញ់បក្ស កុំធ្វើរឿងអវិជ្ជមានបំផ្លាញបក្ស
(ភ្នំពេញ)៖ លោកបណ្ឌិត ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេនមកពីគណបក្សប្រជាជនកម្ពុជា បានអំពាវនាវដល់មន្ត្រីបក្សប្រជាជនកម្ពុជាមួយចំនួនតូច ដែលចូលចិត្តធ្វើរឿងអសកម្ម រឿងអវិជ្ជមានឱ្យបញ្ឈប់សកម្មភាពរបស់ពួកគេ បើពួកគេពិតជាស្រឡាញ់គណបក្សប្រជាជនកម្ពុជាមែននោះ។
តាមរយៈវីដេអូបង្ហោះនាព្រឹកថ្ងៃព្រហស្បតិ៍ ទី០១ ខែមិថុនា ឆ្នាំ២០២៣នេះ លោកបណ្ឌិត ហ៊ុន ម៉ាណែត បានលើកឡើងថា មន្ត្រីបក្សប្រជាជនកម្ពុជាជាង ៧០ភាគរយ មានភាពសកម្មខ្លាំងណាស់ក្នុងសកម្មភាពបម្រើជាតិ និងប្រជាជន។ ប៉ុន្តែក៏នៅមានមន្ត្រីបក្សប្រជាជនមួយចំនួនធ្វើរឿងអសកម្មបង្កការថ្នាំងថ្នាក់ចំពោះប្រជាពលរដ្ឋ។
បេក្ខភាពនាយករដ្ឋមន្ត្រីបន្តវេនរបស់បក្សប្រជាជនកម្ពុជាដ៏មានប្រជាប្រិយភាពរូបនេះ បានគូសបញ្ជាក់បែបនេះ «គណបក្សប្រជាជនកម្ពុជា សម្តេចតេជោ ហ៊ុន សែន ខំប្រឹងណាស់ មន្ត្រីរាប់ម៉ឺននាក់ទូទាំងប្រទេសខំធ្វើអំពើល្អ។ តែមនុស្សមួយក្តាប់តូចបំផ្លាញ តើនេះឬការស្មោះត្រង់ជាមួយបក្ស? បក្សបម្រើប្រជាពលរដ្ឋ បើស្មោះជាមួយបក្សមិនបាច់ធ្វើអ្វីទេ កុំតែធ្វើអវិជ្ជមានប៉ះប្រជាជនទៅ ក៏ជួយបក្សដែរ។ នៅតែផ្ទះក៏ល្អដែរ ជាជាងចុះទៅធ្វើបំផ្លាញ»។
លោកបណ្ឌិត ហ៊ុន ម៉ាណែត បន្ថែមថា «ចែវទូកជាមួយគ្នា បើទូកទៅលឿនកុំយកជើងរាទឹក។ ដាក់ជើងនៅក្នុងហ្នឹងទៅល្អជាង ជិះបានទៅទាំងអស់គ្នា មិនបាច់ជួយចែវក៏បានដែរ»។
ក្នុងវីដេអូនេះ លោកបណ្ឌិត បានសូមប្រជាពលរដ្ឋមេត្តាយោគយល់ដល់បក្សប្រជាជន កម្ពុជា ចំពោះភាពអសកម្មរបស់មន្ត្រីមួយក្តាប់តូចនោះ ហើយចូលរួមជាមួយបក្ស ដើម្បីកែលំអរមន្ត្រីអសកម្ម។
លោកបណ្ឌិត ក៏សូមឱ្យប្រជាពលរដ្ឋមើលព្រៃទាំងមូល ដោយលោកចង់សម្តៅដល់សមិទ្ធផលទាំងឡាយកើតមាននៅក្នុងប្រទេស ក្រោមការដឹកនាំរបស់គណបក្សប្រជាជនកម្ពុជា មានសម្តេចតេជោ ហ៊ុន សែន ជាប្រមុខ។
លោក ហ៊ុន ម៉ាណែត ក៏សូមឱ្យប្រជាពលរដ្ឋជឿជាក់ចុះថា ដរាបណាគណបក្សប្រជាជនកម្ពុជានៅតែដឹកនាំប្រទេស គឺមិនដាក់ចេញគោលនយោបាយបំផ្លាញប្រជាពលរដ្ឋនោះឡើយ៕
