កែប ៖ ទិវាបរិស្ថានជាតិនិងបរិស្ដានពិភពលោក០៥មិថុនា ឆ្នាំ២០១៧ ក្រោមប្រធានបទ “ផ្សារភ្ជាប់ទំនាក់ទំនងរវាងមនុស្សនិងធម្មជាតិ” ត្រូវបានធ្វើឡើងនៅក្នុងបរិវេណវិទ្យាល័យចរិយាវង្ស នៃសង្កាត់អូរក្រសា ក្រុងកែប នាព្រឹកថ្ងៃទី១៧ខែឧសភា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់ លោកសាយ សំអាល់ រដ្ឋមន្ត្រីក្រសួងបរិស្ថាន និងលោក កែន សត្ថា អភិបាលនៃគណៈអភិបាលខេត្តកែប អមដំណើរដោយ អស់លោកជាថ្នាក់ដឹកនាំ មន្ទីរ អង្គភាពគ្រប់ជំនាញ រួមនឹងមន្ត្រីរាជការទូទាំងខេត្ត និងសិស្សានុសិស្សមកពីគ្រប់វិទ្យាល័យ អនុទ្យាល័យក្នុងខេត្តទាំងមូលផងដែរ។
លោកកែន សត្ថា អភិបាលខេត្តកែប បានថ្លែងថា ការប្រារព្វទិវាបរិស្ថានជាតិនិងបរិស្ថានពិភពលោក០៥មិថុនា ឆ្នាំ២០១៧នៅខេត្តកែបនាពេលនេះ គឺស្របនឹងប្រធានបទ”ផ្សារភ្ជាប់ទំនាក់ទំនងរវាងមនុស្ស និងធម្មជាតិ”ក្នុងគោលបំណង ការលើកកម្ពស់ការយល់ដឹងពីបរិស្ថានដល់សាធារណៈជន លើកទឹកចិត្តប្រជាសហគមន៍ ក៏ដូចជាមហាជនទូទៅឲ្យចូលរួមចំណែកក្នុងការអភិវឌ្ឍន៍អេកូទេសចរណ៍ប្រកបដោយចីរភាព ។
លោកបានបញ្ជាក់ថា កន្លងមកអាជ្ញាធរបានយកចិត្តទុកដាក់ខ្លាំងក្នុងកិច្ចគាំពារបរិស្ថាន ដើម្បីលើកកម្ពស់វិស័យបរិស្ថាន ដោយបានរួមសហការជាមួយមន្ទីរអង្គភាពជំនាញ ស្ថាប័នពាក់ព័ន្ធ អង្គការជាតិ អន្តរជាតិនានា ក៏ដូចជាបងប្អូនប្រជាពលរដ្ឋ និងវិស័យឯកជនក្នុងខេត្តចូលរួមយ៉ាងសកម្មក្នុងបុព្វហេតុដំណើរការទៅបានជោគជ័យ។ខណៈនេះដែរលោកក៏សូមថ្លែងអំណរគុណដល់ក្រសួងបរិស្ថាន តាមរយៈគម្រោងមូលនិធិបន្សាំ ដែលបានឧបត្ថម្ភកូនឈើគ្រប់ប្រភេទចំនួន១៥០០០ដើមសម្រាប់កម្មវិធីនេះនិងបានឧបត្ថម្ភអណ្តូងស្នប់ចំនួន១០អណ្តូងនៅក្នុងស្រុកដំណាក់ចង្អើរនាពេលកន្លងមក។
ក្នុងឱកាសនោះដែរ លោករដ្ឋមន្ត្រី សាយ សំអាល់ បានមានមតិផ្តាំផ្ញើរថា ការយល់ដឹងពីបរិស្ថានពិតជាជម្រើសមួយដ៏ប្រសើរ សម្រាប់ជួយជម្រុញសក្តានុពលនិងការអភិវឌ្ឍន៍អេកូទេសចរណ៍ឲ្យកាន់តែមាននិរន្តរភាពខ្ពស់។
លោករដ្ឋមន្ត្រី បានលើកឡើងយ៉ាងដូច្នេះថា បើផ្អែកលើវិស័យទេសចរណ៍ នៅក្នុងខេត្តកែបនេះពិតជាធ្លាប់មានឈ្មោះល្បីល្បាញតាំងពីយូរលង់ណាស់មកហើយ ថែមទាំងត្រូវបានរាប់បញ្ចូលជាឆ្នេរស្រស់ស្អាតដាច់គេក្នុងពិភពលោកផងដែរ ដូច្នេះដើម្បីជួយលើកកម្ពស់វិស័យទេសចរណ៍ក្នុងតំបន់ខាងលើឲ្យកាន់តែមានអទិភាពជាងនេះទៀតនោះ គប្បីយើងត្រូវរួបរួមគ្នាការពារបរិស្ថាន សំអាត អនាម័យ ពិសេសចូលរួមដាំដើមរុក្ខជាតិនានាឲ្យបានផុលផុស ដើម្បីឲ្យស្របតាមប្រធានបទ”ផ្សារភ្ជាប់ទំនាក់ទំនងរវាងមនុស្ស និងធម្មជាតិ” ៕
ណារិទ្ធ
