មណ្ឌលគិរី៖ ដោយអនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ ដើម្បីលើកទឹកចិត្ត និងគាំទ្រដល់កងកម្លាំងប្រដាប់អាវុធដែលកំពុងបំពេញភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែនជួរមុខ នាព្រឹកថ្ងៃទី០៨ ខែតុលា ឆ្នាំ២០២៦ លោកឧត្តមសេនីយ៍ត្រី ជា ចិត្រា ស្នងការនគរបាលខេត្តមណ្ឌលគិរី បានអញ្ជើញអមដំណើរ ឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត និងឯកឧត្តម គង់ គឹមនី អភិបាលនៃគណៈអភិបាលខេត្ត ដឹកនាំគណៈប្រតិភូ ចុះសួរសុខទុក្ខ និងនាំយកអំណោយប្រគល់ជូនវីរកងទ័ពដែលកំពុងឈរជើងការពារទឹកដីនៅសមរភូមិមុខទិសប្រាសាទព្រះវិហារ។
ក្នុងឱកាសនោះ ថ្នាក់ដឹកនាំខេត្តបាននាំយកអំណោយជាស្បៀងអាហារ និងគ្រឿងឧបភោគបរិភោគជាច្រើនមុខ ព្រមទាំងថវិកាមួយចំនួន ដែលទទួលបានពីមន្ត្រីរាជការ និងសប្បុរសជននានាក្នុងខេត្តមណ្ឌលគិរី ដើម្បីចែកជូន និងលើកទឹកចិត្តដល់វីរកងទ័ពដែលកំពុងបំពេញភារកិច្ចនៅសមរភូមិមុខ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ។
សកម្មភាពនេះ បានបង្ហាញពីការយកចិត្តទុកដាក់ និងស្មារតីចូលរួមគាំទ្ររបស់ថ្នាក់ដឹកនាំ មន្ត្រីរាជការ និងសប្បុរសជន ចំពោះកងកម្លាំងប្រដាប់អាវុធដែលកំពុងបំពេញភារកិច្ចការពារ និងថែរក្សាបូរណភាពទឹកដីនៅតំបន់ព្រំដែន៕
