ខេត្តប៉ៃលិន៖ ព្រឹកថ្ងៃទី១៥ ខែឧសភា ឆ្នាំ២០១៧ ក្នុងសាលប្រជុំ(អតីតរោងកុនចាស់) មានរៀបចំវគ្គបណ្តុះបណ្តាល ស្តីពីនីតិវិធីអ្នកសង្កេតការណ៍បោះឆ្នោតជ្រើសរើសក្រុមប្រឹក្សា ឃុំ សង្កាត់អណត្តិទី៤ ឆ្នាំ២០១៧ ជូនដល់សហភាពសហព័ន្ធយុវជនកម្ពុជា ខេត្តប៉ៃលិន ចំនួន៣៥០នាក់ ស្ថិតក្រោមអធិបតីភាព លោក អ៊ី ឈាន ប្រធានក្រុមការងារថ្នាក់កណ្តាល ចុះជួយខេត្តប៉ៃលិន និងមានការអញ្ជើញចូលរួមពីលោកស្រី បាន ស្រីមុំ អ៊ី ឈាន ប្រធានសហភាពសហព័ន្ធយុវជនកម្ពុជាខេត្ត លោក លោកស្រី សសយកខេត្ត ស្រុក ក្រុង ឃុំ សង្កាត់ យ៉ាងច្រើនកុះករ ។
លោកស្រី បាន ស្រីមុំ អ៊ី ឈាន ប្រធានសហភាពសហព័ន្ធយុវជនកម្ពុជា ខេត្តប៉ៃលិន បានមានប្រសាសន៍ថា៖ ការដែលយើងរៀបចំកម្មវិធីវគ្គបណ្តុះបណ្តាល ស្តីពីនីតិវិធីអ្នកសង្កេតការណ៍ ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អណត្តិទី៤ ឆ្នាំ២០១៧នេះឡើង ក្នុងគោលបំណងដើម្បីឲ្យយុវជន សសយក ចេះដឹងអំពីនីតិវិធីក្នុងការដែលខ្លួនយើងជាអ្នកសង្កេតការណ៍បោះឆ្នោតនាពេលខាងមុខ ។ លោកស្រីប្រធាន បានបន្តដែរថា៖ ជាមួយគ្នានេះដែរក្នុងនាមយើងជាអ្នកសង្កេតការណ៍បោះឆ្នោត ត្រូវតែអព្យាក្រិត្យ នូវជាកណ្តាល មិនប្រកាន់បក្សពួក ដោយធ្វើយ៉ាងណា ឲ្យដំណើរការបោះឆ្នោតប្រព្រិត្តដោយរលូន ជាងនេះទៅទៀតអ្នកសង្កេតការណ៍ត្រូវមានចិត្ត ទន់ភ្លន់ តែម៉ឺងម៉ាត់ក្នុងការងារជាអ្នកសង្កេតការណ៍ ផងដែរ ។
ឆ្លៀតក្នុងឪកាសនោះដែរ លោក អ៊ី ឈាន ប្រធានក្រុមការងារថ្នាក់កណ្តាល ចុះជួយខេត្តប៉ៃលិន បានមានប្រសាសន៍ ប្រកបដោយអត្ថន័យជ្រាវជ្រៅ ដល់សិក្ខាកាមថា៖ ក្នុងនាមយើងជាយុវជន ជាសរសរទ្រូងសំរាប់ប្រទេសជាតិ ធ្វើយ៉ាងណាត្រូវប្រកាន់ជំហររបស់ខ្លួន ក្នុងការប្រព្រិត្តអំពើល្អ ជួយដល់សង្គមកម្ពុជា ដើរតាមគោលនយោបាយឈ្នះ ឈ្នះ របស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាយើង ។ លោកប្រធានក្រុមការងារថ្នាក់កណ្តាល ចុះជួយខេត្តប៉ៃលិន បានមានប្រសាសន៍បន្តថា៖ ក្នុងពេលនេះ ជាពេលមួយដែលយើង ត្រូវធ្វើកិច្ចការសំរាបសង្គមជាតិ ហើយក៍ជាការងារសំខាន់បំផុត គឺធ្វើជាអ្នកសង្កេតការណ៍ ក្នុងការបោះឆ្នោតក្រុមប្រឹក្សាឃុំ សង្កាត់អណត្តិទី៤ ឆ្នាំ២០១៧ ដើម្បីធ្វើជាអ្នកសង្កេតការណ៍បានគឺយើងត្រូវចេះពីនីតិវិធីអ្នកសង្កេតការណ៍ ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ អញ្ចឹងអ្នកចូលរួមក្នុងថ្ងៃនេះ ធ្វើយ៉ាងណា ត្រូវត្រងត្រាប់ នូវចំណោះវិជ្ជានេះ យកទៅអនុវត្តន៍នាថ្ងៃអាទិត្យ ទី០៤ ខែមិថុនា ឆ្នាំ២០១៧ខាងមុននេះ ។ លោកមានប្រសាសន៍បន្តថា៖ កន្លងមកក្រុមការងារ ស ស យ កខេត្ត បានធ្វើកិច្ចសង្គមយ៉ាង គួរឲ្យគតសម្គាល់ ជាមួយគ្នានេះដែរ វគ្គបណ្តុះបណ្តាលអ្នកសង្កេតការណ៍ទាំងអស់ ត្រូវមានគោលជំហរ សុភាពរាបសារ ទន់ភ្លន់ តែរឹងមាំ ម៉ឺងម៉ាត់ មានក្រមសីលធម៌ល្អ មិនត្រូវធ្វើអ្វីនាំអោយប៉ះពាល់ដំណើការនៃការបោះឆ្នោតឡើយ ហើយក្មួយៗត្រូវហានបញ្ចេញសិទ្ធរបស់ខ្លួន ក្នុងការធ្វើពាក្យបណ្តឹង តវ៉ា ចំពោះបុគ្គល គណបក្សនយោបាយណា ដែលធ្វើខុសពីក្រមសីលធម៌នៃការបោះឆ្នោតផងដែរ ៕
ដោយ ៖ សេង សុវណ្ណារិទ្ធ
