ខេត្តប៉ៃលិន៖ នេះជាការលើកឡើងរបស់នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់កណ្តាល ចុះជួយខេត្តប៉ៃលិន ក្នុងពិធីជួបសំណេះសំណាលជាមួយប្រជាពលរដ្ឋ និងពិធីបើកការដ្ឋានធ្វើផ្លូវចាក់កៅស៊ូ ប្រវែង៣គីឡូម៉ែត្រ ដែលជាអំណោយរបស់សម្តេចតេជោ ហ៊ុន សែន និងសម្តេចគតិព្រឹទ្ធបណ្ទឹត ប៊ុន រានី ហ៊ុន សែន សំរាប់ប្រជាពលរដ្ឋក្នុងឃុំស្ទឹងកាច់ ។
ពិធីនេះប្រព្រឹត្តទៅនៅព្រឹកថ្ងៃទី១៦ ខែឧសភា ឆ្នាំ២០១៧ ស្ថិតក្នុងភូមិដូង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ក្រោមអធិបតីភាពនាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់កណ្តាលចុះជួយខេត្តប៉ៃលិន ដោយមានការចូលរួមពីលោក ឡី ចាន់ឆាយ ប្រធានក្រុមប្រឹក្សាខេត្តប៉ៃលិន ,លោក លោកស្រីអភិបាលរងខេត្ត ,លោក តង់ ធារ៉ា ប្រធានក្រុមការងារចុះជួយឃុំស្ទឹងកាច់ ,ប្រធានក្រុមប្រឹក្សាស្រុក ,អភិបាលស្រុកសាលាក្រៅ ,លោក លោកស្រីប្រធាន អនុប្រធានមន្ទីរជុំវិញខេត្តសរុបជាង៨០០នាក់ ។
ក្នុងពិធីជួបសំណេះសំណាលជាមួយបងប្អូនប្រជាពលរដ្ឋក្នុងឃុំស្ទឹងកាច់ លោកនាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់កណ្តាលចុះជួយខេត្តប៉ៃលិន បានមានប្រសាសន៍លើកឡើងថា៖ ខេត្តប៉ៃលិនយើងបើគ្មាននយោបាយឈ្នះ ឈ្នះ របស់សម្តេចតេជោ ហ៊ុន សែន ទេ យើងក៍មិនមានសន្តិភាព និងការអភិវឌ្ឍន៍ រហូតដល់សព្វថ្ងៃនេះដែរ ម្លេះប្រទេសយើងក្លាយដូចជាប្រទេសលីប៊ី សេរី បាត់ទៅហើយ ។ លោកនាយឧត្តសេនីយ៍ បានរំលឹកពីអនុស្សាវរីយ៍ដ៏ជូរចត់នៅខេត្តប៉ៃលិន ដោយប៉ៃលិនពីមុនជាខេត្តដែលពោរពេញដោយសង្គ្រាមក្តៅគគុក គ្មានការសន្តិភាព គ្មានការអភិវឌ្ឍន៍ បន្ទាប់ពីយើងបានចូលរួមជាមួយរាជរដ្ឋាភិបាល ក្រោមនយោបាយឈ្នះ ឈ្នះ របស់សម្តេចតេជោ ហ៊ុន សែន យើងមានការអភិវឌ្ឍន៍លើគ្រប់វិស័យ មានសុខសន្តិភាព ដូច្នោះសម្តេចតេជោ ហ៊ុន សែន មានគុណបំណាច់បំផុត ក្នុងការបញ្ជាប់សង្គ្រាម ធ្វើឲ្យប្រទេសកម្ពុជាមានសុខសន្តិភាព និងការអភិវឌ្ឍន៍ ធ្វើឲ្យពិភពលោកកោតសរសើរ និងរៀនតាមផងដែរ ។ ជាមួយគ្នានេះដែរនៅពេលយើងមានសុខសន្តិភាពហើយ បែរជាមានគណបក្សមួយចំនួន បង្កើតបញ្ហាអសន្តិសុខក្នុងសង្គម បង្កើតអំពើហិង្សាក្នុងសង្គម ,ចង់បង្កើតសង្គ្រាម ធ្វើឲ្យអាបអោន ដល់ប្រមុខរាជរដ្ឋភិបាលកម្ពុជាយើង ។
លោកនាយឧត្តមសេនីយ៍ មានប្រសាសន៍បន្តថា៖ តើយើងចង់ឲ្យពួកទាំងអស់នេះ បង្កើតអសន្តិសុខដល់សង្គម ដែរឬទេ ? ដូច្នោះយើងប្តេជ្ញាថា ត្រូវរក្សាសុខសន្តិភាព ដែលមានស្រាប់ឲ្យបានឋិតថេរជានិរន្ត និងប្តេជ្ញាបោះឆ្នោតជូនគណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាយើងផងដែរ ។ បងប្អូនប្រជាពលរដ្ឋដែលចូលរួម មានសេចក្តីត្រេកអរយ៉ាងខ្លាំង ជាពិសេសសូមសម្តែងការគាំទ្រនិងដឹងគុណដល់សម្តេចតេជោដែលលោកតែងតែយកចិត្តទុកដាក់ចំពោះប្រជាពលរដ្ឋ ហើយពួកគាត់សន្យាថានិងបោះឆ្នោតជូនគណបក្សប្រជាជនកម្ពុជាដើម្បីបន្តនាំភាពសុខសាន្តនិងការអភិវឌ្ឍលើគ្រប់វិស័យទៅមុខទៀត៕
ដោយ ៖ សេង សុវណ្ណារិទ្ធ
