ខេត្តរតនគិរី ៖ រថយន្តខ្នាតយក្សចំនួន០៤គ្រឿង ដឹកឈើក្រហមប្រភេទផ្ចឹកសុក្រំខ្លុង និងត្បែង ហើយសង្ស័យបង្កប់ឈើប្រណិតថែមទៀត នៅត្រង់ចំណុចផ្លូវចាស់ ចេញពីក្រុមហ៊ុន“ស៊ីវហ្កិច“ ក្នុងឃុំស្រែគ ស្រុកសេសាន្ត ខេត្តស្ទឹងត្រែង ឆ្លងកាត់ឃុំត្រពាំងក្រហម ត្រូវបានកំលាំងចំរុះរបស់ខេត្តសហការជាមួយស្រុកកូនមុំ ដឹកនាំដោយលោក ជា ពេជ្រ ព្រះរាជអាជ្ញាអមសាលាដំបូងខេត្ត ស្ទាក់បង្ក្រាបបាននៅចំណុចផ្លូវកែង ស្ថិតនៅភូមិ០៣ត្រពាំងក្រហម ឃុំត្រពាំងក្រហម ស្រុកកូនមុំ ខេត្តរតនគិរី នៅវេលាម៉ោង១១.៤៦នាទី យប់ថ្ងៃទី២៥ ខែសីហា ឆ្នាំ២០១៧ ហើយបញ្ជូនទៅរក្សារទុកនៅខណ្ឌ័រដ្ឋបាលព្រៃឈើខេត្តដើម្បីចាត់ការបន្ត ។
តាមប្រភពពីសមត្ថកិច្ចដែលបានចុះបង្ក្រាបផ្ទាល់នោះបានបង្ហើបឱ្យដឹងថា រថយន្តទាំងបួនគ្រឿងនោះ ដឹកឈើចេញពីក្រុមហ៊ុន “ស៊ីវហ្កិច“ ហើយមានច្បាប់ចំនួន០៣គ្រឿង អត់ច្បាប់មួយគ្រឿង ហើយសុទ្ធតែផ្ទុកលើសពីលិខិតអនុញ្ញាតឱ្យដឹកជញ្ជូន ដែលបម្រុងដឹកចេញទៅខេត្តព្រៃវែងនិងរាជធានីភ្នំពេញ។
ទាក់ទិននឹងការឃាត់រថយន្តដឹកឈើក្រហម៤គ្រឿងនេះ លោករស់វណ្ណាមេបញ្ជាការអាវុធហត្ថស្រុកកូនមុំ បានឲ្យដឹងថា កម្លាំងបានប្រគលឱ្យដំណាងអយ្យការអមសាលាដំបូងខេត្តរតនគិរី ត្រួតពិនិត្យមើលរួចប្រគល់ឱ្យជំនាញ។
ខណៈពេលនោះ គេសង្កេតឃើញបុរសម្នាក់ដែលជាអ្នករត់ការក្បួនរថយន្តដឹកឈើនោះ បានអះអាងថា ក្រុមហ៊ុនមានច្បាប់ត្រឹមត្រូវ (PC)លិខិតអនុញាតិឲ្យដឹកជញ្ជូនឈើតាមច្បាប់។
ប៉ុន្តែជំនាញរដ្ឋបាលព្រៃឈើ និងសមត្ថកិច្ចពាក់ព័ន្ធដឹកនាំ ដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរីដើម្បី ផ្ទៀងផ្ទាត់ទៅនឹង(PC)ឃើញថាមិនត្រឹមត្រូវនោះទេ។ ហើយសមត្ថកិច្ចក៏បានបញ្ជូនទៅខណ្ឌ័រដ្ឋបាលព្រៃឈើខេត្តរងចាំធ្វើការរើត្រួតពិនិត្យវាស់វែងបន្តទៀត ៕
