កំពត ៖ ពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរសកិ្ត ជូនដល់មន្ត្រីនគរបាលជាតិ នៃស្នងការដ្ឋាននគរបាលខេត្តកំពត ត្រូវបានធ្វើឡើងនៅព្រឹកថ្ងៃទី០៤ខែសីហា ឆ្នាំ២០១៧ ក្រោមវត្តមាន លោកឧត្តមសេនីយ៍ឯក ប៉ែន វិបុល អគ្គស្នងការរង និងជាប្រធាននាយកដ្ឋានបុគ្គលិក តំណាងដ៏ខ្ពង់ខ្ពស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ លោកជឹង ផល្លា អភិបាលរងនៃគណៈអភិបាលខេត្តកំពត ព្រមទាំងមានការចូលរួម ពីសំណាក់មន្ត្រីនគរបាលជាន់ខ្ពស់ជាច្រើនរូប មេបញ្ជាការកងកំលាំងប្រដាប់អាវុធគ្រប់អង្គភាព លោក លោកស្រីជាស្នងការរង អាជ្ញាធរដែនដីគ្រប់លំដាប់ថ្នាក់ និងមន្ត្រីនគរបាលគ្រប់ជាន់ថ្នាក់ក្នុងជួរអង្គភាពទាំងមូលផងដែរ។
ដោយយោងតាមព្រះរាជក្រឹត្យ អនុក្រឹត្យ ប្រកាសរបស់ក្រសួងមហាផ្ទៃ ស្តីពីការផ្ទេរភារកិច្ច តែងតាំងមុខតំណែង និងបំពាក់ឋានន្តរសកិ្ត ដល់មន្ត្រីនគរបាលជាតិក្នុងព្រឹកនេះ ត្រូវបានផ្ទេរភារកិច្ចចំនួន០១រូប តែងតាំងមុខតំណែងចំនួន០៩រូប តម្លើងឋានន្តរសកិ្តចំនួន០៣រូប ក្នុងនោះមានថ្នាក់ឧត្តមសេនីយ៍ត្រី០២រូប និងថ្នាក់វរសេនីយ៍ត្រី០១រូប។
តាមរបាយការណ៍របស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានបញ្ជាក់ថា ក្នុងត្រីមាសទីមួយ ឆ្នាំ២០១៧នេះ លទ្ធផលគួរឲ្យកត់សម្គាល់របស់កងកម្លាំងនគរបាលខេត្តកំពត គឺបង្ក្រាបបានករណីប្លន់ប្រដាប់អាវុធជាច្រើនភូមិសាស្ត្រខេត្ត រួមមាន៖ ខេត្តកំពត ខេត្តព្រះសីហនុ ខេត្តកែប ខេត្តតាកែវ និងខេត្តកំពង់ស្ពឺ ដែលតែងតែធ្វើសកម្មភាពច្រើនលើកនៅចុងឆ្នាំ២០១៦និងដើមឆ្នាំ២០១៧ ។ ដោយឡែកខេត្តកំពត មានធ្វើសកម្មភាពប្លន់ប្រដាប់អាវុធជាបន្តបន្ទាប់នៅក្នុងស្រុកចំនួន៥ គឺស្រុកជុំគិរី ស្រុកឈូក ស្រុកដងទង់ ស្រុកបន្ទាយមាស និងស្រុកទឹកឈូ ។ តាមរយៈនៃការខិតខំ ប្រឹងប្រែងរបស់កម្លាំងជំនាញខេត្តនិងស្រុកបានសហការប្រើប្រាស់ការងារជំនាញស្រាវជ្រាវ និងសហការយ៉ាងស្អិតរមួត ជាមួយកម្លាំងនគរបាលខេត្តកំពង់ស្ពឺ រួមជាមួយនឹងកម្លាំងនាយកដ្ឋាននគរបាលព្រហ្មទណ្ឌផងដែរ ។
លោកស្នងការបានបន្តថា ដោយអនុវត្តកម្មវិធីកំណែទម្រង់កងកម្លាំងប្រដាប់អាវុធ និងនគរបាលជាតិ ថ្នាក់ដឹកនាំក្រសួងមហាផ្ទៃ ថ្នាក់ដឹកនាំអគ្គស្នងការនគរបាលជាតិ និងអាជ្ញាធរខេត្ត បានធ្វើការសម្របសម្រួលជាបន្តបន្ទាប់និងជាជំហានៗ ស្របតាមទិដ្ឋភាពនិងតម្រូវការចាំបាច់ផ្សេងៗ។
លោកជឹង ផល្លា អភិបាលរងខេត្តកំពត ក៏បានលើកឡើងនូវគោលការណ៍ចម្បងជាច្រើន សម្រាប់ដាក់ទិសដៅដល់កងកម្លាំងនគរបាលជាតិ ពិសេសកម្លាំងស្នងការដ្ឋាននគរបាលខេត្តកំពត ដើម្បីសម្រេចភារកិច្ចបានជោគជ័យបន្ថែមទៀត ហើយលោកក៏សូមកោតសរសើរដល់ស្នាដៃឆ្នើមរបស់ លោកឧត្តមសេនីយ៍ទោ ស្នងការនគរបាលខេត្តកំពត ដែលកន្លងមកបានខិតខំអនុវត្តន៍ការងារបានទទួលលទ្ធផលដ៏គាប់ប្រសើរ ពិសេសបានសាងស្នាដៃ និងសមិទ្ធិផលជាច្រើនក្នុងអង្គភាពរបស់ខ្លួនយ៉ាងច្រើនស្ទើរាប់ពុំអស់ សម្រាប់លើកកម្កើងខេត្តកំពតទាំងមូល។
មានប្រសាសន៍ផ្តាំផ្ញើរក្នុងឱកាសនេះ លោកឧត្តមសេនីយ៍ឯក ប៉ែន វិបុល អគ្គស្នងការរងនគរបាលជាតិ បានសង្កត់ធ្ងន់ និងវាយតម្លៃខ្ពស់នូវស្នាដៃដ៏ល្អឯករបស់លោកស្នងការនគរបាលខេត្តកំពត ដែលមានសមត្ថភាពដឹកនាំមន្ត្រីក្នុងអង្គភាពបានល្អប្រសើរ ថែមទាំងបានកសាងស្នាដៃជាច្រើនសម្រាប់អង្គភាព ប្រកបដោយការរីកចម្រើនស្ទើស្មានមិនដល់។ដូច្នេះសូមឲ្យលោកស្នងការខិតខំប្រឹងប្រែងបន្តទៀត ដើម្បីដឹកនាំកម្លាំងដើម្បី រក្សាសន្តិសុខ សុវត្ថិភាពជូនប្រជាពលរដ្ឋ ស្របតាមគោលការណ៍របស់ក្រសួងមហាផ្ទៃ និងតាមទិសដៅរបស់រាជរដ្ឋាភិបាល ៕
ណារិទ្ធ
