កំពត ៖ ទិវាអភិវឌ្ឍន៍វិជ្ជាជីវៈវេជ្ជសាស្ត្របន្តលើកទី៦ ឆ្នាំ២០១៧ របស់ក្រុមប្រឹក្សាគណៈគ្រូពេទ្យខេត្តកំពត-កែប ត្រូវបានរៀបចំឡើងក្នុងសាលប្រជុំមន្ទីរសុខាភិបាលខេត្តកំពត នាព្រឹកថ្ងៃទី២៥ខែសីហា ឆ្នាំ២០១៧ ក្រោមវត្តមាន លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិ ហែរហមដោយលោកវេជ្ជបណ្ឌិតល្បីៗជាច្រើនរូបក្នុងរាជធានីភ្នំពេញ រួមនឹងក្រុមគ្រូពេទ្យតាមតំបន់នានាទូទាំងខេត្តកំពត-កែប ផងដែរ។
តាមរបាយការណ៍របស់លោក កែវ សុផាន់ ប្រធានក្រុមប្រឹក្សាគណៈគ្រូពេទ្យខេត្តកំពត-កែប បានបញ្ជាក់ថា ការធ្វើទិវានេះ ដោយមន្ទីរសុខាភិបាលខេត្ត ក៏ដូចជាក្រុមប្រឹក្សាគណៈគ្រូពេទ្យ ខេត្តកំពត-កែប សហការជាមួយគណៈគ្រូពេទ្យជាតិ និងមានការជួយ ឧបត្ថម្ភ គាំទ្រពីក្រុមហ៊ុនBayer-Cambodia Bayer-DKSH PPCP Mega We Careនិងក្រុមហ៊ុនមួយចំនួនទៀត។លោកថា ការរៀបចំទិវានេះគឺជាយន្តការដ៏សំខាន់ សំដៅពង្រឹងក្រមសីលធម៌នៃវិជ្ជាជីវៈរបស់គ្រូពេទ្យ បង្កើននូវគុណវុឌ្ឃន៍ គុណភាព សុវត្ថិភាពនៃការប្រើប្រាស់ឱសថ ក៏ដូចជាការចូលរួមកាត់បន្ថយនូវអាត្រាស្លាប់ ឬហានិភ័យផ្សេងៗ ក្នុងការផ្តល់សេវាសុខាភិបាល ទាំងក្នុងសេវាសាធារណៈ និងសេវាឯកជន។
លោកបានបន្តថា ជារួមសកម្មភាពដែលបានអនុវត្តក្នុងអាណតិ្តជាង១ឆ្នាំកន្លងមក គឺបានបោះឆ្នោត ជ្រើសរើសក្រុមប្រឹក្សាគណៈគ្រូពេទ្យខេត្តកំពត-កែប អាណតិ្ត៦ឆ្នាំ លើកទី៣ និងការិយាល័យក្រុមប្រឹក្សាគណៈគ្រូពេទ្យខេត្តកំពត-កែប អាណតិ្ត២ឆ្នាំលើកទី១ នៅថ្ងៃទី២៩ខែមីនា ឆ្នាំ២០១៦កន្លងមក ដែលទទួលបានសមាជិកពេញសិទ្ធ១១រូប និងសមាជិកបំរុង១១រូប ស្របតាមសេចក្តីណែនាំរបស់ក្រុមប្រឹក្សាគណៈគ្រូពេទ្យជាតិ ផងដែរ។
ឆ្លៀតឱកាសនោះ លោកសាស្ត្រាចារ្យ ធា គ្រុយ ប្រធានក្រុមប្រឹក្សាគណៈគ្រូពេទ្យជាតិ បានលើកយកគន្លឹះសំខាន់ៗជាច្រើនសំដៅលើកកម្ពស់នូវគុណតម្លៃរបស់គ្រូពេទ្យ ទាំងផ្នែកសេវាសាធារណៈ និងសេវាឯកជន ដោយលោកបាននិងកំពុងជម្រុញដល់ក្រុមគ្រូពេទ្យដែលបានបម្រើផ្នែកសេវាសុខាភិបាល ទាំងអម្បាលមាន
ត្រូវតែមកចុះបញ្ជីរការដើម្បីទទួលអាជ្ញាប័ណ្ណឲ្យបានត្រឹមត្រូវ ទៅតាមទម្រង់បែបបទ សុពលភាពដែលបានកំណត់រយៈពេល៣ឆ្នាំម្តង ហើយការបើកបម្រើសេវាព្យាបាល ក៏ត្រូវពិនិត្យឲ្យបានហ្មត់ចត់ផងដែរ។
នេះជាទិវាដ៏មានអត្ថប្រយោជន៍បំផុត សម្រាប់ស្វែងរកគ្រូពេទ្យដែលមានជំនាញច្បាស់លាស់ មានក្រមសីលធម៌ មានសមត្ថភាពប្រកបដោយចំណេះដឹងលើផ្នែកវេជ្ជសាស្ត្រ ព្រោះការបើកគ្លីនិក ឬការបើកកន្លែងផ្តល់សេវាសុខភាពក្តីពិតជាត្រូវការគ្រូពេទ្យដែលមានជំនាញដែលបានទទួលស្គាល់ពីក្រុមប្រឹក្សាគណៈគ្រូពេទ្យជាតិ ដោយមិនអាចយកការព្យាបាលសម្រាប់ធ្វើជាបទពិសោធន៍ការងារបានឡើយ។ម្យ៉ាងទៀតបើផ្អែកលើមូលដ្ឋានសំខាន់ៗជាច្រើន កត្តាខ្លះក៏អាចកើតឡើងដោយសារការធ្វេសប្រហែសរបស់គ្រូពេទ្យជំនាញផងដែរ ដូចជាគ្រូពេទ្យមួយចំនួនអសកម្មនឹងការងារ ចិត្តមិននឹងន៎ ហើយមិនប្រកាន់ខ្ជាប់នូវឋានៈ តួនាទីរបស់ខ្លួនជាដើម។
ជាចុងក្រោយ លោកសាស្ត្រាចារ្យ ក៏បានក្រើនរំលឹក ដល់ក្រុមប្រឹក្សាគណៈគ្រូពេទ្យ ទាំងអស់ ទោះជាអ្នកបើកសេវាបម្រើសាធារណៈ ឬសេវាឯកជន និងពេទ្យឆ្មបក្តី ត្រូវតែអនុវត្តទៅតាមវិជ្ជាជីវៈរបស់ខ្លួន ព្រោះការផ្តល់សេវាព្យាបាលគឺជាករណីមួយដែលយើងមិនគួរធ្វេសប្រហែសឡើយ ៕
ណារិទ្ធ
